بالالارىمىز قازاق تىلىندە سويلەسىن دەسەك، ەكراندى تۇزەۋىمىز كەرەك – بالايەۆا
«شەتەلدەگى تانىمال مۋلتفيلم كانالداردىڭ ونىمدەرىن قازاق تىلىنە اۋدارۋ جوباسىن جىلدىڭ باسىنان باستاپ كەتتىك. ولار: TiJi, Nickelodeon مۋلتفيلم كانالدارى. ولارمەن كەلىسسوز وتكىزىلىپ، قازىر «قازاقفيلم» بازاسىندا اۋدارۋعا كىرىستىك. جىلدىڭ سوڭىندا بۇل جۇمىس بىتەدى. بۇل دەگەنىمىز Nickelodeon مەن TiJi مۋلتفيلمدەرى قازاقشا سويلەيدى دەگەن ءسوز. بۇل وتە ماڭىزدى. نە ءۇشىن؟ قازاق ءتىلى وتباسىنان باستالادى. بۇگىندە تازا قازاق ءتىلدى وتباسىلارداعى بالالاردىڭ، كىشكەنتاي بۇلدىرشىندەردىڭ ءتىلى ورىسشا شىعىپ جاتقانى ەشكىمگە دە جاسىرىن ەمەس. بۇل - سول مۋلتفيلمدەردىڭ سالدارى. وكىنىشكە وراي، ءتىلدى تەك اتا- انا عانا ەمەس، ەكراندا قالىپتاستىراتىن زامان بولدى. ءتىلى تازا قازاقشا شىققان بالانىڭ سول مۋلتفيلمنىڭ ىقپالىمەن ارى قاراي ورىسشا شۇلدىرلەپ جاتقانى راس. سوندىقتان وسى تەلەارنالاردى كەلىسسوزگە شاقىرىپ، 800 ساعات ءونىمىن قازاق تىلىنە اۋدارىپ جاتىرمىز. سالىستىرمالى تۇردە ايتار بولساق، بارلىق ءبۇلدىرشىن ءسۇيىپ قارايتىن «ماشا ي مەدۆەد» مۋلتفيلمنىڭ 1 - ماۋسىمىن تۇسىرۋگە 2 ميلليارد تەڭگە جۇمسالادى ەكەن. ول نە ءبارى 2-اق ساعاتتىق ءونىم. ال ءبىز تانىمال مۋلتفيلم كانالداردىڭ 800 ساعاتتىق ءونىمىن 4 ەسە ارزانعا جاساپ جاتىرمىز. ءوزىمىز ساپالى ونىمدەر جاسايتىن بولساق، وندا ول ۇلكەن قاراجاتتى تالاپ ەتەدى. ۇزاق ۋاقىت وتەدى. قازىر ءار ۋاقىتتا ءتيىمدى پايدالانۋىمىز كەرەك. سول سەبەپتى قازىر بۇلدىرشىندەرىمىز كورىپ جاتقان كانالداردىڭ ءبارىن قازاق تىلىنە اۋدارساق، بالالارىمىز قازاق تىلىندە كورسە، وندا ولاردىڭ قازاق تىلىندە سويلەتىندىگى انىق. بالالارىمىز قازاق تىلىندە سويلەسىن دەسەك، ەكراندى تۇزەتۋىمىز كەرەك. ەكران قازاقشا بولۋى كەرەك»، - دەدى ايدا بالايەۆا ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
مينيستر بالالاردىڭ بىرنەشە ءتىلدى بىلگەنى دە دۇرىس ەكەندىگىن باسا اتاپ ءوتتى.
«بۇگىن پرەزيدەنت: «كوپ ءتىلدى ءبىلۋ بالا ءۇشىن، بالانىڭ بولاشاعى ءۇشىن ۇلكەن مۇمكىندىكتەر، دەپ جاقسى ايتتى. سوندىقتان بالالارىمىزدىڭ ءتىلى قازاقشا ورىس جانە باسقا دا تىلدەردى وڭاي ۇيرەنىپ الادى»، - دەدى ول.