+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

قازاقستان مەن تۇرىكمەنستان پرەزيدەنتتەرى ب ا ق وكىلدەرىنە بريفينگ وتكىزدى

25 قازان 19:06
:ءبولىسۋ
قازاقستان مەن تۇرىكمەنستان پرەزيدەنتتەرى ب ا ق وكىلدەرىنە بريفينگ وتكىزدى

اشحاباد. قازاقپارات - قازاقستان مەن تۇرىكمەنستان دەلەگاتسيالارى وتكىزگەن كەلىسسوزدەر قورىتىندىسى بويىنشا مەملەكەتتەر باسشىلارى قاسىم-جومارت توقايەۆ پەن گۋربانگۋلى بەردىمۇحامەدوۆ بۇقارالىق اقپارات قۇرالدارى وكىلدەرى ءۇشىن بريفينگ وتكىزدى.

قازاقپارات بۇل تۋرالى اقورداعا سىلتەمە جاساپ حابارلايدى.

قازاقستان پرەزيدەنتى الەمدە قالىپتاسقان كۇردەلى جاعدايعا قاراماستان، قازاقستان مەن تۇرىكمەنستاننىڭ ستراتەگيالىق سەرىكتەستىگى دوستىق، تاتۋ كورشىلىك جانە ءوزارا قولداۋ رۋحىندا تۇراقتى دامىپ كەلە جاتقانىن اتاپ ءوتتى.

مەملەكەت باسشىسى ەكى تاراپتىڭ قول جەتكىزگەن ۋاعدالاستىقتارى تۋرالى ايتا كەلە، شەكارانى قۇقىقتىق تۇرعىدان شەگەندەۋگە باعىتتالعان كەلىسىمدەردىڭ ماڭىزىنا توقتالدى.

- بۇگىن ءبىز ءبىرقاتار ماڭىزدى قۇجات قابىلدادىق. ولاردىڭ ىشىندە كاسپي تەڭىزىندەگى قازاقستان-تۇرىكمەنستان مەملەكەتتىك شەكاراسىن مەجەلەۋ جانە بالىق اۋلاۋ ايماقتارىنىڭ شەكتەس ۋچاسكەلەرىن ءبولۋ تۋرالى شارت، سونداي-اق شەكارا ءتارتىبى تۋرالى ۇكىمەتارالىق كەلىسىم ەرەكشە ورىن الادى. وسىلايشا، ءبىز ەلدەرىمىز اراسىنداعى قۇرلىقتاعى جانە تەڭىزدەگى شەكارالاردى زاڭدى تۇردە راسىمدەۋدى اياقتادىق. مۇنىڭ ساياسي ءمانى بار، - دەدى قاسىم-جومارت توقايەۆ.

كەلىسسوزدەر بارىسىندا ساۋدا-ەكونوميكالىق ىنتىماقتاستىقتىڭ پەرسپەكتيۆالارىنا باسا ءمان بەرىلدى.

- تاۋار اينالىمىن ودان ءارى ارتتىرۋ ءۇشىن مول الەۋەتىمىز بار. ەنەرگەتيكا، كولىك، لوگيستيكا، اۋىل شارۋاشىلىعى، كاسىپورىن جانە باسقا دا سالالاردا ايتارلىقتاي رەزەرۆىمىز بار. سوندىقتان ءبىز ءوزارا ساۋدا كولەمىن ەداۋىر ارتتىرۋعا باعىتتالعان شارالار توپتاماسىن قابىلداۋعا كەلىستىك. ۇكىمەتتەرگە تاۋارلاردىڭ نومەنكلاتۋراسىن كەڭەيتۋ ءۇشىن ەكى ەلدىڭ ەكسپورتتىق الەۋەتىن جۇمىلدىرۋ تاپسىرىلدى، - دەدى مەملەكەت باسشىسى.

پرەزيدەنت ەلىمىزدىڭ مەتاللۋرگيا، ماشينا جاساۋ، مۇناي-حيميا، ازىق-تۇلىك جانە فارماتسيەۆتيكالىق ونەركاسىپ، سونداي-اق اۋىل شارۋاشىلىعى ونىمدەرىن، ونىڭ ىشىندە، ەڭ الدىمەن، ۇن مەن ءبيداي تاسىمالداۋ كولەمىن ۇلعايتۋعا ءازىر ەكەنىن ايتتى. مەملەكەت باسشىسى بارىنشا ءتيىمدى ەكونوميكالىق كووپەراتسيانى جانداندىرۋ ءۇشىن ۇكىمەتتەرگە ينۆەستيتسيا تارتۋ ءىسىن كوتەرمەلەۋ جانە قورعاۋ جونىندەگى كەلىسىمگە قول قويۋدى جەدەلدەتۋ تاپسىرىلعانىن ايتتى.

ونىڭ ايتۋىنشا، گاز سالاسىنداعى ءوزارا ءتيىمدى ىنتىماقتاستىق جاڭا پەرسپەكتيۆالارعا جول اشادى. اتاپ ايتقاندا، قازاقستان تۇرىكمەن گازىنىڭ يمپورتىن ەداۋىر ۇلعايتۋعا دايىن. قاسىم-جومارت توقايەۆ ايماقتىق ىنتىماقتاستىق ماسەلەلەرىن تالقىلاۋ بارىسىندا ءبىرقاتار ماڭىزدى باستاما كوتەردى.

- ساۋدا-ەكونوميكالىق الەۋەتىمىزدى جان-جاقتى جۇزەگە اسىرۋ ماقساتىندا قازاقستان جىل سايىن ءوڭىرارالىق فورۋمدار وتكىزۋدى ۇسىندى. مۇنداي فورمات ءوزىنىڭ تيىمدىلىگىن دالەلدەدى. وسىنداي جۇمىستىڭ ناتيجەسىندە ماڭعىستاۋ وبلىسى مەن بالقان ۋالاياتىنىڭ شەكاراسىندا اۆتوكولىك جۇگى تەرمينالىنىڭ شەكاراارالىق ساۋداسىنىڭ ارناۋلى ايماعىن قۇرۋعا بولار ەدى، - دەدى پرەزيدەنت.

كەزدەسۋگە قاتىسۋشىلار كولىك-ترانزيت سالاسىنداعى ءوزارا ىقپالداستىقتىڭ پەرسپەكتيۆاسىن تالقىلادى.

- بۇل باعىتتاعى نەگىزگى مىندەت - «قازاقستان - تۇرىكمەنستان - يران» ماگيسترالىن تولىق ىسكە قوسۋ.

تاسىمالداناتىن جۇك كولەمىن ارتتىرۋ ءۇشىن ەلدەرىمىزدەگى تاريفتىك ساياساتتى وڭتايلاندىرۋدىڭ جانە جۇك تاسىمالىنا قويىلاتىن تالاپتاردى جاقسارتۋدىڭ ماڭىزدى ەكەنى اتاپ ءوتىلدى. كاسپيدەگى اقتاۋ، قۇرىق جانە تۇرىكمەنباشى ايلاقتارىنىڭ اراسىنداعى لوگيستيكالىق ىقپالداستىق بويىنشا زور مۇمكىندىك بار، - دەدى مەملەكەت باسشىسى.

قاسىم-جومارت توقايەۆ قازاقستان باعىتى بويىنشا جاڭا اۆتوجولدى ىسكە قوسۋ ءۇشىن قارابۇعاز شىعاناعى ارقىلى وتەتىن كوپىر قۇرىلىسىنا قاتىستى تۇرىكمەن باسشىسىنىڭ باستاماسىن قولداپ، پەرسپەكتيۆاسى بار بۇل جوبانى بىرلەسىپ جۇزەگە اسىرۋ مۇمكىندىگىن قاراستىرۋعا ءازىر ەكەنىن ايتتى.

پرەزيدەنتتىڭ ايتۋىنشا، مادەني-گۋمانيتارلىق بايلانىستاردى ودان ءارى نىعايتۋ - ەلدەرىمىز اراسىنداعى بەرىك ءارى ۇزاق مەرزىمدى قاتىناستاردىڭ كەپىلى.

بۇل رەتتە، مەملەكەت باسشىسى ەكى ەلدىڭ ءوزارا مادەني كۇندەرىن وتكىزۋ جانە جاستار اراسىنداعى بايلانىستاردى كەڭەيتۋ ماڭىزدى دەپ سانايدى. كەلىسسوزدەر باعدارلاماسىنا وڭىرلىك جانە جاھاندىق كۇن ءتارتىبىنىڭ ماسەلەلەرى دە ەنگىزىلدى.

- اۋعانستانداعى جاعدايدى ەگجەي-تەگجەيلى تالقىلاپ، تاعدىر تاۋقىمەتىن كوپ تارتقان وسى ەلدەگى تۇراقتىلىق پەن قاۋىپسىزدىكتى نىعايتۋ ماقساتىندا ءوزارا تىعىز ىقپالداستىقتى جالعاستىرۋ قاجەت ەكەنىن ايتتىق، - دەدى قاسىم-جومارت توقايەۆ.

مەملەكەت باسشىسى حالىقارالىق اۋقىمداعى تاقىرىپتاردىڭ باسىم بولىگى بويىنشا ەكى تاراپتىڭ ۇستانىمدارى جاقىن ەكەنىن اتاپ ءوتتى. قازاقستان پرەزيدەنتى ءسوزىنىڭ سوڭىندا كەلىسسوزدەردىڭ قورىتىندىلارى حالىقتارىمىز اراسىنداعى دوستىق پەن تاتۋ كورشىلىك قاتىناستاردى نىعايتا تۇسەتىنىنە، قازاق-تۇرىكمەن سەرىكتەستىگىن جاڭا ستراتەگيالىق بيىككە كوتەرۋ ءۇشىن جول اشاتىنىنا سەنىم ءبىلدىردى.

قاسىم-جومارت توقايەۆ تۇرىكمەنستان پرەزيدەنتىن كەلەر جىلى قازاقستانعا مەملەكەتتىك ساپارمەن كەلۋگە شاقىرعانىن ايتتى.

بريفينگتەن كەيىن قازاقستان پرەزيدەنتىن «بيتاراپلىك» وردەنىمەن سالتاناتتى تۇردە ماراپاتتاۋ ءراسىمى ءوتتى.

مەملەكەت باسشىسىنا جوعارى ناگرادانى تۇرىكمەنستان پرەزيدەنتى گۋربانگۋلى بەردىمۇحامەدوۆ تابىستادى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات