ەلوردادا پوليتسيا قالتاعا تۇسكىش اككى ۇرىنى ۇستادى

نۇر-سۇلتان. قازاقپارات - پوليتسياعا قالتاسىنداعى زاتى جوعالعان تۇرعىندار شاعىم ءتۇسىردى. بارلىق ۇرلىق اۆتوبۋستا نەمەسە ايالدامادا بولعان.

قالتا ۇرىسى مۇنداي جەرلەردە ادام كوپتىگىن پايدالانىپ، جولاۋشىعا جاقىنداپ، ءساتى تۇسكەن كەزدە سومكە مەن سىرتقى كيىم قالتاسىنان تەلەفون مەن امياندى ۇرلاعان، دەپ حابارلايدى قازاقپارات قالالىق پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

بىرنەشە رەت ارىز تۇسكەننەن كەيىن جەدەل قىزمەتكەرلەر بىردەن قوعامدىق كولىك مارشرۋتى مەن ايالدامالاردى تەكسەرە باستادى. جەدەل ىزدەستىرۋ شارالارىن جۇرگىزۋ بارىسىندا پوليتسيا قىزمەتكەرلەرى قىلمىس ۇستىندە 30 جاستاعى كۇدىكتىنى ۇستادى.

كۇدىكتى بۇرىن ۇرلىق جاساعانى ءۇشىن بىرنەشە رەت سوتتالعان بولىپ شىقتى.

پوليتسەيلەر ونىڭ بەس رەت قالتاعا تۇسكەنىن انىقتادى. قازىرگى كەزدە ونىڭ استانا اۋماعىنداعى باسقا اشىلماعان قىلمىستارعا قاتىسى بار-جوقتىعى تەكسەرىلىپ جاتىر.

اتالعان فاكتىلەر بويىنشا ق ر ق ك- نىڭ 188-بابىنا سايكەس سوت الدى تەرگەۋ ءجۇرىپ جاتىر.

كۇدىكتى ۋاقىتشا ۇستاۋ يزولياتورىنا قامالدى. ەلوردانىڭ پوليتسيا دەپارتامەنتى ازاماتتاردى مۇقيات بولۋعا شاقىرادى.

قالتا ۇرىلارى قاربالاس ءساتتى پايدالانۋعا تىرىسادى. ولار ۇيالى تەلەفون مەن اميانداردى ۇرلايدى. پوليتسەيلەر ادام كوپ جەرلەردە جەكە زاتقا مۇقيات بولۋدى، سومكەنى نازاردان تىس قالدىرماۋدى، قۇندى زاتتاردى وڭاي الىناتىن جەردە ساقتاماۋدى ۇسىندى.

كۇدىكتى ادامدى بايقاعان جاعدايدا، بىردەن 102 ءنومىرى نەمەسە پوليتسيانىڭ ۇيالى قوسىمشاسىنا حابارلاسۋ كەرەك.