USD 434.84 EUR 498.2
RUB 5.72 CNY 68.47
جاڭالىقتار

شەتەلدەگى قازاق باسپا ءسوزى: قادەن كابەن ۇلى شىڭجاڭ ولكەسى پارتكومىنىڭ باس حاتشىسى بولدى. يراندىق قانداستىڭ تابىسى

7 قاراشا 13:43
:ءبولىسۋ
شەتەلدەگى قازاق باسپا ءسوزى: قادەن كابەن ۇلى شىڭجاڭ ولكەسى پارتكومىنىڭ باس حاتشىسى بولدى. يراندىق قانداستىڭ تابىسى

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

يراندىق قازاق بالاسىنىڭ تابىسى - TRT

يراندا گۇليستان ءۋالاياتىنىڭ بەندەر تۇرىكمەن قالاسىندا تۇراتىن قازاق وقۋشى يرفان كورپە ۋنيۆەرسيتەت ەمتيحانىندا ەل كولەمىندە ءۇشىنشى ورىن الدى، دەپ حابارلايدى تۇركيا راديو تەلەۆيزيا پورتالى.


تۇركيالىق ب ا ق-تىڭ دەرەگىنشە، يراندا بيىل 1 ميلليون 366 مىڭ 931 تالاپكەر مەملەكەتتىك ۋنيۆەرسيتەتتە وقۋ ءۇشىن باق سىنادى. جوعارى سىنىپتىڭ ءبىر ءبولىمىن بەندەر تۇرىكمەن قالاسىندا، قالعانىن گۇرگەن قالاسىندا وقىعان قازاق وقۋشى وسى ەمتيحاندا ۇزدىكتەر قاتارىنان كورىندى. ول جاقسى ناتيجە العان ءۇشىنشى تالاپكەر بولدى.

يران قازاقتارى قاۋىمداستىعى مەن قازاقستاننىڭ گورگان قالاسىنداعى كونسۋلدىعى يران كولەمىندە ۋنيۆەرسيتەت ەمتيحانىندا ۇلكەن تابىسقا جەتىپ، ءۇشىنشى ورىن العان يرفان كورپە قۇرمەتىنە ارنايى ءراسىم ۇيىمداستىرىلدى. ونىڭ وسى تابىسى يرانداعى جالپى قازاقتار مەن بەندەر تۇرىكمەندىك جەرلەستەرىن قاتتى قۋانتقان. اتالعان شارادا قازاقستاننىڭ گورگانداعى باس كونسۋلى ايتجان ايداشەۆ ءسوز سويلەگەن. ايداشەۆ گورگان- اقتاۋ اراسىنداعى ۇشاق رەيستەرىنە ايىرىقشا توقتالىپ، ۇشاق رەيستەرىمەن وسىنداي بالالارىمىز اتامەكەنىنە جەتە الاتىنىن اتاپ وتكەن.


ايتا كەتەيىك، يراندا تۇراتىن قازاقتار جالپى بەندەر تۇرىكمەن، گورگان جانە كۇممەب گاۆۋز قالالارىندا تۇرادى.

جۇك كولىگىنىڭ جۇرگىزۋشىسى ش. جۇلدىز جۇمىسىنىڭ قيىن تۇستارىن ايتىپ بەردى - Kaznews

موڭعوليالىق Kaznews سايتى 4 جىلعا جۋىق جۇك كولىكتەرىنىڭ جۇرگىزۋشىسى بولىپ جۇمىس ىستەيتىن ش. جۇلدىز ەسىمدى قانداسىمىزدان جۇمىسىنىڭ قىر- سىرى تۋرالى سۇحبات جاريالادى. سوڭعى ۋاقىتتا ايەلدەردىڭ جۇك كولىكتەردى جۇرگىزۋگە قىزىعۋشىلىعى ارتىپ كەلەدى. وسى جولى نازىك جاندى قاۋىمنىڭ ەرگە بەرگىسىز بۇنداي قابىلەتى مەن ەرىك- جىگەرى الەۋمەتتىك جەلىدە كوپ تالقىلانىپ، كەيبىرى وعان باتىلدىعى ءۇشىن ساتتىلىك تىلەگەن.


تىلشىگە بەرگەن سۇحباتىندا موڭعوليالىق قانداسىمىز بالا كەزىنەن كولىك جۇرگىزۋگە اۋەس بولعانىن، بۇل جۇمىسقا ول بالا-شاعاسىن اسىراۋ ءۇشىن بارعانىن ايتادى. ول العاش كولىكتى جۇرگىزۋگە كەلگەندە قورقىنىشى بولعانىن جاسىرمايدى. كەيىننەن تاۋەكەلگە بەل بۋىپ، كومىر تيەيتىن كولىكتى دە مەڭگەرگەنىن جانە جۇمىسىنىڭ قيىن تۇستارىن دا ايتىپ بەرگەن.

ايتا كەتۋ كەرەك، ش. جۇلدىز جۇك كولىگىن جۇرگىزەتىن ءوزى سياقتى ايەلدەردى جىگەرلەندىرۋ ءۇشىن تيك- توك الەۋمەتتىك جەلىسىندە ۆيدەو تۇسىرەدى ەكەن.


تۇركىتىلدەس ەلدەردىڭ باس پروكۋرورلارىنىڭ كەڭەسى قۇرىلدى - «ءوزا»

ازەربايجان استاناسىندا تۇركىتىلدەس مەملەكەتتەر ىنتىماقتاستىق كەڭەسى باس پروكۋرورلارىنىڭ ءبىرىنشى وتىرىسى ءوتتى، دەپ حابارلادى «ءوزا» مەملەكەتتىك اقپارات اگەنتتىگى.

وزبەكستاندىق ب ا ق-تىڭ حابارلاۋىنشا، اتاۋلى شاراعا قازاقستان، قىرعىزستان، تۇركيانىڭ باس پروكۋرورلارى، ۆەنگريانىڭ ەلشىسى، سونداي-اق تۇركى كەڭەسى باس حاتشىسىنىڭ ورىنباسارى ميرۆوحيد ازيموۆ جانە حالىقارالىق پروكۋرورلار قاۋىمداستىعىنىڭ پرەزيدەنتى چەول-كيۋ حۆان قاتىسقان. كەزدەسۋ بارىسىندا قۇقىقتىق سالاداعى ىنتىماقتاستىقتى كەڭەيتۋدىڭ ماڭىزدىلىعى، مۇشە مەملەكەتتەردىڭ ۆەدومستۆولارى اراسىنداعى كوورديناتسيا مەن تىكەلەي بايلانىستاردى نىعايتۋ ترانسشەكارالىق قاۋىپ- قاتەرلەرگە، ونىڭ ىشىندە ەكسترەميزم مەن ەسىرتكىنىڭ زاڭسىز اينالىمىنا قارسى تۇرۋدا ماڭىزدى ءرول اتقاراتىنى ايتىلعان.


«وسىنداي تىعىز بايلانىس ارقىلى قۇقىقتىق كومەك كورسەتۋ، پروكۋرورلار قىزمەتىنىڭ تيىمدىلىگىن ارتتىرۋ، تاجىريبە الماسۋ ماقساتىندا «تۇركىتىلدەس ەلدەردىڭ باس پروكۋرورلارى كەڭەسىن قۇرۋ تۋرالى ەرەجەگە» قول قويىلعانى ايتىلدى» ، دەپ تۇيىندەيدى «ءوزا».

قادەن كابەن ۇلى شىڭجاڭ ولكەسى پارتكومىنىڭ باس حاتشىسى بولدى - CNR

قازاننىڭ 27 سى كۇنى تاڭەرتەڭ ش ۇ ا ءو پارتيا كوميتەتىنىڭ باس كەڭسەسى ءماجىلىس وتكىزدى. اتالعان جيىندى اۆتونوميالىق ولكە پارتيا كوميتەتىنىڭ تۇراقتى كوميتەتىنىڭ مۇشەسى، باس حاتشى قادەن كابەن ۇلى باسقارىپ، جۇرگىزدى. جوعارىداعى مالىمەتتەر قادەن كابەن ۇلىنىڭ شىڭجاڭ- ۇيعىر اۆتونوميالىق ولكەسى پارتيا كوميتەتىنىڭ باس حاتشىسى قىزمەتىنە تاعايىندالعانىن كورسەتەدى، دەپ حابارلايدى قىتايدىڭ CNR باسىلىمى.

قىتايلىق ب ا ق-تىڭ كەلتىرگەن دەرەگىنە سۇيەنسەك، قادەن كابەن ۇلى 1969 -جىلى تۋعان، ۇلتى قازاق. 1992 -جىلى داليان تەحنولوگيالىق ۋنيۆەرسيتەتىن بىتىرگەننەن كەيىن شىڭجاڭ حيميالىق جوبالاۋ جانە عىلىمي-زەرتتەۋ ينستيتۋتىندا جانە شىڭجاڭ-ۇيعىر اۆتونوميالىق ولكەسى ينۆەستيتسيالىق كومپانياسىندا جۇمىس ىستەگەن.

قادەن كابەن ۇلى 2012 -جىلى شىڭجاڭ-ۇيعىر اۆتونوميالىق ولكەسى ەكونوميكالىق جانە اقپارات كوميسسياسى ديرەكتورىنىڭ ورىنباسارى، 2016 -جىلى شىڭجاڭ ولكەسى قورشاعان ورتانى قورعاۋ باسقارماسىنىڭ پارتيالىق توبىنىڭ حاتشىسىنىڭ ورىنباسارى جانە ديرەكتورى قىزمەتتەرىن اتقاردى.

ق. كابەن ۇلى 2017 -جىلدىڭ ناۋرىز ايىندا شىڭجاڭ-ۇيعىر اۆتونوميالىق ولكەسى، التاي ايماعى پارتيا كوميتەتى حاتشىسىنىڭ ورىنباسارى جانە ايماقتىڭ اكىمى بولعان.

2021 -جىلدىڭ ماۋسىم ايىندا شىڭجاڭ-ۇيعىر اۆتونوميالىق ولكەسى ىلە قازاق اۆتونوميالىق وبلىسى پارتيا كوميتەتى حاتشىسىنىڭ ورىنباسارى جانە وبلىس گۋبەرناتورىنىڭ مىندەتىن اتقارۋشى بولىپ قىزمەت ەتكەن.

ودان كەيىن وسى قىزمەتكە، ياعني شىڭجاڭ-ۇيعىر اۆتونوميالىق ولكەسى پارتيا كوميتەتىنىڭ تۇراقتى كوميتەتىنىڭ مۇشەسى جانە باس حاتشىسى بولىپ تاعايىندالدى.

ايتا كەتەيىك، قادەندى قازاقتار اراسىنان شىققان «قىزىل ەكىنشى بۋىن» دەپ اتاۋعا بولادى. ولاي اتالۋىنىڭ سەبەبى - قىتايدا جوعارى بيلىككە شىققان تۇلعانىڭ اكەسى ءيا شەشەسى اتالعان ەلدىڭ اكىمشىلىك، پارتيالىق جۇيەسىندە جوعارى لاۋازىمدى قىزمەت اتقارعان نەمەسە بيزنەس سالاسىندا ۇلكەن جەتىستىككە جەتكەن بولۋى كەرەك. ونىڭ اكەسى كابەن اقساقال ش ۇ ا ءو پارتيا كوميتەتى ۇيىمداستىرۋ ءبولىمى باسشىسىنىڭ ورىنباسارى قىزمەتىن اتقارعان.

انكارادا بىرنەشە كىتاپتىڭ تۇساۋى كەسىلدى - TRT

تۇركيانىڭ باس قالاسىندا XVI انكارا حالىقارالىق كىتاپ جارمەڭكەسى اياقتالدى. XVI انكارا كىتاپ جارمەڭكەسىندە «قوناق ەل» بيىل قازاقستان بولدى. قازاقستان ەلشىلىگى جارمەڭكە شەڭبەرىندە بىرنەشە كىتاپتىڭ تۇساۋكەسەر ءراسىمى مەن كىتاپ اۆتورلارىمەن كەزدەسۋ وتكىزدى. 27-قازان كۇنى پروفەسسور، دوكتور كۇرشاد زورلۋنىڭ «ۇلى دالانىڭ جاڭعىرۋى: نۇرسۇلتان نازاربايەۆ» اتتى تۇرىك تىلىندە جارىق كورگەن كىتابى تانىستىرىلدى، دەپ حابارلايدى تۇركيا راديو تەلەۆيزيا پورتالى.


اتالعان كەزدەسۋگە قازاقستاننىڭ تۇركياداعى ەلشىسى ابزال ساپاربەك ۇلى دا قاتىسقان. 30-قازاندا قازاقستاننىڭ تۇركياداعى ەلشىلىگى جانە ەۋرازيا جازۋشىلار وداعى بىرلەسە دايىنداعان ەكى كىتاپتىڭ تۇساۋكەسەرى بولىپ ءوتتى.

«جىراۋلاردىڭ سوزىمەن اباي» ولەڭدەر جيناعىنىڭ تۇساۋكەسەر راسىمىنە كىتاپتىڭ اۆتورلارى ورحان سويلەمەز، گوكسەل وزتۇرىك، سابينا سايد جانە زيالى قاۋىم وكىلدەرى، ستۋدەنتتەر مەن ب ا ق وكىلدەرى قاتىستى.

اتالعان كىتاپتىڭ اۆتورى پروفەسسور، دوكتور ورحان سويلەمەز ابايدى جاستارعا تانىستىرۋ، ونى تۇرىك وقىرماندارىنا كەڭىنەن جەتكىزۋدىڭ ماڭىزدىلىعىنا توقتالدى. اباي شىعارمالارىنىڭ بۇكىل تۇركى جۇرتىنا مۇرا ەكەندىگىن اتاپ وتكەن اۆتور بۇل شىعارمادا تۇركى الەمىندەگى اقىنداردىڭ اباي تۋرالى ولەڭدەرى جيناقتالعانىنا توقتالدى. ونىڭ ايتۋىنشا، بۇل شىعارما قازاقستان تاۋەلسىزدىگىنىڭ 30 جىلدىعىنا جانە ابايدىڭ 175 جىلدىعىنا ارنايى ازىرلەنگەن.

قازاقستاننىڭ تۇركياداعى ەلشىلىگى جانە ەۋرازيا جازۋشىلار وداعى دايىنداعان ەكىنشى كىتاپ ءابىش كەكىلبايەۆ شىعارمالارىنىڭ تۇرىكشە جيناعى بولدى. اتالعان جيناقتى پروفەسسور، دوكتور ورحان سويلەمەز، دوك. ياكۋپ ومەروگلۋ، سالتانات ۇزاقباي قىزى گۇزەل جانە سامەت يىلدىز دايىنداعان. قازاقستاننىڭ حالىق جازۋشىسى، قازاق ادەبيەتىنىڭ كلاسسيگى، كورنەكتى مەملەكەت جانە قوعام قايراتكەرى ءابىش كەكىلبايەۆ تۋرالى ءسوز سويلەگەن سالتانات ۇزاقباي قىزى گۇزەل «ءابىش كەكىلبايەۆ - XX عاسىرداعى قازاق قاۋىمىنىڭ، تۇركى الەمىنىڭ زاڭعار جازۋشىسى. قازىرگى قازاق ادەبيەتىنىڭ كورنەكتى وكىلى»، دەگەن.

جيىن سوڭىندا قوناقتارعا كىتاپ تارتۋ ەتىلدى. كىتاپ اۆتورلارىنا قازاقستاننىڭ تۇركياداعى ەلشىسى ابزال ساپاربەك ۇلى اتىنان العىس حاتتار تابىستالدى.

«بەيبىتشىلىك پەن تۇسىنىستىك جولىنداعى ءدىنارالىق ديالوگ» اتتى دوڭگەلەك ۇستەل وتىرىسى ءوتتى - Parstoday

يراندىق Parstoday اقپاراتتىق اگەنتتىگى دەرەگىنشە، 2021 -جىلعى 2-قاراشا كۇنى تەگەراندا «بەيبىتشىلىك پەن تۇسىنىستىك جولىنداعى ءدىنارالىق ديالوگ» اتتى دوڭگەلەك ۇستەل وتىرىسى ونلاين فورماتتا وتكەن. بۇل ءىس- شارا كونفەسسياارالىق جانە وركەنيەتارالىق ديالوگتى دامىتۋ جونىندەگى ن. نازاربايەۆ ورتالىعىنىڭ قولداۋىمەن، قازاقستاننىڭ يرانداعى ەلشىلىگىنىڭ ۇيىمداستىرۋىمەن، ي ي ر مادەنيەت جانە يسلام بايلانىستارى ۇيىمى جانە يراننىڭ قازاقستانداعى ەلشىلىگىنىڭ بەلسەندى قاتىسۋىمەن وتكىزىلدى، دەپ حابارلايدى Parstoday.

دوڭگەلەك ۇستەلگە ق ر اقپارات جانە قوعامدىق دامۋ ۆيتسە-ءمينيسترى س. ەگىزبايەۆ، ي ي ر مادەنيەت جانە يسلام بايلانىستارى ۇيىمى ءدىنارالىق جانە مادەنيەتارالىق ديالوگ ورتالىعىنىڭ ءتوراعاسى ع. سۇلەيماني، قازاقستاننىڭ يرانداعى ەلشىسى ا. ورازباي، يراننىڭ قازاقستانداعى ەلشىسى م. سابەر، قازاقستان مۇسىلماندارى ءدىني باسقارماسىنىڭ نايب ءمۋفتيى ە. وڭعاروۆ قاتىسىپ ءسوز سويلەگەن.

سونىمەن قاتار، قۇم قالاسىنداعى حالىقارالىق دىندەردى زەرتتەۋ ۇيىمى باسشىسىنىڭ ورىنباسارى ح. ءابديپۋر، «رۋحاني جاڭعىرۋ» قازاقستاندىق قوعامدىق دامۋ ينستيتۋتى» ك ە ا ق جەتەكشىسى ق. مايگەلدينوۆ، كونفەسسياارالىق جانە وركەنيەتارالىق ديالوگتى دامىتۋ جونىندەگى ن. نازاربايەۆ ورتالىعىنىڭ ءدىني احۋالدى تالداۋ جانە ءدىنتانۋ ساراپتاماسى ينستيتۋتىنىڭ باسشىسى ە. بايبول، ەكى ەلدىڭ وزگە دە ساراپشىلارى قاتىسىپ، ءوز ويلارىن ورتاعا سالعان.

سونداي-اق، وسى ءىس- شاراعا IRNA، Tehran times، Iran news، Iran daily، Asia، Iran جانە باسقا دا ب ا ق وكىلدەرى قاتىسىپ وتىردى، دەپ جازادى يراندىق ب ا ق.


«تەگەراندا «بەيبىتشىلىك پەن تۇسىنىستىك جولىنداعى ءدىنارالىق ديالوگ» اتتى ونلاين فورماتتا وتكەن «دوڭگەلەك ۇستەلگە» قازاقستان مۇسىلماندارى ءدىني باسقارماسىنىڭ نايب ءمۋفتيى ەرشات وڭعاروۆ تا قاتىسقان. ە. وڭعاروۆ كونفەسسياارالىق ديالوگتىڭ ءدىني اسپەكتىلەرىنە، بۇگىندە قازاقستان جاھاندىق كونفەسسياارالىق ءۇنقاتىسۋ ورتالىعى بولىپ سانالاتىنىنا توقتالدى»، دەپ جازادى Parstoday اقپارات اگەنتتىگى.

CIIE قازاقستانعا قىتاي نارىعىنا شىعۋعا تاماشا مۇمكىندىك بەرەدى - «حالىق گازەتى»

قىتايدىڭ قازاق تىلىندە شىعاتىن «حالىق گازەتى» پورتالىندا وسى اپتادا قازاقستانعا قاتىستى بىرنەشە اقپارات جارىق كوردى. اتاپ ايتار بولساق، «قىتايدىڭ كورنەكتى فيلمدەرى قازاقستاندا جاقسى باعالاندى»، «China International Import Expo قازاقستانعا قىتاي نارىعىنا شىعۋعا تاماشا مۇمكىندىك بەرەدى» جانە «پاندەميا: ق ر پرەزيدەنتى قىتايمەن شەكاراداعى ۋاقىتشا شەكتەۋلەر تەزىرەك اياقتالاتىنىنا سەنىم ءبىلدىردى»، دەگەن تاقىرىپتارمەن ءۇش اقپارات جاريالاندى.

ايتا كەتەيىك، «قىتايدىڭ كورنەكتى فيلمدەرى قازاقستاندا جاقسى باعالاندى» دەگەن اقپاراتتا قىتايدىڭ قازاقستانداعى ەلشىلىگى مەن «الماتى» تەلەارناسى بىرلەسىپ ۇيىمداستىرعان ەكىنشى قازاقستاندىق قىتاي كينوسى ايلىعى ءساتتى اياقتالعانى جازىلعان ەكەن.


ول جوبا بويىنشا، قازاقستاندا قىتايدىڭ جەتى فيلمى كورەرمەنمەن جۇزدەسكەن. «ءبىر بەلدەۋ، ءبىر جول» بىرلەسكەن جوباسى اياسىندا قىتاي مەن قازاقستاننىڭ كينو جانە تەليەۆيدەنيە ىنتىماقتاستىعى مەن مادەني الماسۋلارى جاڭا دەڭگەيگە كوتەرىلىپ وتىرعانى دا تىلگە تيەك ەتىلەدى. «حالىق گازەتى»-نىڭ كەلتىرگەن دەرەكتەرىنە سۇيەنسەك، قازاقستانداعى قىتاي كينوسى ايلىعىندا «يۋننان قۇرت القابى» جانە «جىلى قۇشاق» سياقتى 7 تاماشا فيلم تانىستىرىلعان.

«...قازاقستان مەن قىتاي «ءبىر بەلدەۋ، ءبىر جول» باستاماسى اياسىندا كينو جانە تەليەۆيدەنيە، مادەنيەت سالالارىنداعى ىنتىماقتاستىقتى تەرەڭدەتۋ ارقىلى ەكى تاراپتى كوپىرلەر ورنىقتىرۋدا. بۇل ەكى ەل اراسىنداعى ءوزارا تۇسىنىستىككە، حالىقتار جۇرەگىنىڭ توعىسۋىنا سەپتىگىن تيگىزبەك»، دەپ تۇيىندەيدى بۇل اقپاراتىن «حالىق گازەتى».

سونداي-اق، «CIIE (China International Import Expo) قازاقستانعا قىتاي نارىعىنا شىعۋعا تاماشا مۇمكىندىك بەرەدى» دەگەن اقپاراتتا قازاقستاننىڭ ساۋدا ساياساتىن دامىتۋ ورتالىعى ديرەكتورىنىڭ ورىنباسارى نۇرالى بوكەيحانوۆ نۇر-سۇلتاندا شينحۋا اقپارات اگەنتتىگىنىڭ تىلشىلەرىنە ەكسكليۋزيۆتى سۇحبات بەرگەنى ايتىلادى.


نۇرالى بوكەيحانوۆ قازاقستاننىڭ ساۋدا ساياساتىن دامىتۋ ورتالىعى قازاقستاننىڭ ساۋدا جانە ينتەگراتسيا مينيسترلىگىنە قاراستى تولىق اكتسيونەرلىك قوعام بولىپ تابىلاتىنىن جانە قازاقستاندىق كاسىپورىنداردىڭ اعىمداعى CIIE-گە قاتىسۋىن ۇيىمداستىرۋعا جاۋاپتى ەكەنىن جەتكىزگەن. بۇل ۇيىم قازاقستاندىق وندىرۋشىلەرگە سىرتقى نارىققا شىعۋعا، ءونىم سەرتيفيكاتتارىن الۋعا جانە لوگيستيكالىق باعىتتاردى قۇرۋعا كومەكتەسەتىنىن جازادى قىتايلىق ب ا ق.

«...ن. بوكەيحانوۆتىڭ ايتۋىنشا، CIIE قازاقستان ءۇشىن اسا وڭتايلى، جىل سايىن كورمەگە 20-30 قازاقستاندىق كومپانيا قاتىسادى. كورمە وتكىزىلگەننەن بەرى قازاقستاندىق وندىرۋشىلەر قىتايلىق ارىپتەستەرىمەن 500 ميلليون ا ق ش دوللارىنا جۋىق كەلىسىمشارت پەن ەكسپورتتىق كەلىسىمدەرگە قول قويدى. بيىلعى جىلى كورمەگە قازاقستاننان 27 كومپانيا قاتىسىپ، ولار نەگىزىنەن ەت، ۇن، سۋسىندار، ماي جانە ءسۇت ونىمدەرى سياقتى ازىق- تۇلىك جانە اۋىلشارۋاشىلىق ونىمدەرىن كورسەتەدى»، دەيدى kaz.people.cn.


ال، اپتا سوڭىنا قاراي جاريالانعان «پاندەميا: ق ر پرەزيدەنتى قىتايمەن شەكاراداعى ۋاقىتشا شەكتەۋلەر تەزىرەك اياقتالاتىنىنا سەنىم ءبىلدىردى»، دەگەن اقپاراتتى قىتايلىق باسىلىم قازاقستاندىق ب ا ق - قازاقپارات اگەنتتىگىنە سىلتەمە جاساپ حابارلاعان ەكەن.

اۆتور: بەيسەن سۇلتان ۇلى



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات