قازاقستاندىق عالىمدار ونكولوگيالىق اۋرۋلاردى دياگنوستيكالاۋعا ارنالعان ەرىتىندى جاساپ شىعاردى

None
None
نۇر- سۇلتان. قازاقپارات - س. امانجولوۆ اتىنداعى شىعىس قازاقستان ۋنيۆەرسيتەتىنىڭ عالىمدارى جاتىر موينى وبىرىن كەشەندى دياگنوستيكالاۋ ءۇشىن ەرىتىندى جاساپ شىعاردى، دەپ حابارلايدى ق ر ب ع م باسپا ءسوز قىزمەتى.

ەكى جىل بويى عىلىمي قىزمەتكەرلەر ساۋىقتىرۋ ورتالىعىنىڭ وكىلدەرىمەن بىرلەسە تسيتولوگيا سالاسىندا سۇرانىسقا يە سۇيىقتىق قۇرامىن ازىرلەدى. ناتيجەسىندە ولار بۇرىن شەتەلدەن الىنىپ كەلگەن ءونىمدى ءوز ەلىمىزدە جاسادى. ەندى عالىمداردىڭ بۇل جاڭاشىلدىقتارى مەديتسينالىق قىزمەتتىڭ قۇنىن تومەندەتۋگە مۇمكىندىك بەرەدى. ويتكەنى ول قارجىلىق جاعىنان دا، گەوگرافيالىق جاعىنان دا قولجەتىمدى بولا تۇسپەك. عالىمداردىڭ ايتۋىنشا، ەرىتىندىنىڭ ساپاسى شەتەلدىك انالوگتاردان كەم تۇسپەيدى.

«ءبىزدىڭ عالىمدارىمىزدىڭ جاساپ شىعارعان تۋىندىسى يمپورتتى الماستىرۋ ماسەلەسىن شەشەدى. وسى زەرتتەۋدىڭ ناتيجەسىندە بيوماتەريالدى ساقتاۋعا ارنالعان بەكىتۋشى ەرىتىندىنىڭ وڭتايلى قۇرامى جاسالدى. بۇل بيوماتەريالداردى تۇراقتاندىرۋعا جانە تاسىمالداۋعا مۇمكىندىك بەرەدى، ياعني ونكولوگيالىق اۋرۋدى ودان ءارى دياگنوستيكالاۋ ءۇشىن جاتىر موينىنا جاقپا رەتىندە پايدالانىلادى. بۇل ازىرلەمەنىڭ بىرەگەيلىگى — قاتەرلى ىسىكتى تەز دياگنوستيكالاۋ ماسەلەلەرىن كەشەندى تۇردە شەشۋ بولىپ تابىلادى» ، - دەدى س. امانجولوۆ اتىنداعى شىعىس قازاقستان ۋنيۆەرسيتەتى ۇلتتىق عىلىمي زەرتحاناسىنىڭ كىشى عىلىمي قىزمەتكەرى ايدانا يماشيەۆا.

ايتا كەتەيىك، عالىمدار توبى وزدەرى ازىرلەگەن بەكىتۋشى ەرىتىندىگە پاتەنت الدى. ناتيجەسىندە بۇل ءونىم قازاقستان رەسپۋبليكاسىنىڭ دارىلىك زاتتار مەن مەديتسينالىق بۇيىمدار تىزىلىمىنە ەنگىزىلدى. قازىرگى تاڭدا جوبا كوممەرتسيالاندىرۋ ساتىسىندا. سونىمەن قاتار عالىمدار باسقا دا بيولوگيالىق ماتەريالداردى ساقتاۋ ەرىتىندىسىنىڭ قۇرامىن جاقسارتۋ بارىسىندا جۇمىس ىستەۋدە.

سوڭعى جاڭالىقتار