توقايەۆ سيفرلاندىرۋ ىسىنە جاۋاپتى ۆيتسە-مينيسترلەر جۇمىسىن سىنعا الدى

None
None
نۇر-سۇلتان. قازاقپارات - ءداستۇرلى «Digital Bridge « حالىقارالىق تەحنولوگيالىق فورۋمىندا مەملەكەت باسشىسى پرەزيدەنت قاسىم-جومارت توقايەۆ سيفرلاندىرۋ ىسىنە جاۋاپتى ۆيتسە-مينيسترلەر جۇمىسىنىڭ ناتيجەلىلىگىن سىنعا الدى، دەپ حابارلايدى قازاقپارات.

مەملەكەت باسشىسىنىڭ ايتۋىنشا، ولاردىڭ باستى مىندەتى - كۇندەلىكتى بيۋروكراتيالىق جۇمىس ەمەس، سيفرلىق رەفورمالار مەن وزگەرىستەردى جۇزەگە اسىرۋ. وسىعان بايلانىستى پرەزيدەنت جىل سوڭىنا دەيىن سيفرلاندىرۋعا جاۋاپتى ءاربىر ۆيتسە-مينيستر ءۇشىن ناقتى KPI ازىرلەۋدى تالاپ ەتتى جانە پرەمەر-مينيسترگە ولاردىڭ قىزمەتىنە قاتىستى ۇستانىمدى قايتا قاراۋدى، كادرلىق قۇرامىنا باعا بەرۋدى تاپسىردى.

قاسىم-جومارت توقايەۆتىڭ پىكىرىنشە، بيزنەس- قوعامداستىق اتسالىسپاي، جالپى مەملەكەتتىك «سيفرلىق سەكىرىس» جاساۋ مۇمكىن ەمەس، ال كومپانيالاردىڭ باسەكەگە قابىلەتتىلىگى ولاردىڭ سيفرلاندىرىلۋ دەڭگەيىمەن انىقتالادى.

«Siemens» كومپانياسىنىڭ باعالاۋى بويىنشا، وتاندىق ونەركاسىپتىك كاسىپورىنداردىڭ 80 پايىزىندا اۆتوماتتاندىرۋ دەڭگەيى وتە تومەن، ياعني يندۋستريا 2.0 دەڭگەيىندە.

ەستەرىڭىزگە سالا كەتەيىن، ءبىز يندۋستريا 4.0 داۋىرىندە ءومىر ءسۇرىپ جاتىرمىز. بۇل - اسا اۋقىمدى ماسەلە. ونىڭ تالاپتارىنا تۇجىرىمدامالىق جاعىنان دا، پراكتيكالىق تۇرعىدان دا ناقتى ءارى لايىقتى جاۋاپ بەرۋ كەرەك. سيفرلىق شەشىمدەردى قولداۋدىڭ ءتيىمدى قۇرالدارىن، ەڭ الدىمەن، وڭدەۋ سەكتورىندا كەڭەيتۋ كەرەك»، - دەدى مەملەكەت باسشىسى.

ەسكە سالساق، مەملەكەت باسشىسى قاسىم-جومارت توقايەۆ «Digital Era Lifestyle « تاقىرىبىندا وتكەن ءداستۇرلى «Digital Bridge « حالىقارالىق تەحنولوگيالىق فورۋمىنا قاتىستى.

سوڭعى جاڭالىقتار