پرەزيدەنت: ۇرپاق تاربيەسىنە باسا ءمان بەرۋىمىز كەرەك

None
None
نۇر- سۇلتان. قازاقپارات - رەفورمالارىمىزدىڭ تۇپكى مەجەسى - ۇلتتىڭ ساپاسىن جاقسارتۋ. بۇل تۋرالى ۇلتتىق قوعامدىق سەنىم كەڭەسىنىڭ 6-وتىرىسىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.

«مەن ۇلتتىڭ جاڭا بولمىسىن قالىپتاستىرۋ تۋرالى ۇنەمى ايتىپ ءجۇرمىن. بۇل وتە ماڭىزدى مىندەت. رەفورمالارىمىزدىڭ تۇپكى مەجەسى - ۇلتتىڭ ساپاسىن جاقسارتۋ. سەبەبى، حالقى مىقتى ەل عانا قۋاتتى مەملەكەت قۇرا الادى. ال، ۇلتىمىزدىڭ كەمەلدەنۋى ءۇشىن ءاربىر ازامات ورەسى بيىك، پاراساتتى بولۋعا ۇمتىلۋى قاجەت. ياعني، سانا وزگەرمەسە، ءبارى بەكەر. شىن مانىندە، جاڭعىرۋ تاربيەدەن باستاۋ الادى. سوندىقتان، ءبىز ۇرپاق تاربيەسىنە باسا ءمان بەرۋىمىز كەرەك. جاستاردىڭ بويىنا ەڭ ىزگى قاسيەتتەردى سىڭىرە بىلگەن ابزال. بۇل يماندىلىق پەن ادامگەرشىلىك، وتانشىلدىق پەن ۇلتجاندىلىق، بىلىمگە قۇشتارلىق پەن ەڭبەكقورلىق، ۇقىپتىلىقپەن تياناقتىلىق»، - دەدى مەملەكەت باسشىسى.

ق ر پرەزيدەنتى جاقىندا ءدىنتانۋشى قايرات جولدىبايدىڭ «كەمەل ادام» دەگەن كىتابىن وقىپ شىققانىن اتاپ ءوتتى.

«جاستارعا ونەگەلى ءتالىم- تاربيە بەرەتىن مۇنداي ەڭبەكتەر ەلگە قاجەت. وسىنداي كىتاپتاردى كەڭىنەن تاراتۋىمىز كەرەك. بىزدە ۇشقىر ويلى جاستار از ەمەس. بيلىك ولاردى قولداۋ كەرەك. ولارعا جان- جاقتى جاعداي جاساۋىمىز كەرەك. جالپى ازاماتتارىمىزدىڭ اعارتۋشىلىق جۇمىسپەن كوبىرەك اينالىسقانى ءجون»، - دەدى قاسىم- جومارت توقايەۆ.

1-سىنىپتاعى بالالاردىڭ سانى 25-تەن اسپاۋى كەرەك.

«تاعى ءبىر ماسەلە بار. ءار سىنىپتاعى بالا سانى شەكتەن تىس كوپ. نەگىزى 1-سىنىپتاعى بالالاردىڭ سانى 25-تەن اسپاۋى كەرەك. وسى ستاندارتتىڭ ساقتالۋىن قامتاماسىز ەتۋگە ءتيىسپىز. سونىمەن قاتار مەكتەپتەردىڭ ۇلگىلىك جوباسىن ازىرلەۋدى تاپسىرامىن. مەكتەپتىڭ جالپى كولەمى مەن ديزاينى ورىن سانىنا بايلانىستى انىقتالۋعا ءتيىس. مەكتەپ 2,5 مىڭ بالاعا ارنالسا، سوعان وراي ينفراقۇرىلىم دا بولۋى كەرەك»، - دەدى مەملەكەت باسشىسى.

ق ر پرەزيدەنتىنىڭ اتاپ وتۋىنشە، مەكتەپتە سپورت زالى، اسحانا، زەرتحانا جانە وقۋ كابينەتتەرى بولۋعا ءتيىس.

«جاڭا مەكتەپ سالۋعا بولىنگەن قارجىنىڭ ءتيىمسىز جۇمسالۋىنا، تالان- تاراجعا تۇسۋىنە جول بەرمەۋ قاجەت»، - دەدى قاسىم- جومارت توقايەۆ.

اۆتور: مارلان جيەمباي


سوڭعى جاڭالىقتار