«قازاقستان ارۋى» جەڭىمپازدارى انىقتالدى
«قازاقستان ارۋى» اتاعىن بىردەن ءۇش جەڭىمپاز يەلەندى. ولاردىڭ ءارقايسىسى قازاقستاندى ءىرى حالىقارالىق بايقاۋلاردا تانىستىرادى. «الەم ارۋى» بايقاۋىندا قازاقستان اتىنان اقتوبەلىك 23 جاستاعى نازەركە كارمانوۆا شىعادى. ول اقتوبەدەگى قازاق- ورىس حالىقارالىق ۋنيۆەرسيتەتىن بۋحگالتەر ماماندىعى بويىنشا بىتىرگەن. قازىر الماتىداعى بانكتەردىڭ بىرىندە مەنەدجەر بولىپ جۇمىس ىستەيدى. بويجەتكەن بوس ۋاقىتىندا ساداق اتۋمەن اينالىسادى، ۆيدەوعا، سۋرەتكە تۇسىرگەندى ۇناتادى.
بايقاۋدىڭ تاعى ءبىر جەڭىمپازى 21 جاستاعى ايدانا احاتايەۆا بولدى. ول - «استانا ارۋى - 2021» يەگەرى. ايدانا «الەم ارۋى» بايقاۋىندا قازاقستان اتىنان شىعادى. 21 جاستاعى بويجەتكەن قازاق ۇلتتىق ونەر ۋنيۆەرسيتەتىنىڭ تۇلەگى، قازىر ەلوردادا مۋزىكالىق ستۋديالاردىڭ بىرىندە فورتەپيانودان ساباق بەرەدى. بوس ۋاقىتىندا كلاسسيكالىق مۋزىكا تىڭداپ، شەت تىلدەرىن ۇيرەنگەندى ۇناتادى.
ءۇشىنشى جەڭىمپاز 20 جاستاعى قاراعاندىلىق اننا گلۋبوكوۆسكايا بولدى. ول قازاقستاندى «جەر ارۋى» بايقاۋىندا تانىستىرادى. اننا الماتىدا دىبىس جابدىعىمەن اينالىساتىن كومپانيادا جۇمىس ىستەيدى. مۋزىكامەن اۋەستەنەدى، شەتەل ادەبيەتىن وقىعاندى ۇناتادى. بالا كەزىنەن ورىس تىلىنەن وليمپيادالارعا قاتىسقان جەڭىمپاز. سونىمەن قاتار، اننا بولاشاقتا بەت ارلەۋشى ماماندىعىن كاسىبي تۇردە مەڭگەرۋدى جوسپارلايدى.
قازاقستاننىڭ ۆيتسە- ارۋى اتاعىن «سپورت ارۋى» پاۆلودارلىق 20 جاستاعى داناگۇل قاراباي يەلەندى.
«قازاقستان ارۋى 2021» مەرەيتويلىق 25- ۇلتتىق بايقاۋىنىڭ فينالى بىرنەشە جىلدان كەيىن العاش رەت الماتىداعى «قازاقفيلم» ستۋدياسىندا ءوتتى. فينالداعى شوۋ كەزىندە قازاقستاننىڭ ەڭ ادەمى قىزدارى ARUNAZ وتاندىق ءسان ءۇيىنىڭ كيىمدەرى مەن Sherri Hill گولليۆۋد برەندىنىڭ كويلەكتەرىن كيىپ شىقتى. ءداستۇرلى كوستيۋمدەردى كيىپ شىققان كورسەتىلىمنەن باسقا، زالداعى جانە تىكەلەي ەفيردەگى كورەرمەندەر فيناليستەردىڭ ەرەكشە ونەرىن تاماشالاي الدى.
ساحنادا بايقاۋدىڭ ءتورت قاتىسۋشىسى ونەر كورسەتتى، ولاردىڭ نومەرلەرى قازىلار القاسى تاراپىنان ۇزدىك دەپ تانىلدى: «الماتى ارۋى» ءاسيات يسەمبايەۆا «كەربەز» ۇلتتىق ءبيىن، «استانا ارۋى - 2019» ايزادا حابيبولايەۆا قوبىزدا انتونيو ۆيۆالديدىڭ «شتورم» شىعارماسىن، «استانا ارۋى - 2021» ايدانا احانتايەۆا پيانينودا باتىرحان شۇكەنوۆتىڭ «جاڭبىر» ءانىن، «تالانتى ارۋ» پولينا فيليمونوۆا اباي قۇنانبايەۆتىڭ «كوزىمنىڭ قاراسى» ءانىن ورىندادى.
سالتاناتتى ءراسىمنىڭ جۇرگىزۋشىلەرى «قازاقستان ارۋى - 2013» ايداي يسايەۆا مەن تانىمال تەلەجۇرگىزۋشى ارنۇر ىستىبايەۆ بولدى. ونەر كورسەتكەن كەش قوناقتارىنىڭ اراسىندا «101» توبى، MEZZO، QANAY، DJ Puza جانە Mira De Leon سەكىلدى تانىمال قازاقستاندىق ارتىستەر دە بولدى.
بيىل قازىلار القاسىنىڭ قۇرامىندا اكتەر تاۋەكەل ءمۇسىلىم، ءانشى ءمادينا ءسادۋاقاسوۆا، «قازاقستان ارۋى - 2013» يەگەرى، تەلەجۇرگىزۋشى ايداي يسايەۆا، KFW نەگىزىن قالاۋشى، ديزاينەر، ستيليست ۆيكتوريا مومىنبايەۆا، سۇڭقار قارابالين، قوعام قايراتكەرى سوۆەت سەيىتوۆ، «قازاقستان ارۋى» ديرەكتورى الەنا قىرباسوۆالار وتىردى، ال قازىلار القاسىنىڭ ءتوراعاسى تانىمال سكريپكاشى مارات بيسەنعاليەۆ بولدى.
بايقاۋدىڭ 28 قاتىسۋشىسىنىڭ ىشىنەن قازىلار القاسى 15 - 13 قىزدى تاڭدادى، بىرەۋى تالانتتار بايقاۋىنىڭ جەڭىمپازى، ەكىنشىسى missqazaqstan.kz سايتىنداعى داۋىس بەرۋ جەڭىمپازى بولدى. بايقاۋدىڭ اشىقتىعىن قامتاماسىز ەتۋ ءۇشىن قازىلار القاسى ۇزدىك 15 قىزدىڭ اراسىنان وزدەرى تۋرالى ايتاتىن گراند- فينالعا بەس قىزدى تاڭدادى. گراند- فينالدىڭ 5 جەڭىمپازىن قازاقستاندىقتار تىكەلەي ەفير كەزىندە باستالعان سايتتاعى داۋىس بەرۋ ارقىلى تاڭدادى.
ەسكە سالايىق، 2020 -جىلى «قازاقستان ارۋى» ۇلتتىق سۇلۋلىق بايقاۋىنىڭ ديرەكسياسى پاندەمياعا بايلانىستى ءداستۇرلى شوۋدى كەلەسى جىلعا اۋىستىرۋ تۋرالى شەشىم قابىلدادى.
www.24.kz
