+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

قازاقستان مەن تۇرىكمەنستان پرەزيدەنتتەرى شاعىن قۇرامدا كەلىسسوز جۇرگىزدى

25 قازان 15:26
:ءبولىسۋ
قازاقستان مەن تۇرىكمەنستان پرەزيدەنتتەرى شاعىن قۇرامدا كەلىسسوز جۇرگىزدى

اشعابات. قازاقپارات - قاسىم- جومارت توقايەۆ اشحابادقا مەملەكەتتىك ساپارى بارىسىندا تۇرىكمەنستان پرەزيدەنتى گۋربانگۋلى بەردىمۇحامەدوۆپەن كەلىسسوز جۇرگىزدى، دەپ حابارلايدى اقوردانىڭ باسپا ءسوز قىزمەتى.

كەلىسسوزگە دەيىن تاۋەلسىزدىك الاڭىندا سالتاناتتى تۇردە رەسمي قارسى الۋ شاراسى ءوتتى. قۇرمەت قاراۋىلىنىڭ باستىعى ەكى ەل باسشىلارىنا راپورت بەرىپ، قازاقستان مەن تۇرىكمەنستاننىڭ ءانۇراندارى شىرقالعاننان كەيىن قاسىم- جومارت توقايەۆ پەن گۋربانگۋلى بەردىمۇحامەدوۆ ءبىر- بىرىنە رەسمي دەلەگاتسيالاردىڭ قۇرامىن تانىستىردى.


سالتاناتتى راسىمنەن كەيىن شاعىن قۇرامدا كەزدەسۋ بولدى. مەملەكەتتەر باسشىلارى ساياسي، ساۋدا- ەكونوميكالىق، كولىك- ترانزيت جانە مادەني- گۋمانيتارلىق سالالاردى كەڭەيتۋگە ەرەكشە كوڭىل بولە وتىرىپ، قازاق- تۇرىكمەن ستراتەگيالىق سەرىكتەستىگىنىڭ اۋقىمدى ماسەلەلەرىن تالقىلادى. سونىمەن قاتار جاھاندىق جانە ايماقتىق كۇن تارتىبىندەگى پروبلەمالار قاراستىرىلدى.


قازاقستان پرەزيدەنتى باۋىرلاس تۇرىكمەنستانعا مەملەكەتتىك ساپارمەن كەلۋگە شاقىرعانى ءۇشىن گۋربانگۋلى بەردىمۇحامەدوۆكە ريزاشىلىعىن ءبىلدىردى.

- قاسيەتتى تۇرىكمەن توپىراعىنا تابانىمىز تيگەن ساتتەن شىنايى نيەتتەرىڭىزدى كورىپ، بويىمىزدى ەرەكشە سەزىم بيلەدى. ادەمى اشحاباد قالاسىنا تاعى دا كەلگەنىمە قۋانىشتىمىن. قالالارىڭىزداعى قۇرىلىستىڭ اۋقىمى مەن ساپاسى ءبىزدى تاڭ قالدىردى. ساپارعا كەلەتىن بولساق، ءبىز بۇعان وتە تىڭعىلىقتى دايىندالدىق. مەنىمەن بىرگە قازاقستان رەسپۋبليكاسى نەگىزگى ۆەدومستۆولارىنىڭ باسشىلارى دا كەلدى.


ءبىز مەملەكەتتەرىمىز اراسىنداعى ستراتەگيالىق سەرىكتەستىكتىڭ ودان ءارى دامۋىنا تىڭ سەرپىن بەرىلەدى دەپ سەنەمىز. تۇرىكمەندەر - بىزگە باۋىرلاس حالىق. حالىقتارىمىز اراسىنداعى دوستىقتىڭ تامىرى تەرەڭدە. كوپ نارسە بىزگە ورتاق. بۇل ورتاق شەكارامىزعا دا قاتىستى. باۋىرلاس تۇرىكمەنستان حالقىنا دەگەن نيەتىمىز تازا. ستراتەگيالىق سەرىكتەستىكتى دامىتۋ، مەملەكەتتەرىمىز اراسىنداعى ىنتىماقتاستىقتى نىعايتۋ ماسەلەلەرى جەكە باقىلاۋىمدا. بۇل - ءبىزدىڭ ساياساتىمىزدىڭ باسىم باعىتى. وسى ساپار بارىسىندا ىنتىماقتاستىعىمىزدىڭ باعىتىن ايقىندايتىن اسا ماڭىندى قۇجاتتارعا قول قويىلادى دەپ ويلايمىن. ءبىز بۇرىنعىشا حالىقارالىق ارەناداعى بەلسەندى ىنتىماقتاستىعىمىزدى جالعاستىرا بەرەمىز. كەزىندە ب ۇ ۇ باس اسسامبلەياسى ماقۇلداعان تۇرىكمەنستاننىڭ بەيتاراپ ەل مارتەبەسىنە قازاقستان زور قۇرمەتپەن قارايدى، - دەدى قاسىم- جومارت توقايەۆ.

گۋربانگۋلى بەردىمۇحامەدوۆ ءوزىنىڭ شاقىرۋىن قابىل الىپ، تۇرىكمەنستانعا ساپارمەن كەلگەنى ءۇشىن قاسىم- جومارت توقايەۆقا العىس ايتتى.


- ءبىز ءسىزدىڭ مەملەكەتتىك ساپارىڭىزعا ەرەكشە ءمان بەرىپ وتىرمىز. تۇرىكمەندەر مەن قازاقتاردىڭ رۋحاني- تاريحي بايلانىستارى تەرەڭدە جاتىر. سوندىقتان ءبىزدىڭ قارىم- قاتىناسىمىز - ءارقاشان تۇراقتى جانە سەنىمدى. بۇل مەملەكەتتىك ساپارىڭىز حالىقتارىمىز بەن باۋىرلاس ەلدەرىمىزدىڭ يگىلىگى جولىنداعى تۋىستىق ءارى ستراتەگيالىق ەكىجاقتى قاتىناستارىمىزعا تىڭ سەرپىن بەرىپ، ونى مۇلدە جاڭا دەڭگەيگە شىعارۋعا مۇمكىندىك تۋعىزارى ءسوزسىز. حالىقتارىمىزدىڭ اراسىنداعى ىنتىماقتاستىقتى نىعايتۋعا قوسقان جەكە ۇلەسىڭىز ءۇشىن العىس ايتقىم كەلەدى، - دەدى تۇرىكمەنستان پرەزيدەنتى.



:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات