قاراعاندى وبلىسىندا ات سپورتى تۇرلەرىنەن چەمپيونات ءوتتى

قاراعاندى. قازاقپارات - قاراعاندى وبلىسىندا ات سپورتى تۇرلەرىنەن جاسوسپىرىمدەر اراسىندا چەمپيونات جانە ات جارىسىنان ەرەسەكتەر اراسىندا اشىق تۋرنير ءوتتى.

ءىس- شارا ەل تاۋەلسىزدىگىنىڭ 30 جىلدىعىنا جانە ءاليحان بوكەيحانوۆتىڭ 155 جىلدىعىنا ارنالدى، دەپ حابارلايدى قازاقپارات ءتىلشىسى.

چەمپيوناتتى ۇلتتىق سپورت تۇرلەرى قاۋىمداستىعى جانە ۇلتتىق جانە ات سپورتى تۇرلەرى فەدەراتسياسى ۇيىمداستىردى. وعان ءوڭىردىڭ التى اۋدانىنان 15-17 جاستاعى جاسوسپىرىمدەر قاتىستى.

«چەمپيوناتقا 2004- 2006 -جىلى تۋعان 70 كە جۋىق بالا قاتىستى. ولار كوكپار تارتۋدان جارىستى. شەت اۋدانى جەڭىسكە جەتتى. ەكىنشى ورىندى - جاڭاارقا، ءۇشىنشى ورىندى قارقارالى اۋدانى يەلەندى. ولار سايكەسىنشە 300، 150 جانە 70 مىڭ تەڭگە سىياقى الدى. جەڭىمپازدار 3-10 قاراشادا وتەتىن الماتى وبلىسىنداعى ەل چەمپيوناتىندا ءبىزدىڭ وبلىستىڭ نامىسىن قورعايدى»، - دەدى قاراعاندى وبلىسىنىڭ ۇلتتىق جانە ات سپورتى تۇرلەرى فەدەراتسياسىنىڭ باسشىسى نۇرجان شايحين.

كوكپاردان ەرەسەكتەر اراسىنداعى اشىق تۋرنيردە قاراعاندىلىق «بايتەرەك» كومانداسى ۇزدىك دەپ تانىلدى. ەكىنشى جانە ءۇشىنشى ورىنداردى بۇقار جىراۋ اۋدانى مەن اقمولا وبلىسىنىڭ «باباي» جانە «ارشالى» كوماندالارى يەلەندى. ەرەسەكتەر اراسىندا ات جارىسى بويىنشا: قۇنان- بايگە (12 شاقىرىم)، الامان- بايگە (20 شاقىرىم) ۇيىمداستىرىلدى. جارىستىڭ ەڭ قيىن كەزەڭى - الامان بايگەدە ءبىرىنشى ورىندى ايسا اۋىلىنىڭ ماسكەۋ اتتى تۇلپارى جەڭىپ الدى. قۇنان- بايگەدە قىزىلجار اۋىلىنان قاراجال اتتى سايگۇلىك كوش باستادى. باس جۇلدەگە اۆتوموبيلدەر تىگىلدى.