سۋ دا تاڭبالانادى

نۇر-سۇلتان.قازاقپارات - ەلىمىزدە الكوگولسىز سۋسىنداردىڭ ءتۇپنۇسقالىعىن تەكسەرۋگە ارنالعان قوعامدىق باقىلاۋ قۇرالى سىناقتان وتۋدە.

قازاقستاندا تۇتىنۋشىلارعا ساتىپ الىناتىن سۋ مەن قۇرامىندا قانت بار سۋسىنداردىڭ ءتۇپنۇسقالىعىنا سيفرلى تاڭبالاۋدى ەنگىزۋ ارقىلى كەپىلدىك بەرۋ جوسپارلانۋدا. قازىر قاناتقاقتى جوبا ءجۇرىپ جاتىر. وعان قاپتالعان سۋدى وندىرەتىن ءبىرقاتار كومپانيا قوسىلعان.

ءبىزدىڭ ەلدەگى قاپتالعان سۋ مەن قۇرامىندا قانت بار سۋسىنداردى تاڭبالاۋ جونىندەگى قاناتقاقتى جوباعا ەۋرازيالىق ەكونوميكالىق وداق ەلدەرىنىڭ كەلىسىمى نەگىزىندە اۋىل شارۋاشىلىعى مينيسترلىگى باستاماشىلىق ەتكەن. تاۋارلاردى تاڭبالاۋ مەن قاداعالاۋدىڭ ءبىرىڭعاي وپەراتورى - سيفرلى ەكونوميكانى دامىتۋ ورتالىعىنىڭ وكىلى ەرلان نۇرماعانبەتوۆ وسى جىلدىڭ 1-شىلدەسىندە باستالعان قاناتقاقتى جوبانىڭ بارىسى تۋرالى ايتىپ بەردى. قاناتقاقتى جوبا سالالى كاسىپورىنداردىڭ بيزنەس- پروتسەستەرىن زەردەلەۋ ءۇشىن جۇرگىزىلەدى. وسىلايشا، قاتىسۋشىلار تىكەلەي وزدەرىنىڭ وندىرىستىك جەلىلەرىندە وندىرىلەتىن ءونىمدى تاڭبالاۋ پروتسەستەرىنىڭ ەرەكشەلىكتەرىمەن تانىسادى.

- سالانىڭ جوباعا بەلسەندى قاتىسۋى ەلىمىزدەگى سۋ مەن سۋسىنداردى تاڭبالاۋ جوباسىنا قويىلاتىن تالاپتاردىڭ قانشالىقتى مۇقيات ەسكەرىلەتىنىنە بايلانىستى. سيفرلى تاڭبالاۋدى ەنگىزە وتىرىپ، وندىرۋشىلەر نارىقتىڭ بارلىق وزگەرىستەرىنە جەدەل مونيتورينگ جۇرگىزىپ، ءوز برەندىن قورعاي الادى. ال تۇتىنۋشىلار ساتىپ الىناتىن تاۋارلارعا قوعامدىق باقىلاۋ جۇرگىزۋ مۇمكىندىگىنە يە، - دەپ ءتۇسىندىردى ءبىرىڭعاي وپەراتور جوباسىنىڭ جەتەكشىسى ە. نۇرماعانبەتوۆ.

ەسكە سالا كەتەيىك، رەسەي قازىردىڭ وزىندە سۋدى سيفرلى تاڭبالاۋعا كوشتى. بۇل ەلدە ساراپشىلار وسى نارىقتاعى ساپاسىز جانە جالعان ونىمدەردىڭ ۇلەسىن 67 پايىز دەپ باعالاپ وتىر. قازاقستانداعى اتالعان كورسەتكىش بىرنەشە ەسە از. ياعني 20 پايىزعا تەڭ. ءبىراق قوعام وكىلدەرى كولەڭكەلى اينالىم دەڭگەيىنىڭ تومەندىگىنە قاراماستان، سۋدى جانە سۋسىنداردى جاپپاي سۇرانىسقا يە ءونىم دەپ سانايدى. سوندىقتان تۇتىنۋشىلارعا ءونىمدى زاڭدى تۇردە تەكسەرۋگە مۇمكىندىك بەرۋ ماڭىزدى.

الكوگولسىز سۋسىندار مەن شىرىن وندىرۋشىلەر قاۋىمداستىعىنىڭ اتقارۋشى ديرەكتورى ءاليا مامىتبايەۆانىڭ ايتۋىنشا، ەلىمىزدەگى كونترافاكت جانە زاڭسىز اينالىم ستاتيستيكالىق قاتەلىك دەڭگەيىندە.

- ءاربىر ءونىمنىڭ قاپتاماسىنا كەز كەلگەن نارسەنى جازۋعا بولادى. جالعان دەرەكتەر جازۋ پروبلەما ەمەس. ال قاپتامادا تاۋاردىڭ جارامدىلىق مەرزىمى، قۇرامى، ءوندىرۋشىسى تۋرالى بارلىق مالىمەت جيناقتالعان تسيفرلى كود بولعان جاعدايدا، ساپا مەن زاڭدىلىققا سەنىمدى بولا الامىز. ءبىزدى تۇتىنۋشى رەتىندە مۇنداي قۇقىقتان ايىرۋعا بولمايدى. كونترافاكتىنىڭ ەلدەن ەلگە تارالىپ كەتۋىنە دە جول جوق، - دەيدى دەنساۋلىق ساقتاۋ مينيسترلىگى جانىنداعى قوعامدىق كەڭەستىڭ مۇشەسى ءجاميلا سادىقوۆا.

قاناتقاقتى جوبانىڭ قاتىسۋشىسى Tassay ساۋدا بەلگىسىمەن ءونىم شىعاراتىن «يۋنيكس» جشس ءوز وندىرىسىندە تسيفرلى تاڭبالاۋدى ەنگىزۋدى باستادى.

- ءبىز ءوزىمىز ءۇشىن جوبانى ەنگىزۋدىڭ ءتيىمدى تەحنيكالىق شەشىمىن انىقتادىق. تاڭبالاۋ كودتارىن قولدانۋدىڭ قولجەتىمدى تيپوگرافيا-

لىق ءادىسىن زەرتتەدىك. جالپى، بۇل پروتسەستەن سىرت قالا المايمىز. ويتكەنى ءونىمدى تاڭبالاۋ ەنگىزىلىپ جاتقان رەسەيگە سۋ ەكسپورتتايمىز. دەمەك، ءبىز كورشى ەلدىڭ جاڭا نارىقتىق ەرەجەلەرىنە بەيىمدەلۋىمىز كەرەك. ارينە، جابدىقتى ساتىپ الۋ بويىنشا ماسەلەلەر بار. ءبىراق مۇنىڭ ءبارى رەتتەلەدى دەپ ويلايمىن، - دەيدى Tassay كومپانياسىنىڭ تاڭبالاۋدى ەنگىزۋ جونىندەگى جوبا جەتەكشىسى يبراگيم ابدۋللين.

ءبىرىڭعاي وپەراتور جوبانى ىسكە اسىرۋ بويىنشا جۇمىس توبى قۇرىلعانىن حابارلادى.

فارحات قايرات ۇلى

egemen.kz