دەلتا شتامىنىڭ جاڭا ءتۇرى الەمگە تاراپ كەتتى

نۇر-سۇلتان.قازاقپارات- وسى اپتادا الەمنىڭ ءبىراز ەلىندە ۆيرۋستىڭ تارالۋى قايتا كۇشەيدى. اسىرەسە ۆاكتسينالاۋ كورسەتكىشى تومەن مەملەكەتتەردە ەپيداحۋال ۋشىعىپ كەتتى.

سوندىقتان جەرگىلىكتى بيلىك سانيتارلىق تالاپتاردى قاتاڭداتىپ جاتىر. سونداي- اق وسى اپتادا ۇلى بريتانيادا دەلتا شتامىنىڭ تاعى ءبىر ءتۇرى سانالاتىن ەي ۋاي 4.2 ((AY.4.2)) ۆيرۋسى پايدا بولدى. ول تەز ارادا ا ق ش، رەسەي، يزرايل جانە تاعى دا وزگە ەلدەرگە تاراپ كەتتى. مامانداردىڭ پايىمداۋىنشا، ۆيرۋستىڭ بۇل ءتۇرى باستاپقى شتامعا قاراعاندا 10-15 پروتسەنتكە جۇقپالى بولۋى مۇمكىن.

ۇلى بريتانيادا كوۆيد- ناۋقاستاردىڭ ارتۋىنا ۆيرۋستىڭ جاڭا ءتۇرى ءوز اسەرىن تيگىزگەن دەيدى عالىمدار. سوڭعى اپتادا بۇل ەلدە ۆيرۋستىڭ تارالۋى قايتا كۇشەيدى. جازدىڭ ورتاسىنان بەرى العاش رەت ءبىر كۇندە 50 مىڭنان استام ناۋقاس تىركەلدى. دارىگەرلەر قايتا شەكتەۋ شارالارىن ەنگىزۋگە شاقىرىپ وتىر. الايدا ۇكىمەت مۇنىڭ قاجەتى جوقتىعىن ايتتى. حالىقتى جاپپاي ۆاكتسينالاۋ ناتيجەلى بولىپ، دەرتتەن ءولىم- ءجىتىم ازايعان. بيىل قىستا ىندەتتىڭ ەكىنشى تولقىنى كەزىندە كۇن سايىن 50-60 مىڭ ادام كوروناۆيرۋستى جۇقتىرىپ، ءبىر مىڭداي ادام قايتىس بولعان ەدى. ال قازىر ءولىم كورسەتكىشى ەكى ءجۇز توڭىرەگىندە. ونىڭ وزىندە باسىم بولىگى ەكپە سالدىرماعاندار. ال اۋرۋدى جۇقتىرۋ سانىنىڭ ءوسۋىن ساراپشىلار ۆاكسينالاۋ ناۋقانىنىڭ باسىندا ەكپە سالدىرعان ادامداردا يممۋنيتەتتىڭ السىرەۋىمەن ءتۇسىندىرىپ وتىر. وسىعان بايلانىستى ۇلىبريتانيا پرەمەر- ءمينيسترى بوريس دجونسون ەل ازاماتتارىن ۆاكسينانىڭ ءۇشىنشى دوزاسىن قابىلداۋعا شاقىردى.

بوريس دجونسون، ۇلى بريتانيا پرەمەر- ءمينيسترى:

- ستاتيستيكانى كۇن سايىن باقىلاپ وتىرمىز. ۆيرۋس جۇقتىرۋ كورسەتكىشى ءالى دە جوعارى. سوندىقتان ەل ازاماتتارى بۋستەرلى دوزانى العانى ابزال. ال ۆيرۋستىڭ جاڭا ءتۇرى انىقتالعان رەسەيدە ۆاكسينالاۋ باياۋ ءوتىپ جاتىر. حالىقتىڭ تەك 34 پروتسەنتى عانا ەكى ەكپە سالدىرعان. ناتيجەسىندە كۇن سايىن ەلدە 35 مىڭداي ناۋقاس انىقتالسا، سوڭعى كەزدە دەرتتەن قايتىس بولعانداردىڭ سانى ءبىر مىڭنان اسىپ كەتتى.

جالپى رەسەيدە اپتا بويى اۋرۋ جۇقتىرۋ مەن ءولىم كورسەتكىشتەرى بويىنشا انتيرەكورد تىركەلدى. اسىرەسە ماسكەۋ وبلىسى جانە سانك- پەتەربۋرگ پەن ماسكەۋ قالالارىندا ەپيداحۋال كۇردەلى.

رايسا پوليكارپوۆا، دارىگەر:

قازىر ناۋقاستار سانى كۇرت ارتىپ، ولاردى قاراۋ ءۇشىن دارىگەرلەردىڭ دە بولمەلەرىن پايدالانۋعا ءماجبۇرمىز. دالىزدەردە دە ادامداردان اياق الىپ جۇرە المايتىن جاعدايعا جەتتىك. وسىعان بايلانىستى بۇكىل ەل بويىنشا دەمالىس كۇندەرى لوكداۋن ەنگىزىلەتىن بولدى.

ۆلاديمير پۋتين، رەسەي پرەزيدەنتى:

- قازىر ىندەتتىڭ جاڭا تولقىنىنا تەگەۋرىندى تويتارىس بەرۋ وتە ماڭىزدى. وسى رەتتە، 30-قازان مەن 7-قاراشا ارالىعى بۇكىل ەل بويىنشا دەمالىس جاريالاۋ تۋرالى ۇسىنىستارىڭىزدى قولدايمىن. بۇدان بولەك، ۆاكسينا سالدىرماعان ەگدە ادامدار مەن سوزىلمالى اۋرۋى بار ازاماتتار تولىقتاي وقشاۋلانۋى شارت. رەسەي ۇكىمەتى مۇنداي شەشىمدى بۇكىل ەل بويىنشا قابىلداۋدى ۇسىنادى.

ناۋقاستار سانى بويىنشا ءبىرىنشى ورىندا تۇرعان ماسكەۋ ءمەرى شۇعىل شەشىم قابىلداپ، قازاننىڭ 28-ىنەن باستاپ قالادا لوكداۋن ورنايتىنىن جاريالادى. وعان سايكەس، كاسىپورىندار جۇمىسىن توقتاتادى. بۇقارالىق شارا وتكىزۋگە تىيىم سالىنادى. ال مەكتەپ وقۋشىلارى دەمالىسقا كەتەدى. 11 كۇن بويى قالادا ازىق- تۇلىك دۇكەندەرى مەن ءدارىحانالار عانا قىزمەت كورسەتەدى. سانكت- پەتەربۋرگ پەن ەلدىڭ وزگە ايماقتارى دا بىرىنەن سوڭ ءبىرى شەكتەۋ شارالارىن ەنگىزە باستاعان. ۆاكسينالاۋ ناۋقانى باياۋ ءجۇرىپ جاتقان ەۋروپادا ەلدەرىندە دە كوروناۆيرۋس قايتا ءورشىپ، شەكتەۋلەر قايتادان قاتاڭداتىلدى. سوڭعى اپتادا ۆيرۋستى جۇقتىرۋ دەرەگى 49 پروتسەنتكە وسكەن لاتۆيادا قازاننىڭ 21-ىنەن باستاپ 4 اپتاعا قاتاڭ لوكداۋن ەنگىزىلەتىن بولدى. سەبەبى اۋرۋحانالاردا ناۋقاستار سانى كوبەيگەن. كارى قۇرلىقتا قارت ادامداردىڭ 74 پروتسەنتى تولىق ەگىلسە، لاتۆيادا تەك 54 پروتسەنتى عانا ەكپە سالدىرعان.

دانيەلس پاۆليۋتس، لاتۆيا دەنساۋلىق ساقتاۋ ءمينيسترى:

- مەن لوكداۋن ءۇشىن ەڭ الدىمەن وزدەرىن جانە وتباسىلارىن قورعاپ، دەرتكە قارسى ەگىلگەن ازاماتتاردان كەشىرىم سۇراعىم كەلەدى. سەبەبى ءبىز وسى ۋاقىتقا دەيىن حالىقتىڭ كوپ بولىگىن ۆاكتسينالاۋعا قول جەتكىزە المادىق. سالدارىنان ەلدە احۋال ناشارلاپ كەتپەس ءۇشىن بىرنەشە اپتاعا شەكتەۋلەردى ەنگىزۋگە ءماجبۇرمىز.

ۆاكتسينالاۋدىڭ باياۋ جۇرۋىنەن زارداپ شەگىپ جاتقان تاعى ءبىر مەملەكەت - رۋمىنيا. ازاماتتاردىڭ ەكپە سالدىرۋعا اسىقپاۋىنان ۆيرۋستى جۇقتىرعاندار سانى ارتىپ، ءولىم ءجىتىم كوبەيگەن. دۇنيەجۇزىلىك دەنساۋلىق ساقتاۋ ۇيىمىنىڭ مالىمدەۋىنشە، رۋمىنيا ءقازىر الەمدە كوۆيد-19دان تاۋلىكتىك قايتىس بولعاندار كورسەتكىشى بويىنشا الدا تۇر. ۆيرۋستان قايتقانداردىڭ 93 پروتسەنتى ۆاكتسينا ەگىلمەگەن ازاماتتار.

ەلەنا كرويتەرۋ، ناۋقاس:

- مەن كۇتە تۇرايىق، كورەيىك نە بولارىن دەپ ۆاكسينا سالدىرماپ ەدىم. ەندى ءوزىمنىڭ بۇلاي ىستەگەنىمە قاتتى وكىنەم. ەگەر ءبارىن قايتا باستاۋ كەرەك بولسا ەكپەنى ءبىرىنشى بولىپ الاتىن ەدىم.

ۆاكسينالاۋ ناۋقانى تومەن دەگەن كورشى سلوۆاكيادا ۆيرۋستى جۇقتىرعاندار ارتىپ، 5 ايماقتا شەكتەۋلەر قاتاڭداتىلدى. مەيرامحانا مەن سپورتتىق كەشەندەر جابىلدى.. ەلدە ىندەتتىڭ ورشۋىنە ريم پاپاسىنىڭ ساپارى دا تۇرتكى بولعان. ءدىني شاراعا 100 مىڭنان اسا ادام قاتىسقان. ال ۋكراينا ىندەتتىڭ ءتورتىنشى تولقىنىمەن كۇرەسىپ جاتىر. ەپيدەميولوگيالىق احۋالدىڭ ناشارلاۋىنا بايلانىستى پرەزيدەنت زەلەنسكي ەلدە قاتاڭ كارانتين رەجيمى قايتا ەنگىزىلۋى مۇمكىن ەكەنىن مالىمدەدى.

ۆلاديمير زەلەنسكي، ۋكراينا پرەزيدەنتى:

كوروناۆيرۋسقا بايلانىستى ەلدەگى جاعداي ەكى جولمەن ءوربۋى مۇمكىن: ۆاكسينالاۋ نەمەسە لوكداۋن. مەن لوكداۋنعا بارىنشا قارسىمىن، ەكونوميكامىز دا زارداپ شەگەدى. الايدا دەرتتى جۇقتىرعانداردىڭ سانى كۇن سايىن ءوسىپ بارادى. سوندىقتان ەكپە - ىندەتتەن ساقتانۋدىڭ ەڭ دۇرىس جولى. ۋكراينادا قاراشانىڭ 7-سىنەن باستاپ مۇعالىمدەر مەن كەي مەملەكەتتىك قىزمەتكەرلەر مىندەتتى تۇردە كوروناۆيرۋسقا قارسى ەگىلۋى ءتيىس . ەلدىڭ دەنساۋلىق ساقتاۋ مينيسترلىگىنىڭ حابارلاۋىنشا ۆاكتسينا قابىلداماعان ۇستازدار جۇمىسىن جالعاستىرا المايدى. جەرگىلىكتى بيلىك بۇل تالاپ وزگە دە ماماندىق يەلەرىنە قاتىستى بولۋى مۇمكىن دەيدى. بولجام بويىنشا ولاردىڭ تىزىمىنە الەۋمەتتىك قىزمەتكەرلەر، پوشتا ماماندارى مەن كوممۋنالدىق قىزمەت جۇمىسشىلارى كىرۋى ىقتيمال. ىندەت ورشىگەن چەحيادا دا الداعى اپتادا شەكتەۋلەر ەنگىزىلەدى. ويتكەنى ناۋقاستار سانى ەكى ەسەگە ارتقان.

جۇمىس ورىندارىندا بەتپەردە تاعۋ قايتا مىندەتتەلەدى. ال قاراشانىڭ 1 ىنەن باستاپ مەيرامحانا مەن مەن تۇنگى كلۋبتارعا ۆاكسينا سالدىرعاندار نەمەسە پ ت ر تەستىڭ تەرىس ناتيجەسى بار ادامدار عانا كىرىگىزىلمەك. فينليانديادا كوروناۆيرۋستى انىقتايتىن تەستتەن وتۋدەن باس تارتقاندار ايىپپۇل تولەۋگە ءماجبۇر. قازىر حەلسينكي ۋەزىندەگى سوتتا سانيتارلىق ەرەجەنى بۇزعان 3 ادامنىڭ ءىسى قارالىپ جاتىر. تالاپقا باعىنباعان تۇرعىندار سانى 60 تان اسادى. ايىپپۇل مولشەرى بىرنەشە مىڭ ەۋرودان باستالادى. ەگەر تەستتەن باس تارتقان ادام وزگە تۇرعىندارعا ۆيرۋس جۇقتىرسا، وعان قاتىستى جازا قاتاڭداتىلادى.

اۆستريا بيلىگى كوروناۆيرۋسقا قارسى شارانى قاتاڭداتا باستادى. ەندى ۆاكسينا الماعاندار جۇمىسسىز قالۋى مۇمكىن. ءار ادامنىڭ قولىندا ەگىلگەنىن نەمەسە پ ت ر تەست ناتيجەسىن راستايتىن قۇجات بولۋى كەرەك. ەرەجە بۇزعان قىزمەتكەر 500 ەۋرو، ال جۇمىس بەرۋشى 3600 ەۋرو ايىپپۇل تولەيدى.

www.24.kz