جەلىدە اۋىل ماڭىندا جۇرگەن سىلەۋسىننىڭ ۆيدەوسى تارادى

پەتروپاۆل. قازاقپارات - سولتۇستىك قازاقستان وبلىسىندا ءوندىرىس اۋىلىنىڭ تۇرعىندارى ەلدى مەكەن ماڭىنداعى القاپتا جۇرگەن سىلەۋسىندى ۇيالى تەلەفونعا ءتۇسىرىپ الدى.

جابايى اڭ بۇل وڭىردە سيرەك كەزدەسەدى، دەپ حابارلايدى قازاقپارات ءتىلشىسى.

سىلەۋسىندى س ق و تۇرعىندارى ءۋاليحانوۆ اۋدانى ءوندرىس اۋىلىنىڭ ماڭىنداعى القاپتا كەزدەستىرگەن.

بەينەجازبادا جابايى اڭ اۋىر دەمالادى. ونى كورگەن جەلى قولدانۋشىلارى سىلەۋسىننىڭ ءومىرى ءۇشىن قورقىپ، ۋايىمدارىن ءبىلدىردى.

س ق و تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ جانۋارلار الەمى، بالىق رەسۋرسى ءبولىمى باسشىسىنىڭ مىندەتىن اتقارۋشى ميحايل نيكيتيننىڭ ايتۋىنشا، وڭىردە سىلەۋسىن كەزدەسەدى.

سوڭعى ەسەپ بويىنشا شال اقىن جانە ايىرتاۋ اۋدانىنداعى ۇلتتىق پارك اۋماعىندا 12 ءسى ءجۇر. ال بۇل بەينەجازباداعى جابايى اڭ رەسەيدەن نەمەسە كورشى پاۆلودار وبلىسىنان كەلۋى مۇمكىن.