ۇلتتىق رۋحاني جاڭعىرۋ: مادەنيەت مينيسترلىگى قانداي جۇمىستار اتقارادى؟

نۇر-سۇلتان. قازاقپارات - ق ر مادەنيەت جانە سپورت ۆيتسە-ءمينيسترى نۇرعيسا داۋەشوۆ «ۇلتتىق رۋحاني جاڭعىرۋ» ۇلتتىق جوباسى اياسىندا مادەنيەت سالاسىندا اتقارىلاتىن جۇمىستاردى ايتتى، دەپ حابارلايدى قازاقپارات ءتىلشىسى.

ۇلتتىق جوبانى ىسكە اسىرۋ ءۇشىن ءۇش بىردەي مينيسترلىكتىڭ كۇشى جۇمىلدىرىلادى، ياعني اقپارات جانە قوعامدىق دامۋ مينيسترلىگى، مادەنيەت جانە سپورت مينيسترلىگى، ءبىلىم جانە عىلىم مينيسترلىگى قامتىلادى.

ۇلتتىق جوبانىڭ مادەنيەت سالاسى بولىگىندە كەلەسى باعىتتاردى قامتيدى:

- «رۋحاني جاڭعىرۋ» قۇندىلىقتارىن ىلگەرىلەتۋ جانە مەملەكەتتىك ءتىلدى دامىتۋ؛

- «ەل رۋحى» جوباسى.

ونىڭ ايتۋىنشا، اتالعان باعىتتار اياسىندا كەلەسى مىندەتتەر العا قويىلدى - مەكتەپ جاسىنداعى بالالاردى مادەني تاربيەمەن قامتۋ، «وقيتىن ۇلت» جوباسى اياسىندا حالىقتىڭ كىتاپ وقۋ بەلسەندىلىگىن ارتتىرۋ، مادەنيەت سالاسىندا كورسەتىلەتىن قىزمەتتەردىڭ قولجەتىمدىلىگى مەن ساپاسىن ارتتىرۋ جانە وتاندىق مادەني ءونىمدى تانىمال ەتۋ.

ۆيتسە-ءمينيستردىڭ سوزىنە قاراعاندا، «وقيتىن ۇلت» جوباسى اياسىندا حالىقتىڭ كىتاپ وقۋ بەلسەندىلىگىن ارتتىرۋ اتتى كورسەتكىشكە سايكەس، مينيسترلىك 5 ءىس-شارانى جۇرگىزۋدى كوزدەدى.

بۇل شارالار تۇرعىنداردىڭ، سونىڭ ىشىندە بالالار مەن جاس وسپىرىمدەردىڭ وقۋ ساۋاتتىلىعىن ارتتىرۋ مەن كىتاپ وقۋ مادەنيەتىن دامىتۋعا، وتاندىق قالامگەرلەردى، سونىڭ ىشىندە جاس اقىن-جازۋشىلاردى مەملەكەت تاراپىنان ىنتالاندىرۋ مەن قولداۋعا باعىتتالعان.

اتاپ ايتقاندا، مينيسترلىكتىڭ قولداۋىمەن 2007-جىلدان بەرى تۇراقتى تۇردە جىل سايىن وتكىزىلىپ كەلە جاتقان «ءبىر ەل - ءبىر كىتاپ» وقۋ اكسياسى ەندىگى جەردە جاڭا فورماتتا ۇسىنىلادى. سونىمەن قاتار، بۇگىنگى تاڭدا كىتاپحانانىڭ وقىرماندارعا ۇسىناتىن ونلاين قىزمەتىن جەتىلدىرۋ ماسەلەسى وزەكتى. وسىعان وراي مينيسترلىك قازاقستان ۇلتتىق ەلەكتروندى كىتاپحاناسىنىڭ قىزمەتىن جەتىلدىرۋ، موديفيكاتسيالاۋ جانە وقىرماندار ءۇشىن موبيلدى قوسىمشالار ارقىلى ەلەكتروندى كىتاپحانانى قولجەتىمدى ەتۋ جۇمىستارىن جۇرگىزەدى. بۇدان بولەك، وڭىرلەردەگى كوپشىلىككە ارنالعان كىتاپحانالار «ادەبي ولكەتانۋ» جوباسىن ۇيىمداستىرۋدى جوسپارلاپ وتىر. وسى رەتتە جوبا اياسىندا ءاربىر وڭىرگە تيەسىلى ادەبيەتى مەن اقىن-جازۋشىلارىنىڭ شىعارماشىلىعىن وزگە وڭىرلەردەگى وقىرماندارعا تانىستىرۋ جانە ناسيحاتتاۋ شارالارىنا باسىمدىق بەرىلەدى.

مۇنىمەن قوسا، مينيسترلىك وتاندىق قالامگەرلەردى ىنتالاندىرۋ ماقساتىندا 2022-جىلدان باستاپ «ۇزدىك بالالار شىعارماسى»، «جىلدىڭ ۇزدىك كىتابى» بايقاۋىن ۇيىمداستىرادى.

سونداي-اق، وتاندىق جاس قالامگەرلەرگە مەملەكەتتىك قولداۋ كورسەتۋ، جاڭا ەسىمدەردى ۇلىقتاۋ ماقساتىندا جاس اقىن-جازۋشىلارعا پرەزيدەنتتىڭ ارنايى «ايبوز» ادەبي سىيلىعى تاعايىندالادى.