ۇلكەن الماتى جاعالاۋى اباتتاندىرىلادى
«سەلدەن قورعاۋ بوگەتىنەن ءال- فارابي داڭعىلىنا دەيىن جانە ودان ءارى اباي داڭعىلىنا دەيىن ۇلكەن الماتى وزەنىنىڭ سۋ قورعاۋ بەلدەۋى مەن ارناسىن رەكونسترۋكتسيالاۋدى الداعى جىلعا جوسپارلاپ وتىرمىز»، - دەدى باقىتجان ساعىنتايەۆ «الماتى» تەلەارناسىنداعى تىكەلەي ەفير بارىسىندا.
جالپى 2 جىل ىشىندە 84 نىسان اباتتاندىرىلدى. بىلتىر «قاراسۋ» شاعىن اۋداندا جاڭا رەكرەاتسيالىق ايماقتىڭ قۇرىلىسى جۇرگىزىلدى. «جەلتوقسان»، «درۋجبا» ساياباقتارى، «جەتىسۋ-3» شاعىن اۋدانىنداعى سكۆەر، «يۋجنىي» ساياباعى اباتتاندىرىلدى. 2021 -جىلى «ماياك» توعايى، «كوكمايسا» شاعىن اۋدانداعى ەسەنتاي وزەنىنىڭ جاعالاۋى، تاۋلى قىرات شاعىن اۋدانىنداعى ۋچاسكە اباتتاندىرىلدى، ءا. قاستەيەۆ مۋزەيى الدىنداعى فونتان، اباي اتىنداعى وپەرا جانە بالەت تەاترى ماڭىنداعى سكۆەر، تەررەنكۋر جانە جاربۇلاق، تىكساي وزەندەرىنىڭ ارنالارى اباتتاندىرىلدى.
الداعى ۋاقىتتا ك. بايسەيىتوۆا كوشەسىنىڭ بويىنداعى جاياۋ جۇرگىنشىلەر (جامبىل كوشەسىنەن ساتبايەۆ كوشەسىنە دەيىن) ايماعىن، قازاق- بريتان تەحنيكالىق ۋنيۆەرسيتەتىنىڭ ساياباعىن اباتتاندىرۋ جانە كوگالداندىرۋ كوزدەلگەن.