ۇلتتىق قوردان تارتىلعان قاراجات قايدا جۇمسالادى - مينيستر جاۋابى
بۇل تۋرالى سەناتتىڭ جالپى وتىرىسىندا ق ر ۇلتتىق ەكونوميكا ءمينيسترى اسەت ەرعاليەۆ ايتتى، دەپ حابارلايدى قازاقپارات ءتىلشىسى.
«رەسپۋبليكالىق بيۋدجەتتىڭ كىرىسى 2022 -جىلى بولجام بويىنشا - 9,2 تريلليون تەڭگەنى، 2023 -جىلى - 9,7 تريلليون تەڭگەنى، 2024 -جىلى - 10,4 تريلليون تەڭگەنى قۇرايدى. كەپىلدەندىرىلگەن ترانسفەرتتى 2022 -جىلى - 2,4 تريلليون تەڭگە، 2023 -جىلى - 2,2 تريلليون تەڭگە جانە 2024 -جىلى 2 تريلليون تەڭگە مولشەرىندە ايقىنداۋ ۇسىنىلىپ وتىر. وسىنى ەسكەرە وتىرىپ، ۇلتتىق قوردان سايكەس ءۇش جىلعا كەپىلدەندىرىلگەن ترانسفەرت تۋرالى زاڭ جوباسى ازىرلەندى»، - دەدى «الەۋمەتتىك- ەكونوميكالىق دامۋ بولجامى» جانە «ۇلتتىق قوردان كەپىلدەندىرىلگەن ترانسفەرت تۋرالى» زاڭ جوباسى تۋرالى بايانداعان مينيستر.
ونىڭ اتاپ وتۋىنشە، تارتىلاتىن قاراجات رەسپۋبليكالىق بيۋدجەتتەن تولەنەتىن ورتاق جانە مەملەكەتتىك بازالىق زەينەتاقى تولەمدەرىنە جۇمسالادى. قوسىمشا ۇلتتىق قوردان كەلەسى جىلعا 550 ميلليارد تەڭگە، ودان كەيىنگى ەكى جىلعا 400 ميلليارد تەڭگەدەن نىسانالى ترانسفەرت تارتۋ جوسپارلانعان.
«بۇل قاراجاتتى «نۇر- وتان» پارتياسىنىڭ سايلاۋالدى باعدارلاماسىنىڭ ءىس- شارالارىن قارجىلاندىرۋعا باعىتتاۋ ۇسىنىلادى. جوسپارلانىپ وتىرعان ترانسفەرتتەردى ەسكەرە وتىرىپ مۇناي باعاسى باررەلىنە 60 دوللار بولعان كەزدە مۇناي سەكتورىنان ۇلتتىق قورعا تۇسەتىن تۇسىمدەر بولجام بويىنشا 2022 -جىلى 2,5 تريلليون تەڭگەدەن 2024 -جىلى 3 تريلليون تەڭگەگە دەيىن ۇلعايادى. وسى ارالىقتا ۇلتتىق قوردىڭ ۆاليۋتالىق اكتيۆتەرى دە 55,3 ميلليارد دوللاردان 61,6 ميلليارد دوللارعا دەيىن ارتادى دەپ بولجانۋدا»، - دەدى اسەت ەرعاليەۆ.