شەتەلدەگى قازاق ءتىلدى ب ا ق- پەن تاجىريبە الماسۋدى جولعا قويۋ كەرەك - ەلدوس ناشيرالي
«تاۋەلسىزدىگىمىزدىڭ ارقاسىندا شەتەلدەگى قانداستارىمىزدى ەلگە اكەلۋمەن قاتار، ونداعى جۇرتشىلىقپەن تىعىز بايلانىس ورناتۋدىڭ مۇمكىندىگى تۋدى. وسى ورايدا «وتانداستار قورىنىڭ» باسشىلىعىنا العىس ايتامىز.
بۇگىن قۇرىلىپ وتىرعان شەتەلدەگى قازاق ءتىلدى ب ا ق اسسوتسياتسيا قىزمەتىنە قاتىستى بىرنەشە ۇسىنىس بار. سونىڭ ءبىرىنشىسى، وتاندىق جانە شەتەلدەگى قازاق ءتىلدى ب ا ق وكىلدەرىنىڭ ءوزارا تاجىريبە الماسۋ جاعى قاراستىرىلسا. شەتەلدەگى ارىپتەستەرىمىز ەلگە كەلىپ، ءوز تاجىريبەلەرىمەن بولىسسە، تيىسىنشە ءبىز ولارمەن بولىسە وتىرساق دەگەن نيەت بار. نەمەسە ونلاين ۇيىمداستىرۋعا دا بولادى. ەكىنشى ۇسىنىس، بىرنەشە جىل بولدى «قازاقپارات» اگەنتتىگىنىڭ سايتىنا اپتا سايىن «شەتەلدەگى قازاقءتىلدى ب ا ق جۇمىسىنا شولۋ» شىعىپ تۇرادى. قازىرگى تاڭدا شەتەلدە قازاق ءتىلدى 88 ب ا ق- تىڭ جۇمىس ىستەپ تۇرعانى جاڭا عانا ايتىلدى. وسى ورايدا سول ب ا ق- تارمەن ءوزارا اقپارات الماسۋ جاعىن العا قويساق»، - دەدى ەلدوس ناشيرالي شەتەلدەگى قازاق ءتىلدى ب ا ق اسسوتسياتسياسىنىڭ قۇرىلۋىنا ارنالعان شارادا.
سونداي- اق باسقارما ءتوراعاسى «وتانداستار قورىنىڭ» سايتىندا ارنايى ايدار اشۋ يدەياسىن دا ۇسىندى.
«كەلەسى ماسەلە، ءبىزدىڭ بىلۋىمىزشە موڭعوليا، وزبەكستان ەلدەرىندەگى قازاق ءتىلدى ب ا ق- تىڭ سايتى جوق. بۇل وسىدان 2 جىل بۇرىن تالقىلانعان ماسەلە. وسى ورايدا اتالعان ەلدەردەگى ب ا ق- تىڭ ينتەرنەت- پاراقشالارىن اشۋعا قول ۇشىمىزدى سوزىپ، سەپتىگىمىزدى تيگىزسەك دەگەن ۇسىنىس بار»، - دەيدى ول.
ايتا كەتەيىك، بۇگىن قازاقستاندا شەتەلدەگى قازاق ءتىلدى بۇقارالىق اقپارات قۇرالدارىنىڭ باسىن بىرىكتىرگەن اسسوتسياتسيا قۇرىلدى.
اتالعان قوعامدىق ۇيىمعا قر پارلامەنتى سەناتىنىڭ دەپۋتاتى نۇرتورە ءجۇسىپ ءتوراعالىق ەتەدى.
اۆتور: ءالي يبرايەۆ