ا ق ش- قا زاڭسىز وتۋگە تالپىنعان ميگرانتتار سانى كۇرت ءوستى

None
None
نۇر-سۇلتان.قازاقپارات – ا ق ش- قا اعىلعان ميگرانتتار قاراسى قايتا كوبەيدى. شەكارا قىزمەتى بيىل ەلدى زاڭسىز كەسىپ وتپەك بولعان بوسقىندار سانى بۇرىن سوڭدى بولماعان كورسەتكىشكە جەتكەنىن ايتادى.

كۇرمەۋلى ماسەلە قالاي شەشىلمەك؟ ا ق ش شەكارا قىزمەتىنىڭ مالىمەتىنە قاراعاندا بيىل قاڭتار ايىنان قازان ايىنا دەيىن ەل اۋماعىنا 1 ميلليون 700 مىڭداي ادام زاڭسىز كەسىپ وتپەك بولعان. بۇل - وسى ورگاننىڭ 1960 -جىلى شەكاراداعى ميگراتسيانى باقىلاي باستاعاننان بەرگى ەڭ رەكوردتىق كورسەتكىش، وتكەن جىلدان 4 ەسە كوپ. بىلتىر قۇراما شتاتتار اۋماعىنا 500 مىڭعا جۋىق بوسقىن زاڭسىز كىرمەك بولعان.

قازىر مەكسيكانىڭ وڭتۇستىك ايماقتارىندا ونداعان مىڭ كەلىمسەك جەرگىلىكتى بيلىكتەن ا ق ش- قا قاراي ساپار شەگۋگە رۇقسات سۇراپ وتىر. پوليسيا مەن ميگرانتتار اراسىندا ءجيى قاقتىعىس تىركەلەدى. وسى اپتادا ا ق ش- تىڭ مەملەكەتتىك حاتشىسى ەنتوني بلينكەن كولۋمبياعا ساپار شەگىپ، وڭتۇستىك امەريكانىڭ ءبىرقاتار سىرتقى ىستەر مينيسترلەرىمەن كەزدەسۋ وتكىزدى. باسقوسۋ بارىسىندا تاراپتار ميگراتسيالىق داعدارىستى جان- جاقتى تالقىلادى. ال رەسمي دەرەككە قاراعاندا قازىر كولۋمبيادا 2 ميلليونعا جۋىق ۆەنەسۋەلالىق ميگرانت پانالاۋدا.

ەنتوني بلينكەن، ا ق ش- تىڭ مەملەكەتتىك حاتشىسى:

- ايماقتاعى ميگراتسيالىق داعدارىستى شەشۋ ءۇشىن ىنتىماقتاستىق قاجەت. ءبىزدىڭ بۇگىنگى كەزدەسۋىمىزدىڭ باستى تاقىرىبى دا وسى. قازىر وڭىردەگى ەلدەردىڭ قۇقىق قورعاۋ ورگاندارى اراسىندا ميگراتسيامەن كۇرەس بويىنشا سەرىكتەستىكتى ۇلعايتۋعا كۇش سالىنىپ جاتىر. قۇراما شتاتتار بوسقىن مارتەبەسىن بەرۋ ءىسىن جەتىلدىرىپ، زاڭدى ميگراتسيالىق باعىتتاردى ۇلعايتۋدى كوزدەپ وتىر. ال ا ق ش سەناتىنداعى رەسپۋبليكالىقتار ەلگە زاڭسىز كىرۋگە تالپىنعان ادامداردىڭ كۇرت ءوسۋى ءۇشىن بايدەن اكىمشىلىگىن ايىپتاپ، جاعدايدى داعدارىستى دەپ قاراۋعا شاقىرىپ وتىر. سەبەبى كەدەن قىزمەتىنىڭ مالىمەتىنە قاراعاندا، بيىل شەكارادا ۇستالعان جالپى ميگرانتتاردىڭ 25 پروتسەنتى ترامپ كەزىندە كەرى قايتارىلعان كەلىمسەكتەر بولىپ شىققان.

نولسين توۆار، ۆەنەسۋەلالىق ميگرانت:

- وكىنىشكە قاراي ۆەنەسۋەلادا جاعداي وتە اۋىر. جۇمىس جوق، وتباسىمىزدى اسىراۋ قيىنداپ، وسىندا كەلدىك. ءبىراق مۇندا دا ءبىزدى جىلى قارسى الىپ جاتقان جوق. بيلىك كەرى قايتقانىمىزدى قالايدى.

ساراپشىلار دا بيىل ا ق ش- قا ميگرانتتاردىڭ اعىلۋىنىڭ سەبەبى پرەزيدەنت دجو بايدەننىڭ سايلاۋالدى ۋادەلەرىن ورىنداپ، دونالد ترامپ كەزىندەگى قاتاڭ ميگراتسيالىق ساياساتتى جەڭىلدەتۋىنەن دەيدى. جانە الداعى ۋاقىتتا بوسقىندار قاراسى ارتادى دەپ وتىر.

اۆتورى: داۋرەن اقاش ۇلى

www.24.kz


سوڭعى جاڭالىقتار