اۋىلدىڭ گۇلدەنۋى - قازاقستاننىڭ گۇلدەنۋى: اقمولا تۇرعىنى تۋعان اۋىلىنا ءان ارنادى
ەرەيمەنتاۋ اۋدانىنىڭ تورعاي، مالتابار، ولەڭتى، اجى جانە سىلەتى اۋىلدارىندا ءبىرقاتار ءىس-شارالار ءوتتى، دەپ حابارلايدى قازاقپارات ءتىلشىسى وبلىستىق ىشكى ساياسات باسقارماسىنا سىلتەمە جاساپ.
ءىس-شارا اياسىندا اۋىل شارۋاشىلىعى ونىمدەرىنىڭ جارمەڭكەسى، ساندىك-قولدانبالى ونەر شەبەرلەرى مەن قولونەر شەبەرلەرىنىڭ جۇمىستارىنىڭ كورمەلەرى، اۋداندىق مادەنيەت ءۇيى جانە اۋىل ونەرپازدارىنىڭ قاتىسۋىمەن كونسەرتتەر ۇيىمداستىرىلدى. كەزدەسۋگە قۇرمەتتى قوناقتار رەتىندە ەڭبەك ارداگەرلەرى، اۋىل ەڭبەككەرلەرى جانە اگروونەركاسىپ كەشەنىنىڭ وزاتتارى شاقىرىلدى.
«بارلىق ءىس-شارالار اۋىلداردا قىزىقتى جانە مازمۇندى ءوتتى. تۇرعىندار كوڭىلدى ۋاقىت وتكىزدى، ءبىر-بىرىمەن سويلەستى، ءومىردىڭ جاعىمدى جانە جارقىن ساتتەرىن ەسكە الدى. مەنىڭ ويىمشا، اۋىل تۇرعىندارى كوپتەگەن جاعىمدى ەموتسيالار مەن كوتەرىڭكى كوڭىل - كۇيگە يە بولدى»، - دەدى تورعاي اۋىلدىق وكرۋگىنىڭ اكىمى مارات اۋباكىروۆ.
مارافوندى وتكىزۋ ولەڭتى اۋىلىنىڭ 60 جىلدىق مەرەيتويىمەن تۇسپا-تۇس كەلدى. ايتۋلى وقيعانىڭ قۇرمەتىنە اقىن، ءانشى، كومپوزيتور سايلاۋ جىلقىبايەۆ تۋعان اۋىلىنا «ولەڭتىم - ولەڭىم» ءانىن ارنادى. سونداي-اق، شارا اياسىندا اۋىلدىق كىتاپحانادا «ۇلى دالانىڭ ەجەلگى قولونەر كورمەسى» اتتى ارنايى كورمە ۇيىمداستىرىلدى.
«وسى جىلدار ىشىندە اۋىل تۇرعىندارىنىڭ كۇندەلىكتى ەڭبەگىنىڭ ارقاسىندا ۇلكەن اۋىل ءوستى. بارلىق تۇرعىنداردى اۋىلدىڭ مەرەيتويىمەن قۇتتىقتايمىن، ولارعا زور دەنساۋلىق پەن اماندىق تىلەيمىن. ءبىزدىڭ اۋىل ودان ءارى گۇلدەنە بەرسىن»، - دەدى اۋىل تۇرعىنى بالتاباي حوسىبايەۆ.
ايتا كەتەيىك، «اۋىلدىڭ گۇلدەنۋى - قازاقستاننىڭ گۇلدەنۋى» مارافونى قازان ايىندا وبلىستىڭ اۋىلدىق ەلدى مەكەندەرىندە اۋىلداردى تۇراقتى دامىتۋ، اۋىل شارۋاشىلىعى ونىمدەرىنىڭ باسەكەگە قابىلەتىن ارتتىرۋ، حالىق شىعارماشىلىعى ەلەمەنتتەرىن ساقتاۋ جانە دامىتۋ ماقساتىندا وتكىزىلەدى.