بالاعا ۇيالى تەلەفون الىپ بەرەردە تالقىلانۋ كەرەك ماسەلەلەر

نۇر-سۇلتان. قازاقپارات - ەرتە مە، كەش پە بالاعا ۇيالى تەلەفون ساتىپ الىپ بەرەتىن كۇن كەلەدى.

بۇل ءار اتا-انانىڭ باسىنا كەلەتىن جاعداي. الايدا بالا دا، اتا-انا دا تەلەفون جاي «اشەكەي» ەمەس، جاۋاپكەرشىلىك ەكەنىن ءتۇسىنۋى كەرەك. سوندىقتان دۇكەنگە بارماس بۇرىن بالامەن بىرنەشە ماسەلەلەردى تالقىلاپ العان ءجون.

ۇيالى تەلەفوندى قاي ۋاقىتتا قولدانۋ كەرەك؟

الدىمەن سمارتفوندى قولدانۋ ەرەجەسىن بەلگىلەپ، ولاردى بالاعا ايتىڭىز. مىسالى، داستارحان باسىندا وتباسى مۇشەلەرىنىڭ ەكرانعا قاراپ وتىرۋىن قالامايتىنىڭىزدى، ونىڭ ساباققا جانە ۇيقىعا كەدەرگى كەلتىرمەۋ كەرەگىن ءتۇسىندىرىڭىز. الايدا اگرەسسيا كورسەتپەڭىز: ەگەر بالا ەرەجەنى بۇزسا، بىردەن سمارتفوندى تارتىپ الاتىنىڭىزدى ايتپاڭىز. ونىڭ ورنىنا ساۋاتتى ديالوگ قۇرۋعا تىرىسىڭىز، سونىڭ بارىسىندا تەلەفوندى قانداي كەستە بويىنشا قولدانۋعا بولاتىنىن شەشەسىزدەر.

ۇيالى تەلەفوندى قانشالىقتى ءجيى قولدانۋعا بولادى؟

Kaiser Foundation ۇيىمىنىڭ زەرتتەۋشىلەرى ورتاشا ەسەپپەن بالالار گاجەتتەرمەن كۇنىنە 7,5 ساعات وتىراتىنىن انىقتاعان. بۇل ەرەسەك ادامنىڭ جۇمىس ۋاقىتىنا تەڭ! ەگەر ءسىزدى بالاڭىزدىڭ ءجيى تەلەفون ۇستاپ وتىرۋى مازالاسا، جايلى ورىن (نەمەسە ورتا) جاساپ بەرىپ كورىڭىز. سەبەبى بالا ادەتتە باسقا ەشتەڭە قىزىق بولماعاننان ەمەس، سىرتقى دۇنيەدە ونى جاقسى تۇسىنەتىندەر جوق بولعاندىقتان، قولداۋدى ۆيرتۋالدى الەمنەن عانا كورەتىندىكتەن تەلەفوننان تۇسپەي وتىرۋى مۇمكىن.

بالانىڭ ومىرىندە نە بولىپ جاتقانىن ءبىلىڭىز. ءوز وي-ءورىسىڭىزدى دامىتىڭىز، بالاڭىزعا دا ۇناۋى مۇمكىن حوببيگە قىزىعۋشىلىق تانىتىڭىز، كورگەنىڭىزدى بالامەن تالقىلاڭىز. سونداي-اق بالانىڭ قانداي دا ءبىر پروبلەماسىن قۇنسىزداندىرماڭىز. سىزگە اسا ماڭىزدى ەمەس سەكىلدى كورىنگەنىمەن، ول بالا ءۇشىن ۇلكەن پروبلەما بولۋى ابدەن مۇمكىن.

بالادا ءبارى دۇرىس، ءبىراق سوندا دا تەلەفوننىڭ اينالاسىنان شىقپاسا، وتباسىلىق ءداستۇر ەنگىزىڭىز: ءار دەمالىس سايىن ساياباققا بارۋ، ورتاق حوببيمەن اينالىسۋ نەمەسە ت. ب.

كيبەرقاۋىپسىزدىك جايلى نە ءبىلۋ كەرەك؟

بولاشاقتا مەكتەپتەردە كيبەرقاۋىپسىزدىك ساباعى بولۋى مۇمكىن. ءبىراق قازىر ول تۋرالى بالاعا ءتۇسىندىرۋ — اتا-انانىڭ مىندەتى. بالاعا قاۋىپسىزدىك پەن قۇپيالىقتىڭ نە ەكەنىن، تەلەفونداعى جانە الەۋمەتتىك جەلىلەردەگى جەكە مالىمەتتەردى بارىنشا قورعاۋ نە ءۇشىن ماڭىزدى ەكەنىن ايتىڭىز. سونداي-اق كەز كەلگەن سايتقا جەكە مالىمەتتەردى (تۋعان كۇن، مەكەن-جاي جانە تەلەفون) جازا بەرۋ جانە تانىس ەمەس ادامدار شاقىرعان چاتتارعا قوسىلۋ قاۋىپتى بولۋى مۇمكىن ەكەنىن ءتۇسىندىرىڭىز.

سونىمەن قاتار، بالادان تەلەفوندا دا ادەپتى بولۋىن سۇراڭىز: مىسالى، باسقالارعا ءتىل تيگىزەتىن جانە كەمسىتەتىن حاتتار نەمەسە سۋرەتتەر جىبەرمەۋ.

اتا-انا نەگە تەلەفون سوعا بەرەدى؟

كوبىنە بالالار اتا-اناسىنىڭ نەگە ءار نارسەنى ۋايىمداي بەرەتىنىن تۇسىنبەيدى. سوندىقتان بالانى قورقىتپاي، سابىرمەن ءتۇسىندىرىڭىز: ومىردە ءتۇرلى جاعداي بولاتىنىن، سوندىقتان ول جاۋاپ بەرمەسە، ونى قاتتى ۋايىمدايتىنىڭىزدى ايتىڭىز. ءسىز تەلەفون سوققان كەزدە سويلەسە الماسا، حات جازىپ جىبەرۋگە ۇيرەتىڭىز.

نەلىكتەن ەرەسەكتەردىڭ وزدەرى تەلەفوندا ۇزاق وتىرادى؟

كەيدە بالا سىزگە سالعان سۋرەتىن كورسەتەيىن دەپ جۇگىرىپ كەلەدى، ءبىراق نەمقۇرايلىقتان باسقا ەش جاۋاپ المايدى. بالا سىزگە ونىڭ شىعارماشىلىعىنان گورى تەلەفون ماڭىزدىراق دەپ تۇسىنەدى. ال نەگىزىندە ءسىز ماڭىزدى جۇمىس شارۋاسىن شەشىپ وتقان بولۋىڭىز مۇمكىن. بالا ەرەسەكتىڭ گادجەت الدىندا ۇزاق وتقانىن كورسە، ونىڭ ناقتى نە ىستەپ جاتقانىن بىلە قويمايدى. سوندىقتان بالا تۇسىنەتىن جاستا بولسا، جۇمىسىڭىزدىڭ چاتىن نەمەسە ونلاين-جينالىسىڭىزدى كورسەتۋگە بولادى.

ەگەر ۇيالى تەلەفون جوعالىپ نەمەسە سىنىپ قالسا، نە ىستەيمىز؟

بالاعا تەلەفون ساتىپ الاردا ونىڭ ارزان ەمەس ەكەنىن جانە ول ءبىر كۇندە جوندەي نەمەسە اۋىستىرا سالاتىن زات ەمەس ەكەنىن ءتۇسىندىرىڭىز. ەگەر بالانى زاتتارىنا جاۋاپكەرشىلىكپەن قاراۋدى ۇيرەتكىڭىز كەلسە، مۇنداي جاعدايدا ەرەسەكتەر جوعالعان زاتتىڭ ورنىنا جاڭاسىن الۋ ءۇشىن نەمەسە ونى جوندەۋ ءۇشىن باسقا كەيبىر شىعىنداردان باس تارتاتىنىن ايتىڭىز. ول بالا بولعاندىقتان، وعان باسقا ءادىس ۇسىنىڭىز. مىسالى، ۇيدەگى قانداي دا ءبىر مىندەتتى ءوز موينىنا الۋىن سۇراڭىز.

massaget.kz