فۋتبولدان قازاقستان كۋبوگى: «شاحتەر» جارتىلاي فينالعا شىقتى

نۇر-سۇلتان. قازاقپارات - فۋتبولدان قازاقستان كۋبوگى جارتىلاي فينالىنا شىققان تاعى ءبىر كوماندا انىقتالدى، دەپ حابارلايدى قازاقپارات ءتىلشىسى.

مۇنداي مۇمكىندىككە قاراعاندىنىڭ «شاحتەرى» يە بولدى. قاراعاندىلىق كلۋب بۇگىن ءوز الاڭىندا «تارازدان» 3:1 ەسەبىمەن باسىم ءتۇستى.

الاڭ يەلەرى قاتارىنان داۆيد اتاناسكوسكي 27، مارتين توشيەۆ 60، ايدوس تاتتىبايەۆ 90-مينۋتتاردا مەرگەندىك تانىتسا، وعان 39-مينۋتتا تارازدىق الىشەر سۇلەي ءبىر گولمەن جاۋاپ قايىردى.

ەندى ولار جارتىلاي فينالدا 6- جانە 20- قاراشا كۇندەرى «توبىل» كومانداسىمەن كەزدەسەدى.

قوستانايلىق كلۋب شيرەك فينالدا «قىزىلجار» (پەتروپاۆل) كلۋبىن (1:0، 1:0) قاپى قالدىرىپ كەتتى. سونداي-اق، بۇگىن قىزىلوردادا «قايسار» ەلوردا ۋاقىتىمەن19.00 دە الماتىنىڭ «قايراتىمەن» كەزدەسەدى.

العاشقى ويىندا الماتىلىقتار 3:0 ەسەبىمەن باسىم ءتۇستى. بۇل جۇپتىڭ جەڭىمپازى جارتىلاي فينالدا «استانامەن» شەبەرلىك بايقاسادى.