دەنساۋلىق ساقتاۋ مينيسترلىگى ەلەكترون تەمەكىنىڭ قاۋپىن اتادى
نيكوتينسىز سۇيىقتىقتىڭ ءوزى قاۋىپتى. بۇل تۋرالى Tengrinews.kz تىلشىسىنە دەنساۋلىق ساقتاۋ مينيسترلىگى مەديتسينالىق كومەكتى ۇيىمداستىرۋ دەپارتامەنتى وكىلدەرى ايتقان.
دارىگەرلەردىڭ ايتۋىنشا، كلينيكالىق زەرتتەۋلەر ەلەكترون تەمەكى دەنساۋلىققا قاۋىپتى ەكەنىن كورسەتكەن.
«سۇيىقتىق تەمپەراتۋراسى كوتەرىلگەن كەزدە بۋ شىعارۋعا ارنالعان جىلىتۋ قۇرىلعىسى ەرىن مەن اۋىزدىڭ شىرىشتى قابىعىنىڭ، سونداي-اق تىنىس الۋ جولدارىنىڭ كۇيىپ قالۋىنا اكەلەدى. سۇيىقتىق قۇرامىنا كىرەتىن دياتسەتيل تەمەكى شەگۋ، تىنىس الۋ جولدارىنىڭ شىرىشتى قابىعىن زاقىمدايدى، ونىڭ سالدارى وبليتەراتسيالاناتىن برونحيت بولۋى مۇمكىن. نيكوتين سۇيىقتىعى پسيحواكتيۆ زاتتىڭ بارلىق اسەرىنە يە، سونىمەن قاتار جۇرەكتىڭ، ورتالىق جۇيكە جۇيەسىنىڭ جانە وكپەنىڭ جۇمىسىن بۇزادى. تىنىس الۋ جولدارىنىڭ اۋرۋلارى پايدا بولادى: كومەي، وكپە، اۋىز قۋىسى، ءتىل، ەرىن ىسىگى، وكپەنىڭ سوزىلمالى وبسترۋكتيۆ اۋرۋى جانە ت. ب. « - دەدى دەپارتامەنت وكىلدەرى.
ۇيىم جاسوسپىرىمدەر اراسىندا ەلەكترون تەمەكىنىڭ تانىمال بولۋى نيكوتينگە تاۋەلدىلىكتىڭ ەرتە قالىپتاسۋىنا اكەلەتىنىن، سوندىقتان ۆەيپ تەمەكىگە بالاما ەمەس ەكەنىن ايتتى
«ۆەيپ ۇيرەنگەن ادام نيكوتين دوزاسىن قابىلداۋدى جالعاستىرادى، ءبىراق ازىراق كولەمدە. تاۋەلدىلىك جويىلمايدى. جامان ادەتتەن ارىلۋعا تىرىسقاندا، ونى دەرەۋ جانە تولىعىمەن تاستاۋ كەرەك. نيكوتين تۇراقتى فيزيكالىق جانە پسيحيكالىق تاۋەلدىلىكتى (بيپوليارلىق بۇزىلىس، دەپرەسسيا) قالىپتاستىراتىن نەيروتوكسيندەر مەن الكالويدتارعا جاتادى»، - دەدى دەنساۋلىق ساقتاۋ مينيسترلىگى وكىلدەرى.
سونداي-اق، دەپارتامەنت قۇرامىندا نيكوتينى جوق سۇيىقتىقتار زيانى تۋرالى ەسكەرتتى.
«ەگەر ادام نيكوتين قوسپاي ۆەيپ قولدانۋعا تىرىسسا، وندا ۋاقىت وتە كەلە ونىڭ تۇراقتى تەمەكى شەگۋگە دەگەن قۇشتارلىعى پايدا بولادى. امەريكالىق تاۋەلدىلىكتى زەرتتەۋ ورتالىعىنىڭ ساراپشىلارىنىڭ ايتۋىنشا، نيكوتينسىز نۇسقاسى ۆەيپتەرگە پسيحولوگيالىق تاۋەلدىلىكتى تۋدىرادى. ول كادىمگى تەمەكىگە تاۋەلدىلىك جاعدايىنداعى سياقتى، تەمەكى شەگۋ مۇمكىن بولماعان كەزدە قۇمارلىقتى، الاڭداۋشىلىقتى، كوڭىل كۇيدىڭ وزگەرۋىن قامتيدى. تاۋەلدىلىكتى انىقتاۋ ءۇشىن امەريكالىق ورتالىق دارىگەرلەرى 11 بەلگىنى ەسكەرەدى، ولاردىڭ ءبىرىنشىسى - تەمەكىنى پايدالانۋ. ەگەر جىل ىشىندە 11 دەن كەم دەگەندە ەكى بەلگى پايدا بولسا، وندا بۇل ناشاقورلىق بار ەكەنىن كورسەتەدى»، - دەپ قوستى دەنساۋلىق ساقتاۋ مينيسترلىگى وكىلى.
ۆەيپ سۇيىقتىق قۇرامىندا انتيسەپتيك، گليتسەرين، حوش يىستەندىرگىشتەر، بوياعىشتار رەتىندە پروپيلەنگليكول بار ەكەنى ايتىلدى.
«سۇيىقتىقتى قىزدىراتىن دارەجەدە بۋ پايدا بولادى، ال حيميالىق زاتتاردىڭ قوسپاسى قىزدىرىلعاندا كانسەروگەندىك قاسيەتكە يە زيان قوسىلىستار پايدا بولادى»، - دەپ قورىتىندىلادى دارىگەرلەر.