مەملەكەت باسشىسى اتىراۋ وبلىسىنىڭ اكىمىن قابىلدادى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ اتىراۋ وبلىسىنىڭ اكىمى ماحامبەت دوسمۇحامبەتوۆتى قابىلدادى، دەپ حابارلايدى اقوردا.

قاسىم- جومارت توقايەۆقا اتىراۋ وبلىسىنىڭ الەۋمەتتىك- ەكونوميكالىق دامۋىنىڭ بيىلعى 9 ايداعى قورىتىندىسى باياندالدى. ماحامبەت دوسمۇحامبەتوۆتىڭ ايتۋىنشا، وبلىستاعى وڭدەۋ ونەركاسىبىندە، قۇرىلىس، اۋىل شارۋاشىلىعى، شاعىن جانە ورتا بيزنەس پەن وزگە دە سالالاردا ءوسىم بايقالادى. ايماق جان باسىنا شاققانداعى جالپى وڭىرلىك ءونىم، ينۆەستيتسيا جانە قۇرىلىس جۇمىستارىنىڭ كولەمى جاعىنان رەسپۋبليكا بويىنشا ءبىرىنشى ورىنعا شىققان.

بيىل 19 مىڭداي جاڭا جۇمىس ورنى اشىلعان، جۇمىسپەن قامتۋ ورتالىعى ارقىلى 20864 ادام جۇمىسقا ورنالاستىرىلعان. ال بۇگىنگە دەيىن « ەڭبەك» باعدارلاماسى اياسىندا 24348 ادام جۇمىسپەن قامتىلعان. بيىلعى 9 ايدا 4882 پاتەرلى 646,3 مىڭ شارشى مەتر تۇرعىن ءۇي پايدالانۋعا بەرىلگەن. بۇل 2020 - جىلمەن سالىستىرعاندا 41,6 پايىزعا كوپ.

مەملەكەت باسشىسىنا « جاسىل» ايماقتاعى وبلىستىڭ ەپيدەميولوگيالىق احۋالى جانە ۆاكتسينالاۋ جۇمىستارى تۋرالى اقپارات بەرىلدى.

بۇدان بولەك، وبلىس اكىمى ەكولوگيا سالاسى مەن كوگالداندىرۋعا قاتىستى اتقارىلىپ جاتقان جۇمىستار جونىندە باياندادى. 2025 - جىلعا دەيىن ەلدى مەكەندەردە 540 مىڭ كوشەت وتىرعىزۋ جۇمىستارى باستالعان.

سونىمەن قاتار وبلىس اكىمى پرەزيدەنتتىڭ تاپسىرماسى بويىنشا اتىراۋ وبلىسىن الەۋمەتتىك- ەكونوميكالىق تۇرعىدان دامىتۋ جونىندەگى 2021-2025 - جىلدارعا ارنالعان كەشەندى جوسپاردىڭ جۇزەگە اسىرىلۋ بارىسى تۋرالى ەسەپ بەردى. جوسپار جۋىردا بەكىتىلگەن. بۇل ماڭىزدى قۇجات قوردالانعان پروبلەمالاردى شەشە وتىرىپ، ءوڭىردىڭ دامۋىنا تىڭ سەرپىن بەرەدى.

قاسىم- جومارت توقايەۆ ماحامبەت دوسمۇحامبەتوۆكە ايماقتا اتقارىلىپ جاتقان جۇمىستاردى جالعاستىرۋدى تاپسىردى.