مارادونا جۇرەكسىز جەرلەنگەن

نۇر- سۇلتان. قازاقپارات - وسىدان ءبىر جىل بۇرىن اتى اڭىزعا اينالعان فۋتبولشى جانە جاتتىقتىرۋشى ديەگو ارماندو مارادونا قايتىس بولدى. سپورتشى سوزىلمالى جۇرەك جەتكىلىكسىزدىگىمەن اۋىرعان.

«وتە وكىنىشتى، ءبىراق ديەگو زياندى زاتتارعا تاۋەلدى بولدى. ونىڭ جاعدايىندا باسقا ادامدار ەرتەرەك قايتىس بولار ەدى»، - دەدى دارىگەر جانە جازۋشى نەلسون كاسترو. سونداي- اق كاسترو فۋتبولشىنىڭ دەنەسى جۇرەكسىز جەرلەنگەنىن ايتتى.

«حيمناسيا لا پلاتا كلۋبىنىڭ راديكالدى فۋتبول جانكۇيەرلەرى (مارادونانىڭ سوڭعى كومانداسى) ديەگو جەرلەگەننەن كەيىن ونىڭ جۇرەگىن الماق بولدى. وسى تۋرالى بەلگىلى بولعان سوڭ الدىن الا فۋتبولشىنىڭ جۇرەگىن دارىگەرلەر الىپ قالدى. ءبىر جاعىنان ماماندار ءولىمنىڭ سەبەبىن انىقتاعىسى كەلدى»، - دەدى ول.

مارادونانىڭ جۇرەگى باسقا ادامداردىڭ جۇرەكتەرىنە ۇقساماعان. «ونىڭ سالماعى 500 گرام، بۇل وتە كوپ، ادەتتە جۇرەكتىڭ سالماعى 300 گرام»، - دەدى كاسترو El Trece-گە بەرگەن سۇحباتىندا.

www.24.kz