+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

ەل ءۇمىتى: دارىندى وقۋشىلار قالاي انىقتالادى؟

20 قازان 20:56
:ءبولىسۋ
ەل ءۇمىتى: دارىندى وقۋشىلار قالاي انىقتالادى؟

كوكشەتاۋ. قازاقپارات - «ەل ءۇمىتى» اياسىندا قازاقستاندا بىرنەشە ءبىلىم جوباسى ىسكە اسىرىلۋدا.

ونىڭ اراسىندا اۋىل وقۋشىلارىنا ارنالعان «مىڭ بالا» ۇلتتىق وليمپياداسى، «ەلباسى مەدالى» باعدارلاماسى، «بىرگە وقۋ» ونلاين-مەكتەبى جانە «Qabilet قىزمەتى» بار.

بۇل تۋرالى جۋرناليستەرمەن وتكەن بريفينگتە اقمولا وبلىستىق ءبىلىم باسقارماسى باسشىسىنىڭ ورىنباسارى بوتاكوز دۇيسەنوۆا ايتتى، دەپ حابارلايدى قازاقپارات ءتىلشىسى.

«ەل ءۇمىتى» باستاماسى بويىنشا نۇرسۇلتان نازاربايەۆ قورى ۇكىمەتپەن، وبلىس اكىمدىكتەرىمەن، قوعامدىق بىرلەستىكتەرمەن، جەكە ءبىلىم ۇيىمدارىمەن، بيزنەس-قوعامداستىقپەن جانە بارلىق مۇددەلى تاراپتارمەن ىنتىماقتاستىقتا بىرنەشە ءبىلىم جوباسىن ىسكە اسىرادى.

بۇل - اۋىل وقۋشىلارىنا ارنالعان «مىڭ بالا» ۇلتتىق وليمپياداسى، «ەلباسى مەدالى» باعدارلاماسى، «بىرگە وقۋ» ونلاين-مەكتەبى جانە «Qabilet قىزمەتى».

«2020-جىلى اقمولا وبلىسىنان «ەلباسى مەدالى» باعدارلاماسىنا قاتىسۋعا 1030 ءوتىنىم كەلىپ ءتۇستى، 259 قاتىسۋشى تىركەلدى. 21 قاتىسۋشى قولا مەدالمەن ماراپاتتالدى. اعىمداعى جىلى 1674 ءوتىنىم بەرىلدى، 574 قاتىسۋشى تىركەلدى. 101 قولا جانە ءبىر كۇمىس مەدالمەن ماراپاتتالدى»، - دەدى بوتاكوز دۇيسەنوۆا.

ەكىنشى جىل اۋىل وقۋشىلارىنا ارنالعان «مىڭ بالا» ۇلتتىق زياتكەرلىك وليمپياداسى وتكىزىلەدى.

ونىڭ جەڭىمپازدارى ەلىمىزدىڭ ۇزدىك مەكتەپتەرىندە ءبىلىم الۋعا مۇمكىندىك الادى.

«2020-جىلى وليمپيادانىڭ ءبىرىنشى كەزەڭىنە اقمولا وبلىسىنان 13731 وقۋشى قاتىستى. ونىڭ ىشىندە 300 بالا ەكىنشى كەزەڭگە ءوتىپ، 83 جەڭىمپازدى انىقتادى. 2021-جىلى ءبىرىنشى كەزەڭگە 6486 وقۋشى قاتىستى، ونىڭ ىشىندە ەكىنشى كەزەڭگە 263 وقۋشى ءوتتى، 51 وقۋشى جەڭىمپاز اتاندى. بارلىق جەڭىمپازدارعا «Birge Oq‎» ونلاين-مەكتەبىنە تەگىن كىرۋ مۇمكىندىگى بەرىلەدى. التىنشى سىنىپ جەڭىمپازدارى كونكۋرستان تىس دارىندى بالالارعا ارنالعان مامانداندىرىلعان مەكتەپتەرگە قابىلدانا الادى. 2020-جىلى مۇنداي وقۋشىلار سانى 17، 2021-جىلى - 15 بولدى»، - دەپ تولىقتىردى باسقارما باسشىسىنىڭ ورىنباسارى.

ەسكە سالا كەتسەك، 2019-جىلى نۇرسۇلتان نازاربايەۆ دارىندى وقۋشىلار مەن جاستاردى انىقتاۋ جانە قولداۋ جونىندەگى «ەل ءۇمىتى» باستاماسىنىڭ جوبالارىن ۇسىنعان بولاتىن.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات