پرەزيدەنتتىڭ ارناۋلى وكىلى ماتتەو مەكاچچيمەن كەزدەستى
قازاقستان رەسپۋبليكاسى پرەزيدەنتىنىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان قازاقستانعا العاش رەت ساپارمەن كەلگەن ە ق ى ۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ (د ي ا ق ب) ديرەكتورى ماتتەو مەكاچچيمەن كەزدەسۋ وتكىزدى.
كەزدەسۋ بارىسىندا ارناۋلى وكىل مەملەكەت باسشىسىنىڭ باستاماسى بويىنشا ادام قۇقىقتارى مەن قۇقىق ۇستەمدىگى سالاسىندا جۇرگىزىلىپ جاتقان رەفورمالار جونىندە، «حالىق ۇنىنە قۇلاق اساتىن مەملەكەت» تۇجىرىمداماسى مەن ەلدىڭ تۇراقتى دامۋىنىڭ باسىمدىقتارى تۋرالى مالىمەت بەردى.
تاراپتار قازاقستان مەن ورتالىق ازياداعى قاۋىپسىزدىك، ەكونوميكالىق جانە ساياسي دامۋ سالالارى بويىنشا قازاقستان مەن ە ق ى ۇ ينستيتۋتتارى اراسىنداعى ىنتىماقتاستىقتىڭ جاعدايى مەن پەرسپەكتيۆالارىن تالقىلادى.
د ي ا ق ب ديرەكتورى پرەزيدەنت قاسىم-جومارت توقايەۆتىڭ باستاماسىمەن جۇرگىزىلىپ جاتقان رەفورمالارعا جوعارى باعا بەرىپ، قازاقستاننىڭ قولعا العان باستامالارىنا بارىنشا كومەك كورسەتۋگە دايىن ەكەنىن جەتكىزدى.