ا ق ش ەلگە كىرۋ ەرەجەلەرىن وزگەرتتى

نۇر-سۇلتان.قازاقپارات - ا ق ش پرەزيدەنتى دجو بايدەن ەلگە كەلەتىن شەتەل ازاماتتارى ءۇشىن ۆاكتسيناعا جاڭا تالاپتار ەنگىزۋ تۋرالى جارلىققا قول قويدى.

بۇل تۋرالى Deutsche Welle سايتى جازدى.

حالىقارالىق اۋە ساپارلارىنىڭ جاڭا ساياساتىن جۇزەگە اسىرۋ تۋرالى مالىمەتكە ساي، ا ق ش- قا COVID-19-عا قارسى ەكپەنىڭ تولىق كۋرسىن العان شەتەل ازاماتتارى عانا كىرە الادى. يمميگراتسيالىق ەمەس ۆيزالارى بار، ا ق ش- قا باراتىن شەتەلدىكتەر ۇشاققا وتىرار الدىندا ەكپە العانى تۋرالى كۋالىگىن كورسەتۋ كەرەك.

«پاندەميا كەزىندە كەي ەلدەرگە قويىلعان شەكتەۋلەردەن باس تارتۋ جانە اۋە تاسىمالىن قاۋىپسىز جۇزەگە اسىرۋعا ىقپال ەتۋ ءۇشىن ءبىرىنشى كەزەكتە ۆاكسيناتسياعا نەگىزدەلگەن اۋە ساياساتىن قابىلداۋ كەرەك»، دەلىنگەن بايدەن مالىمدەمەسىندە.

باسىلىم ا ق ش ازىق- تۇلىك جانە ءدارى- دارمەك باسقارماسى (FDA) ماقۇلداعان نەمەسە دۇنيەجۇزىلىك دەنساۋلىق ساقتاۋ ۇيىمى شۇعىل پايدالانۋعا رۇقسات ەتكەن ەكپەلەرىن العان ساياحاتشىلاردى قابىلدايتىنىن حابارلادى. 18 جاسقا تولماعان بالالارعا ەكپە سالۋ بويىنشا جاڭا تالاپتار ەنگىزىلمەيدى. جاڭا شەكتەۋلەر 8-قاراشادا كۇشىنە ەنەدى.

egemen.kz