مەكتەپتە جىنىستىق ساۋاتتىلىق ءپانى كەرەك پە - مينيستر جاۋابى

None
None
نۇر-سۇلتان. قازاقپارات - قازاقستان مەكتەپتەرىندە جىنىستىق ساۋاتتىلىق ءپانىن ەنگىزگەن ءجون بە؟

بۇل سۇراققا ق ر ءبىلىم جانە عىلىم ءمينيسترى اسحات ايماعامبەتوۆ جاۋاپ بەردى، دەپ حابارلايدى قازاقپارات ءتىلشىسى.

ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتى بارىسىندا ق ر ءبىلىم جانە عىلىم ءمينيسترى اسحات ايماعامبەتوۆكە «قازاقستان مەكتەپتەرىندە جىنىستىق ساۋاتتىلىق ءپانىن ەنگىزۋ ۋاقىتى جەتكەن جوق پا، ءسىز قالاي ويلايسىز؟» دەگەن ساۋال قويىلدى.

«مەكتەپ باعدارلاماسىندا وقۋشىلاردىڭ جاس ەرەكشەلىگىنە قاراي جىنىستىق تاربيەگە قاتىستى تاقىرىپتار بەرىلگەن. جىنىستىق تاربيە ماسەلەسىن ايتقاندا، تەك مەكتەپپەن شەكتەلمەي اتا-انانىڭ ءرولىن ۇمىتپاعان ءجون. جانە ءار اتا-انا ءوز بالاسىمەن وسى تاقىرىپتا سويلەسكەنى ءجون. بۇل وتە جەكە ماسەلە، ياعني تياناقتى بولۋدى تالاپ ەتەدى. سوندىقتان وتباسىندا اكەسى ۇلىمەن نەمەسە اناسى قىزىمەن وڭاشا تالقىلاعانى ءجون بولار. ول بالاعا دا بايلانىستى، كەي بالا اكەسىنە جاقىن، كەيبىرى كەرىسىنشە اناسىمەن سىرلاسادى. جالپى اتالعان تاقىرىپتىڭ تاربيەلىك ءمانى باسىم بولعاندىقتان اتا-انانىڭ ەركى مەن جاۋاپكەرشىلىگىنە قالدىرعان ءجون دەپ ويلايمىن»، - دەپ جاۋاپ بەردى اسحات ايماعامبەتوۆ.

بۇعان دەيىن مينيستر كوكشەتاۋ قالاسىندا مەكتەپ مۇعالىمى داپتەرىن ۇمىتىپ كەتكەن وقۋشىلاردىڭ ماڭدايىنا «داپتەر» دەپ جازىپ بەرگەن وقيعاعا قاتىستى پىكىر ءبىلدىردى.

سوڭعى جاڭالىقتار