قاراعاندىداداعى «اباي» تىگىن فابريكاسى قايتا جانداندى
جۇزگە جۋىق ادام جۇمىسقا ورنالاستى. بۇعان دەيىن تەك ارنايى كيىم تىككەن كاسىپورىن ەندى كوپشىلىككە ارنالعان ءونىم شىعاراتىن بولدى. ءبىراق پاندەميا سالدارىنان تاپسىرىس بەرگەن ماتالارى قىتايدا تۇرىپ قالعان. بۇل كاسىپكە قول بايلاۋ بولىپ تۇر دەيدى ماماندار.
كوپ جىلدان بەرى قاڭىراپ بوس قالعان بۇل عيماراتتىڭ ىشىندە قايتادان قىزۋ جۇمىس جۇرەدى دەگەنگە و باستا ەشكىم سەنبەگەن. ءبىراق فابريكا باسشىسى نۇرحان جۇمابەكوۆ ەسىك- تەرەزەسىز قالعان فابريكانى قالىپقا كەلتىرۋگە بەل بايلايدى. وسىلايشا الدىمەن قۇجاتتىڭ قيىندىقتارىن، ارتىنشا قۇرىلىس ماسەلەسىن رەتتەدى. ەندى كادر ماسەلەسىن شەشۋگە كىرىسكەن.
نۇرحان جۇمابەكوۆ، «اباي» تىگىن فابريكاسىنىڭ باسشىسى:
- كوللەدجدە جاڭا تىگىنشىلەر ءبولىمى اشىلدى. ەندى بىزدە 80 پروتسەنت پراكتيكا بولادى. مىسالى، قازىر بىزگە 50 تىگىنشى كەرەك. ءبىر اۋىسىم بوس تۇر دەۋگە بولادى. تاپسىرىس كوپ بار، تىگىنشى جوق. اباي قالاسى قاراعاندىدان شامامەن 25 شاقىرىم جەردە. وسىعان قاراماستان وبلىس ورتالىعىنان كەلىپ جۇمىس ىستەگىسى كەلەتىندەر از. ەسەسىنە تىگىن فابريكانىڭ قۇراستىرۋشى- ديزاينەرى الماتى قالاسىنان كەلىپ جۇمىس ىستەپ ءجۇر. باس- اياعى مۇندا 85 تىگىنشى بار.
ءماريام ەرعالي، «اباي» تىگىن فابريكاسىنىڭ قۇراستىرۋشى- ديزاينەرى:
- وتە ۇلكەن مۇمكىندىكتەر بار، وزىمە ۇنايتىن كيىمدەر جاساۋعا بولادى. ماتالاردى تاڭداپ، سوعان قاتىستى ۇلگىلەردى جاڭادان ويلاستىرىپ، سونى كومپيۋتەردە قۇراستىرعان وزىمە وتە قىزىقتى. فابريكا ءونىمىنىڭ 85 پروتسەنتى ارنايى كيىم بولاتىن. ەندى قاراپايىم حالىققا ارناپ كيىم تىگۋدى قولعا الدى.
فابريكا جانىنان ارنايى دۇكەن اشىلىپتى. وعان كورشىلەس قالالاردان كەلىپ كيىنەتىندەر بار.
قايرات شەكتىبايەۆ، قاراعاندى قالاسىنىڭ تۇرعىنى:
- ماعان كيىم تىگىلگەن ماتانىڭ ساپاسى ۇنادى. ونىڭ ۇستىنە وتاندىق ءوندىرۋشى بولعاننان كەيىن ازدا بولسا قولداۋ كوررسەتكىم كەلەدى. ءوزىم اباي قالاسىندا تۋعام، سوندىقتان بۇل فابريكا ماعان ىستىق دەسەم دە بولادى. وسى سەبەپتى قاراعاندىدان ارنايى كەلدىم.
فابريكا جاقىن ارادا قىستىڭ كيىمدەرىن تىگۋگە كىرىسپەك. ءبىراق پاندەميا سالدارىنان تاپسىرىس بەرگەن ماتالارى قىتايدا تۇرىپ قالعان، ال ماتالار ەۋروپا مەن وزبەكستانعا ەش توقتاۋسىز جەتكىزىلۋدە. بۇل زاۋىتتىڭ تاپسىرىسى نە سەبەپتى تۇرالاپ قالعانى بەلگىسىز. سوندىقتان زاۋىت وكىلدەرى جاۋاپتى مامانداردان كومەك سۇراپ وتىر.
www.24.kz