يلون ماسك الەم تاريحىنداعى ەڭ باي ادام بولدى
Forbes دۇيسەنبى كۇنگى قور بيرجاسىنىڭ جابىلۋىندا ماسك اكتيۆتەرىنىڭ تازا قۇنىن 271,3 ميلليارد دوللارعا باعالادى، بۇل Tesla اكسيالارىنىڭ 13 پايىزعا قىمباتتاۋىنا بايلانىستى جۇما كۇنگى جابىلۋمەن سالىستىرعاندا شامامەن 41,7 ميلليارد دوللارعا كوپ. ونىڭ تازا كاپيتالى ءبىر كۇندە 41 ميلليارد دوللاردان استام ءوستى. يلون ماسكتىڭ داۋلەتى 300 ميلليارد دوللارعا جاقىندادى.
ال سالىستىرا كەتسەك، Amazon كومپانياسىنىڭ نەگىزىن قالاۋشى جانە بۇرىنعى باس ديرەكتورى دجەفف بەزوس وسى ايدىڭ باسىندا Forbes 400 نۇسقاسى بويىنشا امەريكانىڭ ەڭ باي ادامدارىنىڭ رەيتينگىسىندە كوش باستاعان بولاتىن. ونىڭ بايلىعى 201 ميلليارد دوللارعا باعالاندى. شىلدەدە بەزوستىڭ داۋلەتى 212 ميلليارد دوللاردان استى.
ايتا كەتەرلىگى، Forbes العاش رەت 1982 -جىلى ميللياردەرلەردىڭ داۋلەتىن باقىلاي باستادى. سول كەزدە امەريكاداعى ەڭ باي ادام كەمە ماگناتى دەنيەل ليۋدۆيگ بولدى، ونىڭ بايلىعى 2 ميلليارد دوللار نەمەسە قازىرگى باعامەن 5,5 ميلليارد دوللار بولعان ەدى. Tesla-داعى ماسكتىڭ 21 پايىزدىق ۇلەسى (نەسيەلىك مىندەتتەمەلەردى ەسەپكە الماعاندا) ونىڭ بايلىعىنىڭ نەگىزگى بولىگى، ءبىراق ول 2002 -جىلى قۇرىلعان جەكە SpaceX كومپانياسىندا مينوريتارلىق ۇلەسكە يە. جاقىندا بيزنەستى ينۆەستورلار 74 ميلليارد دوللارعا باعالادى.
وڭتۇستىك افريكادا تۋعان ميللياردەر ءوز بايلىعىنا قاراماستان، سالىستىرمالى تۇردە قاراپايىم جاعدايدا تۇرىپ جاتىر. ماسكتىڭ نەگىزگى رەزيدەنسياسى تەحاس شتاتىنىڭ بوكا- چيكا قالاسىندا كولەمى ءبىر بولمەلى پاتەردەي عانا ءۇيدى جالعا العان. سول شتاتتا SpaceX ءوزىنىڭ Starships عارىش كەمەسىن شىعارادى. ماسك تەحاستا ءبىرجولا قونىستانۋى مۇمكىن.
قازان ايىنىڭ باسىندا Tesla-نىڭ شتاب پاتەرىن پالو- التودان وستينگە كوشىرۋ جوسپارى بار ەكەنىن جاريالاعان بولاتىن.
اۆتور: اياۋلىم التىنبەك