قازاقستان- قىتاي شەكاراسىنداعى شەكتەۋ تەزىرەك اياقتالادى دەپ سەنەمىز - توقايەۆ
قاسىم-جومارت توقايەۆ بەينەۇندەۋدە جيىنعا قاتىسۋشىلاردى IV قىتاي حالىقارالىق يمپورتتىق تاۋارلار كورمەسىنىڭ اشىلۋىمەن قۇتتىقتادى.
«بيىل ءبىزدىڭ دوستاس حالىقتارىمىز ءوز تاريحىنداعى ماڭىزدى بەلەسكە جەتتى. قازاقستان تاۋەلسىزدىگىنە - 30 جىل. قىتاي كوممۋنيستىك پارتياسىنىڭ قۇرىلعانىنا - 100 جىل. سونداي-اق، ەكى ايدان كەيىن تاعى ءبىر ايتۋلى وقيعانى اتاپ وتەمىز. قازاقستان مەن قىتاي اراسىندا ديپلوماتيالىق قاتىناستاردىڭ ورناعانىنا 30 جىل تولادى. بۇگىن ءبىزدىڭ جان-جاقتى ءارى ماڭگىلىك ستراتەگيالىق سەرىكتەستىگىمىز كەمەلدەنىپ، جاڭا كەزەڭگە قادام باستى دەپ نىق سەنىممەن ايتا الامىن. قارقىندى دامىپ كەلە جاتقان قىتاي ەلى ءاردايىم ازياداعى ەڭ باستى جانە سەنىمدى سەرىكتەسىمىز بولىپ قالا بەرەدى»، - دەدى قازاقستان پرەزيدەنتى.
مەملەكەت باسشىسى ءوزارا ءتيىمدى ەكىجاقتى ىنتىماقتاستىق كەڭ-بايتاق ەۋرازيا قۇرلىعىندا بىرلەسە دامۋعا جانە وركەندەۋگە جول اشىپ وتىرعانىنا، ساۋدا- ەكونوميكالىق قاتىناستار - ىقپالداستىعىمىزدىڭ بەرىك ىرگەتاسى ەكەنىنە توقتالىپ، الداعى كەزەڭدە سولاي بولا بەرەتىنىن ايتتى.
«قيىندىققا قاراماستان، كۇردەلى 2020 -جىلدىڭ وزىندە ەكىجاقتى تاۋار اينالىمى 5 پايىزعا ءوسىپ، 15 ميلليارد دوللاردان استى. «وزگەرىستەر جەلى سوققاندا، بىرەۋلەر قابىرعا تۇرعىزادى، ەندى بىرەۋلەر جەل ديىرمەن سالادى»، - دەگەن كونە قىتاي ناقىلى بار. پاندەمياعا بايلانىستى قازاقستان- قىتاي شەكاراسىنا ەنگىزىلگەن ۋاقىتشا شەكتەۋ شارالارى تەزىرەك اياقتالىپ، الىس-بەرىس قايتادان جاندانا تۇسەدى دەپ سەنەمىز»، - دەدى قاسىم-جومارت توقايەۆ.
قازاقستان پرەزيدەنتى قۇتتىقتاۋ سوزىندە ساۋدا- ساتتىق ءاردايىم وركەندەۋدىڭ جانە حالىقارالىق ىنتىماقتاستىقتىڭ باستى قوزعاۋشى كۇشى سانالاتىنىن، بۇل قاعيدات عاسىرلار بويى ۇلى جىبەك جولىنىڭ بويىندا ورنالاسقان ءبىزدىڭ ءوڭىر ءۇشىن دە اسا ماڭىزدى ەكەنىن ايتتى.
«وسى ەجەلگى ساۋدا جولى ءتوراعا شي جينپيڭنىڭ «بەلدەۋلەر مەن جولدار» اتتى اۋقىمدى باستاماسىنىڭ ارقاسىندا قايتا جاڭعىردى. قازىر جىل سايىن قىتايدان ەۋروپاعا قازاقستان اۋماعى ارقىلى 500 مىڭنان استام كونتەينەر تاسىمالدانادى. قۇرىق تەڭىز ايلاعى ىسكە قوسىلعاننان كەيىن «ليانيۋنگان - كارس» تاسىمال دالىزىمەن قورعاستان ىستانبۇلعا جۇك جەتكىزۋ مەرزىمى بەس ەسەگە، ياعني 60 كۇننەن 13 كۇنگە دەيىن قىسقاردى. ءبىز قورعاستان بولەك، ءبىرقاتار كورشىلەس ەلدەرمەن جاڭا شەكاراارالىق حاب قۇرىپ جاتىرمىز»، - دەپ اتاپ ءوتتى مەملەكەت باسشىسى.
قاسىم-جومارت توقايەۆ بۇكىل الەمدى شارپىعان كوروناۆيرۋس ىندەتى جاھاندىق ساۋدا جەلىسىنىڭ جۇمىسىنا ايتارلىقتاي نۇقسان كەلتىرگەنىنە توقتالدى. سونداي-اق قازاقستان تۇراقتى ترانزيتتىك تاسىمال باعدارىن نىعايتىپ، ونى ءارتاراپتاندىرىپ، يننوۆاتسيالىق لوگيستيكالىق ءادىس- تاسىلدەردى ەنگىزۋ ءۇشىن بارلىق مۇددەلى تاراپپەن تىعىز جۇمىس جۇرگىزە بەرەتىنىن ايتتى.
«بۇگىن ەسىگىن ايقارا اشقان قىتاي حالىقارالىق يمپورتتىق تاۋارلار كورمەسى، شىن مانىندە، دۇنيەجۇزىنىڭ ءار تۇكپىرىندەگى ەكسپورتشىلاردى ۇيىستىراتىن ورتالىققا اينالدى. وسى ماڭىزدى شاراعا 120 دان استام مەملەكەتتەن تاۋار وندىرۋشىلەر جينالىپ وتىر. بۇل شانحاي كورمەسى قىتايداعى الىپ نارىققا كىرەتىن «التىن قاقپا» ەكەنىن ايقىن كورسەتتى. وسى كورمەگە قازاقستاننان 30 ءىرى ءونىم ءوندىرۋشى قاتىسۋدا. ولار جالپى قۇنى 100 ميلليون دوللاردان اساتىن ازىق- تۇلىك جانە اۋىل شارۋاشىلىعى ونىمدەرىن ساتۋعا كەلىسىمشارت جاسايدى دەپ جوسپارلانىپ وتىر»، - دەدى قازاقستان پرەزيدەنتى.
قازاقستان پرەزيدەنتى ءسوزىن قورىتىندىلاي كەلە، شانحاي كورمەسىنە قاتىسۋشىلاردىڭ جۇمىسىنا تابىس تىلەپ، ءوزارا ءتيىمدى ساۋدا بايلانىستارى كوكجيەگىنىڭ كەڭەيە بەرۋىنە نيەتتەستىك ءبىلدىردى.