راقىمشىلىق اياسىندا كامەلەتكە تولماعاندار تۇرمەدەن نەگە بوساتىلمايدى
پارلامەنت ءماجىلىسىنىڭ پلەنارلىق وتىرىسىندا «قازاقستان رەسپۋبليكاسى تاۋەلسىزدىگىنىڭ 30 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن تانىستىرعان ىشكى ىستەر ءمينيسترى ەرلان تۇرعىمبايەۆقا دەپۋتات جاننا تەلپەكبايەۆا كامەلەتكە تولماعان سوتتالۋشىلارعا راقىمشىلىق جاساۋ ماسەلەسى بويىنشا سۇراق قويدى.
«بۇگىندە بىزدە الماتى قالاسىندا كامەلەكەت تولماعانداردىڭ جازاسىن وتەۋگە ارنالعان جالعىز مەكەمە بار. وندا كامەلەتكە تولماعان 52 جاس قاماۋدا وتىر. ولاردىڭ ءبارى اسا اۋىر جانە اۋىر قىلمىس جاساعانى ءۇشىن سوتتالعان. سوندىقتان ولاردىڭ ەشبىرى راقىمشىلىققا جاتپايدى. تەك كامەلەتكە تولماعان 12 سوتتالۋشىنىڭ ءتارتىبى مەن جاساعان قىلمىسىنىڭ اۋىرلىعىنا بايلانىستى جازا مەرزىمى جارتىلاي نەمەسە ۇشتەن بىرىنە قىسقارتىلادى. ولاردىڭ ەشبىرى قاماۋ ورنىنان بوساتىلمايدى»، - دەدى مينيستر.
ايتا كەتەيىك، ءماجىلىس اتالمىش زاڭ جوباسىن ماقۇلدادى.
«بيىل ەگەمەن ەلىمىز ءۇشىن ەلەۋلى كەزەڭ. وسىعان وراي مەملەكەت باسشىسىنىڭ تاپسىرماسىمەن قازاقستان رەسپۋبليكاسى تاۋەلسىزدىگىنىڭ 30 جىلدىعىنا بايلانىستى راقىمشىلىق جاساۋ تۋرالى زاڭ جوباسى ازىرلەنىپ، بۇگىن ماقۇلدانىپ وتىر. ارينە، راقىمشىلىق مەملەكەت تاراپىنان جاسالىپ وتىرعان ىزگى جانە سەنىم شاراسى. سوندىقتان بۇل جولى دا الدىمەن مەملەكەتتىڭ جانە ازاماتتاردىڭ قاۋىپسىزدىگىنە قاۋىپ كەلتىرمەيتىن قىلمىس جاساعاندار بوساتىلادى. سونىمەن بىرگە وسى زاڭ جوباسىندا العاش رەت الەۋمەتتىك تومەن توپقا ەرەكشە نازار اۋدارىلىپ وتىر»، - دەدى ءماجىلىس ءتوراعاسى نۇرلان نىعماتۋلين.
اۆتور: ەسىمجان ناقتىباي