الماتىدا جەلتوقسان وقيعاسىنا ارنالعان كەزدەسۋ ءوتتى
ونلاين كەزدەسۋدە بەلگىلى اقىن، جەلتوقسان وقيعاسىنا قاتىسۋشى بولات شاراحىمباي قوناق بولدى.
«جەلتوقسان وقيعاسى تۋرالى كوپ نارسەنى ايتۋعا بولادى. ونى ءبىز - تاۋەلسىزدىگىمىزدىڭ اناسى دەسەك بولادى. سەبەبى، بۇل كوتەرىلىس بولماسا، بەس جىلدان كەيىن تاۋەلسىزدىك الار ما ەدىك، الماس پا ەدىك، ول جاعى بەلگىسىز»، - دەدى ب. شاراحىمباي كەزدەسۋ بارىسىندا.
اقىن كوتەرىلىسكە قاتىسقاندا ستۋدەنت بولعان.
«بارلىق ستۋدەنتتەر سەكىلدى الاڭعا بارىپ، كوتەرىلىسكە قاتىستىق. «قونايەۆتى ورنىنان الىپ تاستاپتى» دەگەندى ەستىگەندە، قاتتى اشۋلاندىق. «نەگە الىپ تاستادى، قانداي حاقىسى بار، نەگە حالىقتان سۇرامايدى، نەگە ءبىزدىڭ پىكىرىمىزدى تىڭدامايدى؟» دەگەن ويلار مازالادى. ەندى ستۋدەنتپىز عوي، جالىنداپ تۇرعان شاعىمىز. ءىشىمىز الاي-دۇلەي. العاش الاڭعا بارعان كەزدە، ەشقانداي جامان ويىمىز بولعان جوق»، - دەدى ول.
بولات شاراحىمباي الاڭدا وزىنە قامقورلىق تانىتقان قىزبەن 15 جىلدان كەيىن قايتا كەزدەسكەنىن ەسكە الدى.
«مەن قازىرگى تاۋەلسىزدىك مونۋمەنتى تۇرعان جەردە بولدىم. سول جەردە ۇستىمە سۋىق سۋ شاشىپ، تۇرعان جەرىمدە قۇلادىم. شاپكام ۇشىپ، قايدا قالعانى بەلگىسىز. ءبىر قىزدىڭ جانى اشىپ، قاسىما كەلدى، موينىنداعى ۇزىن اق شارفىن شەشىپ، باسىما ورادى. «اعا، ءۇستىڭىز سۋ بولدى، اۋىراسىز، ەندى ۇيگە قايتىڭىز» دەدى. ونى تىڭداعان جوقپىن، الاڭدا قالا بەردىم. تاعدىردىڭ جازۋىنا قاراڭىز، كەيىن ول قىزبەن 15 جىل وتكەن سوڭ، قايتادان تالدىقورعاندا كەزدەستىم»، - دەيدى جەلتوقسانشى.
سونداي-اق، ول كوشەدە سوققىعا جىعىلعان قىزعا اراشا تۇسكەنىن دە ايتتى. حالىق قاھارمانى قايرات رىسقۇلبەكوۆ جايلى ءوز ويىن بىلدىرە وتىرىپ: «مەن ونىمەن تانىس بولعان جوقپىن. ول تۋرالى كەيىن ءبىلدىم. ولەڭ شىعاراتىنىن، جۇرەگى اقىندىققا جاقىن جان ەكەنىن ءبىلدىم. قازىر ءتىرى بولسا 55 كە تولار ەدى. وعان «حالىق قاھارمانى» اتاعى بەرىلدى. بۇل وتە دۇرىس بولدى. ءبىراق، تەك مارقۇمدارعا عانا ەمەس، سونىمەن بىرگە، جەلتوقسان الاساپىرانىن ءوز كوزىمەن كورگەن بۇگىنگى كوزى ءتىرى باتىرلارعا دا بۇل اتاقتى بەرسە، ارتىق ەتپەس دەپ ويلايمىن. سەبەبى، ولاردىڭ دا كورگەن بەينەتتەرى كوپ. سونىمەن قاتار، بۇگىنگى ۇرپاققا كوزى ءتىرى كوتەرىلىسشىلەردى دارىپتەپ، اسپەتتەسە، ودان ۇتىلمايمىز دەر ەدىم. جاستارعا ايتارىم، ءبىرىنشى كەزەكتە ءوز ۇلتىڭدى، انا ءتىلىڭدى ءسۇي. سوندا ءبىزدىڭ ەلىمىزدىڭ مەرەيى ارتىپ، ءوسىپ، وركەندەپ، جاقسى داميتىن بولادى»، - دەگەندى جەتكىزدى بولات شاراحىمباي.