حالىقارالىق انيماتسيالىق فيلمدەر كينوفەستيۆالى تۇركىستاندا وتەدى
بيىل ءۇشىنشى رەت ۇيىمداستىرىلاتىن حالىقارالىق شاراعا وتاندىق جانە باۋىرلاس تۇركى، ورتاازيالىق ەلدەردىڭ، اتاپ ايتقاندا تۇركيا، ازەربايجان، قىرعىزستان، وزبەكستان، تاجىكستان، سونداي- اق رەسەيدەگى باشقورتستان مەن تاتارستاننىڭ بىلىكتى مۋلتيپليكاتورلارى قاتىسادى.
بايقاۋعا انيماتسيا سالاسىندا بەلگىلى مامانداردان قۇرىلعان حالىقارالىق قازىلار القاسى تورەلىك ەتەدى. جەڭىمپازدار بىرنەشە نوميناتسيا بويىنشا ماراپاتتالادى.
بۇدان بولەك، فەستيۆال اياسىندا شەتەلدىك وزىق مۋلتيپليكاتورلاردىڭ شەبەرلىك ساباقتارى مەن ترەنينگتەرى جوسپارلانعان. قاتىسۋشىلار الەمگە تانىمال 4 ماماننىڭ ءدارىسىن تىڭداپ، كاسىبي شەبەرلىگىن شىڭداۋعا مۇمكىندىك الادى.
سونداي- اق، فەستيۆال قوناقتارى قازاقستاننىڭ ۇزدىك انيماتسيالىق كينوستۋديالارى كورمەسىن تاماشالايدى. وندا كينوستۋديالار انيماتسيا جاساۋدىڭ قىر- سىرى مەن ەرەكشەلىكتەرىن كورسەتىپ، جاس ماماندار ءۇشىن تاجىريبە الماسۋ الاڭىن ۇيىمداستىرادى.
باعدارلاما بويىنشا، ءىس- شارانىڭ ەكىنشى كۇنى تۇركى ەلدەرىندەگى كينو ونەرىنىڭ دامۋ باعىتتارىنا، بۇگىنى مەن ەرتەڭىنە ارنالعان دوڭگەلەك ۇستەل وتەدى. شەتەلدىك جانە وتاندىق انيماتسيا سالاسىنىڭ ماماندارى ءوزارا بايلانىس ورناتىپ قانا قويماي، وزەكتى تاقىرىپتاردا پىكىر الماسىپ، تۇركىتىلدەس ەلدەردىڭ انيماتسيا سالاسىنداعى ىنتىماقتاستىعىنا جاڭا سەرپىن بەرمەك. قازاقستان تاۋەلسىزدىگىنىڭ 30 جىلدىعىنا ورايلاستىرىلعان فەستيۆالدىڭ بيىل تۇركى دۇنيەسىنىڭ رۋحاني استاناسى - تۇركىستان قالاسىندا ءوتۋى دە ايرىقشا مانگە يە.
ۇيىمداستىرۋشىلار شاھار تۇرعىندارى مەن قوناقتارىنا مەرەيتوي قارساڭىندا ايرىقشا سىي جاساماق. تۇركىستاندىقتار ەكى كۇن قاتارىنان قالاداعى ەڭ ۇزدىك كينوزالداردان ەلىمىزدىڭ جانە تۇركى ەلدەرىنىڭ ەڭ ۇزدىك انيماتسيالىق فيلمدەرىن تەگىن تاماشالايدى.
ءداستۇرلى فەستيۆالدى OzgeEpic زاماناۋي ونەر كەڭىستىگى مەن قازاقستان انيماتسيالىق كينوستۋديالار قاۋىمداستىعى اقپارات جانە قوعامدىق دامۋ مينيسترلىگىنىڭ قولداۋىمەن ۇيىمداستىرادى.