+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

التايدا اتقا ءمىنۋ دەنە شىنىقتىرۋ ساباعىنا ەنگىزىلدى - شەتەلدەگى قازاق ءتىلدى ب ا ق- قا شولۋ

24 قازان 13:46
:ءبولىسۋ
التايدا اتقا ءمىنۋ دەنە شىنىقتىرۋ ساباعىنا ەنگىزىلدى - شەتەلدەگى قازاق ءتىلدى ب ا ق- قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

انكارادا قازاق اقىن-جازۋشىلارىنىڭ كىتاپ جارمەڭكەسى اشىلدى - TRT

جارمەڭكەنىڭ قوناق ەلى - قازاقستان، قوناق جازۋشى - ءادىل احمەتوۆ.

بۇگىن تۇركيانىڭ باس قالاسى انكارادا كىتاپ جارمەڭكەسى اشىلدى. جارمەڭكەنىڭ قوناق ەلى - قازاقستان، قوناق جازۋشى - ءادىل احمەتوۆ، دەپ مالىمدەيدى تۇركيا راديو تەلەۆيزيا پورتالى.

اتالعان اقپارات كوزىنىڭ كەلتىرگەن دەرەكتەرىنە سۇيەنسەك، انكاراداعى ATO Congresium كورمە ورتالىعىندا باستالعان شاراعا 300 دەن استام ءىرى باسپالار، باسپاحانا جانە جارناما اگەنتتىكتەرى قاتىسىپ وتىر. ۇيىمداستىرۋشىلار انكارا كىتاپ جارمەڭكەسىنە كەلۋشىلەر سانى بيىل 350 مىڭنان اسادى دەپ ەسەپتەيدى.

انكارا كىتاپ جارمەڭكەسى 2005-جىلدان بەرى ۇيىمداستىرىلىپ كەلەدى جانە جىلىنا ەكى رەت وتەدى. يتاليا، فرانسيا، يران مەن رەسەي وسى ۋاقىتقا دەيىن «قوناق ەلدەر» رەتىندە كورمەگە قاتىستى.

16-انكارا كىتاپ جارمەڭكەسىنىڭ شەتەلدىك قۇرمەتتى اۆتورى رەتىندە قازاق جازۋشىسى، دوكتور، پروفەسسور ءادىل احمەتوۆ قاتىسادى. ءىس-شارا اياسىندا قازاقستاننىڭ تۇركياداعى ەلشىلىگى ارنايى كىتاپ ستەندىن اشتى. وندا قازاق اقىن-جازۋشىلارىنىڭ تۇرىك تىلىنە اۋدارىلعان شىعارمالارى قويىلدى.

جالپى 100 دەن استام كىتاپ قازاقستاندىق ستەندتە ورىن الادى. كىتاپ كورمەسىندە قازاق اقىن - جازۋشىلارىنىڭ تۇرىك تىلىنە اۋدارىلعان جاڭا كىتاپتارى تانىستىرىلادى. اسىرەسە پروفەسسور ءادىل احمەتوۆ، جازۋشى نۇرعالي وراز، بەلگىلى جاس اقىن باۋىرجان قاراعىز ۇلى وزدەرىنىڭ جەكە كىتاپتارىن تانىستىرادى.

«كورمە اياسىندا كۇنىنە 2-3 سەسسيا وتەدى. اسىرەسە 23 - قازاندا حالىقارالىق قۇرمەتتى اۆتور پروفەسسور ءادىل احمەتوۆتىڭ «كولۋمبياعا دەيىنگى امەريكاندىق: ۇندىستەردىڭ التايلىق تەگى» اتتى كىتابى تانىستىرىلادى.

ا. احمەتوۆ كىتاپتارىنا قولتاڭبا قالدىرادى. بەلگىلى اۆتور دوتسەنت كەنان كوچ پەن ايابەك باينيازوۆتىڭ «تۇرىكشە-قازاقشا، قازاقشا-تۇرىكشە سوزدىك» كىتابىن تانىستىرماق. قازاق جازۋشىسى نۇرعالي ورازدىڭ تۇرىك تىلىنە اۋدارىلعان «قازىعۇرت اڭگىمەلەرى» كىتابىنىڭ تۇساۋكەسەرى بولادى.

دوكتور، پروفەسسور ورحان سويلەمەز، ايابەك باينيازوۆ جانە شاپاعات جالمانوۆ تۇرىك تىلىنە اۋدارعان «دومبىرا» كىتابى دا كوپشىلىك نازارىنا ۇسىنىلادى»، دەپ تۇيىندەيدى تۇركيا راديو تەلەۆيزيا پورتالى.

بايان-ولگەيدە توعىزقۇمالاقتان ەل بىرىنشىلىگى وتەدى - Kaznews

بيىل پاندەمياعا بايلانىستى كوپتەگەن سپورت جارىسى شەگەرىلدى. ەندى 2022-جىلى بايان-ولگەيلىكتەردى ءتۇرلى سپورتتان زونالىق جانە ەل بىرىنشىلىگى كۇتىپ تۇر. موڭعوليانىڭ دەنە شىنىقتىرۋ، سپورت باسقارماسى باسشىسىنىڭ 2021-جىلعى 29 - قىركۇيەكتەگى بۇيرىعى بويىنشا 2022-جىلى 37 سپورت تۇرىنەن ەل بىرىنشىلىگى وتەدى دەپ بەلگىلەنگەن. ولاردىڭ اراسىندا قازاقتىڭ ۇلتتىق ويىنى توعىزقۇمالاق بار.

كەلەر جىلى شىلدە ايىنىڭ 7 - كۇنى توعىزقۇمالاق ويىنىنان ەل بىرىنشىلىگى بايان-ولگەي ايماعىندا وتپەك. بۇل اقپاراتتى وسى اپتادا موڭعوليالىق Kaznews پورتالى جاريالاعان بولاتىن.

ەستەرىڭىزگە سالساق، 2018-جىلى بايان-ولگەي ايماعىندا توعىزقۇمالاق ويىنىنان ازيا چەمپيوناتى وتكەن بولاتىن.

ريو-2016 وليمپياداسىنىڭ جۇلدەگەرى 3 جىلعا شەتتەتىلدى - «ءو ز ا»

دزيۋدودان وزبەكستان ۇلتتىق قۇراماسىنىڭ مۇشەسى، ريو-2016 وليمپيادا ويىندارىنىڭ قولا جۇلدەگەرى، ديەربەك ۋروزبايەۆتان الىنعان دوپينگ-تەستتەن تىيىم سالىنعان زات تابىلدى.

ناتيجەدە ول سپورتتىق جارىستاردان 3 جىلعا شەتتەتىلدى، دەپ حابارلادى «ءو ز ا» مەملەكەتتىك اقپارات اگەنتتىگى.

«ءو ز ا» - نىڭ حابارلاۋىنشا، ديەربەك ۋروزبايەۆ 2021-جىلدىڭ 6- مامىرىندا ماۋسىمارالىق كەزەڭدە دوپينگكە قارسى تەكسەرۋدەن وتكەن. «تەست ناتيجەسىنە وراي سپورتشىنىڭ دۇنيەجۇزىلىك دوپينگكە قارسى كودەكستىڭ جانە وزبەكستاننىڭ ۇلتتىق دوپينگكە قارسى ەرەجەلەرىنىڭ 2.1-بابىندا كورسەتىلگەن دوپينگكە قارسى ەرەجەلەردى بۇزعانى، ياعني تىيىم سالىنعان «Meldonium» زاتىن تۇتىنعانى انىقتالدى. بۇل پرەپارات تىيىم سالىنعان زاتتار ءتىزىمى - «S4 گورموندار مەن مەتابوليكالىق مودۋلياتورلار» كلاسىنا جاتادى»، دەپ جازادى وزبەكستاندىق ب ا ق.

وسى جاعدايعا بايلانىستى ديەربەك ۋروزبايەۆ 3 جىلعا سپورتتان شەتتەتىلدى. شەتتەتۋ 2021-جىلدىڭ 16- تامىزىنان 2024-جىلدىڭ 15- تامىزىنا دەيىن جالعاسادى.

التايدا اتقا ءمىنۋ دەنە شىنىقتىرۋ ساباعىنا ەنگىزىلدى - «اعاجاي-التاي» پورتالى

التاي قالاسىنداعى «التىن قان» ات سپورتى الاڭى تولىقتاي اشىلۋعا دايىن. جابىق يپپودرومنىڭ قۇرىلىس جۇمىستارى دا اياقتالعان. مەكتەپ وقۋشىلارىنا ات سپورتى ساباعىن جۇرگىزۋگە ارنالعان جابىق يپپودرومنىڭ جالپى قۇرىلىس الاڭى شامامەن 1500 شارشى مەتردى قۇرايدى.

ونىڭ اينالاسىنداعى ستەندتەر مەن قورشاۋلار ورناتىلدى. الاڭنىڭ ءارقايسىسى ءبىر مەزگىلدە ات سپورتى ساباعىندا 30 وقۋشىعا ارنالعان. التاي قالاسى 2019-جىلى «اتپەن جۇرگەن ون مىڭ جاس ءوسپىرىم» اتتى ارنايى دەنە شىنىقتىرۋ سىنىبىن اشقاننان بەرى 8500 اتقا ءمىنۋ ساباعى وقىتىلعان، دەپ حابارلايدى قىتايدىڭ altxw.com اقپاراتتىق پورتالى.

ايتا كەتەيىك، التاي ايماعى - ءداستۇرلى جىلقى ءوسىرۋ ءوڭىرى ەكەنى بەلگىلى. بۇندا جىلقى مادەنيەتى ەجەلدەن قالىپتاسقان، بۇقارالىق بازاسى دا كەڭ. التاي قالاسىنداعى بۇل جاڭادان اشىلىپ جاتقان ات سپورتى فەرماسىنا بۇدان بۇرىن اتتىڭ قىزىقتارىن تاماشالاۋ ءۇشىن «ات ۇستىندەگى ون مىڭ جاس ءوسپىرىم» اتتى ارنايى سپورتتىق كۋرسى وتكىزىلگەن.

التاي قالالىق «التىن قان» ات سپورتى فەرماسىنىڭ جاۋاپتىسى چجوۋ يۋننىڭ ايتۋىنشا، التاي قالاسىنىڭ باستاۋىش جانە ورتا مەكتەپ وقۋشىلارىنا جىل بويى ارنايى سپورتتىق كۋرستار وتكىزۋگە قول جەتكىزۋ ءۇشىن تسزيلين پروۆينتسياسى 2,6 ميلليون يۋان قارجىلاي كومەك بەرىپ، التاي قالاسىندا «التىن قان» ات سپورتى كۋرسىنىڭ جابىق ستاديونىن سالۋعا قول ءۇشىن سوزعان. سونىڭ ارقاسىندا، التايلىق وقۋشىلار قىستا شاڭعى تەبۋگە عانا ەمەس، جابىق يپپودرومدا اتقا ءمىنۋ مۇمكىندىگىنە دە يە بولعان.

التاي قالاسىنداعى «التىن قان» ات سپورتى كۋرسىنىڭ وقۋ ورىندارى جابىق جانە اشىق الاڭدار دەپ بولىنەدى. كەلۋشىلەر جىل بويى جاتتىعۋلارى ءۇشىن قولايلى ورىنداردى تاڭداۋعا بولادى. جابىق الاڭدار جازداعى قاتتى ىستىق پەن قىستاعى سۋىققا توتەپ بەرە الادى.

ال، اشىق الاڭدار دا سپورتشىلار ەركىن جۇرەدى. سونىڭ ارقاسىندا وقىتۋدىڭ ساپاسى مەن سانى ەداۋىر جاقسارعان.

«مۇندا قالادا تۇراتىن بالالاردىڭ دەنە قۋاتىنىڭ ۇزدىكسىز ءوسۋى مەن ىلگەرىلەۋىنە ات سپورتىنىڭ پايداسى ۇشان تەڭىز. جىل بويى وتكىزىلگەن ات سپورتى ساباقتارىنىڭ ارقاسىندا بالالاردىڭ دەنساۋلىعى مىقتى بولادى. مىنەزى مەن توزىمدىلىگى ارتادى»، دەپ تۇيىندەيدى قىتايلىق ب ا ق.

اسحات ورازباي: يراننىڭ شانحاي ىنتىماقتاستىق ۇيىمىنا قوسىلۋى مۇشە ەلدەرگە پايدالى بولماق - Parstoday

بۇنداي تاقىرىپتاعى اقپارات وسى اپتادا يراندىق Parstoday اقپاراتتىق اگەنتتىگىندە حابارلانعان بولاتىن.

اتالعان ب ا ق- تىڭ دەرەگىنشە، قازاقستاننىڭ يرانداعى ەلشىسى اسحات ورازباي دۇيسەنبى كۇنى IRNA اقپارات اگەنتتىگىنە بەرگەن سۇحباتىندا يراننىڭ شانحاي ىنتىماقتاستىق ۇيىمىنا مۇشە بولىپ كىرگەنىنە بايلانىستى ايماق ەلدەرىنىڭ ينتەگراتسياسى ارتاتىنىنا توقتالعان.

«يراننىڭ وسى ۇيىمعا قوسىلۋى بۇكىل ايماققا پايدالى. يران - ەكونوميكا تۇرعىسىنان وتە مىقتى ەل. يراننىڭ قوسىلۋى شانحاي ۇيىمى اۋماعىنداعى ساۋدا-ەكونوميكالىق قارىم-قاتىناسقا جانە ەكونوميكالىق باعدارلامالاردى ورىنداۋدا وتە اسەرلى بولادى. ۇيىمعا مۇشە ەلدەردە حالىق سانىنىڭ كوپتىگىن ەسكەرسەك، بارلىق ەلدەرگە جانە يراننىڭ وزىنە دە پايدالى بولادى»، - دەگەن قازاقستاننىڭ يرانداعى ەلشىسى.

اۆتور: بەيسەن سۇلتان


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات