ەلوردا اۋەجايىندا اۆياوتىن تاۋسىلدى - كەي ۇشاقتار ۇشپاۋى مۇمكىن
قازىر استانالىق اۋەجايدا اۋە كومپانيالارى ءۇشىن، ءتىپتى تۇراقتى جولاۋشىلار رەيستەرى ءۇشىن دە اۆياكەروسينمەن ۇزدىكسىز قامتاماسىز ەتۋدە ولقىلىق بار، دەپ حابارلايدى قازاقپارات.
«بيىلعى قىركۇيەك جانە قازان ايلارىندا قازاقستاندا وتىن تاپشىلىعىنا بايلانىستى كۇردەلى جاعداي بايقالدى. قازاقستاننىڭ ءىرى رەسۋرس ۇستاۋشىلارى مەن جەتكىزۋشىلەرى اۆياوتىندى ۋاقىتىلى جەتكىزە الماي وتىر، بۇل قازىرگى ۋاقىتتا اۋەجايدىڭ وڭىرلىك كولىك تورابى رەتىندە قالىپتى جۇمىس ىستەۋىنە كەرى اسەرىن تيگىزۋدە. ماسەلەن، قازىر رەسەي فەدەراتسياسىنىڭ ءونىم جەتكىزۋشىلەرى ءبىرقاتار سەبەپتەرگە، ونىڭ ىشىندە ىشكى سۇرانىستىڭ ارتۋىنا بايلانىستى قازاقستانعا اۆياوتىن جەتكىزۋدەن باس تارتتى»، - دەدى «نۇرسۇلتان نازاربايەۆ حالىقارالىق اۋەجايى» ا ق باسپا ءسوز حاتشىسى ءانۋار شالەكەنوۆ.
نۇر-سۇلتان اۋەجايى اۆياوتىن جەتكىزۋ تۋرالى قاتاڭ كەلىسىمشارتتاردىڭ جوقتىعىن، سونداي-اق وتىننىڭ قاجەتتى كولەمىنىڭ جەتكىزىلمەۋىنەن بولعان قيىن جاعدايدى جانە اۋەجايداعى بار رەزەرۆتىڭ ءىس جۇزىندە جۇمسالعانىن ەسكەرىپ، جولاۋشىلاردان الداعى ۋاقىتتاردا بولۋى ىقتيمال پروبلەمالارعا تۇسىنىستىكپەن قاراۋدى سۇرايدى.
قىركۇيەك پەن قازان ايلارىندا تاپشىلىق پەن باعانىڭ كۇرت وسۋىنە بايلانىستى 14 مىڭ توننا اۆياوتىن جەتكىزىلمەگەن. وسىعان بايلانىستى بۇگىنگى تاڭدا رەزەرۆتەر تاۋسىلعان.
«قاراشا ايىندا بىردە-ءبىر جەتكىزۋشى اۆياوتىن جەتكىزۋ كولەمىن راستامادى. جاڭا كەلىسىمشارتتار بويىنشا ەڭ جاقىن اراداعى جەتكىزۋ 15 - قاراشادا بولۋى مۇمكىن. ءبىز جۇك رەيستەرىنە جانارماي قۇيۋعا شەكتەۋلەر ەنگىزدىك جانە جاقىندا ولاردى مۇلدەم قابىلداماۋعا ءماجبۇر بولامىز. سودان كەيىن بۇل اۆياكومپانيالاردى قازاقستانعا كەرى قايتارا المايمىز»، - دەيدى ءانۋار شالەكەنوۆ.