قازاقستان كومىرىن ەكسپورتقا شىعارۋ ءۇشىن نە ىستەۋ كەرەك - ساراپشى
بۇل تۋرالى رەسپۋبليكالىق تاۋ- كەن ءوندىرۋشى جانە تاۋ- كەن مەتاللۋرگيالىق كاسىپورىندار قاۋىمداستىعىنىڭ اتقارۋشى ديرەكتورى نيكولاي رادوستوۆەتس ايتتى، دەپ حابارلايدى قازاقپارات ءتىلشىسى.
«ەڭ باستىسى تەمىر جول سەكتورىندا باسەكەلەستىك جاساۋ قاجەت. ويتكەنى، قازاقستان تەمىر جولى - بۇل تەك ۇلكەن كومپانيا عانا جانە بارلىق ۋاقىتتا ءبىزدىڭ جاڭا ادىستەرىمىزدە يگەرە الماي جاتادى. ايتالىق، قازىر بىزدە ەۋروپاداعى جەتكىزۋشىمەن كەلىسىمشارت بار، ال ءبىر ايدان كەيىن باسقا وڭىردەن جەتكىزۋشى شىقتى دەلىك. ال ق ت ج بىزگە جوسپارلارى بار ەكەندىگىن، جەتكىزە المايتىندىعىن ايتادى. قازاقستانعا باسەكەلەستىك جاساي الاتىن ءارى تاسىمالداۋ باعاسىن تومەندەتۋگە قاۋقارلى ۇتقىر جەكەمەنشىك تاسىمالداۋشى قاجەت. بۇعان قوسا، جۇكتەرىمىزدى رەسەي ارقىلى ەۋروپاعا تاسىمالداي الۋ ءۇشىن «جاسىل» ءدالىز كەرەك. جانە دە بىزگە رەسەي پورتتارىندا لوگيستيكالىق عيماراتتار سالۋعا رۇقسات مىندەتتى تۇردە بولۋى ءتيىس»، - دەدى ول ەلوردادا ءوتىپ جاتقان تاۋ- كەن مەتاللۋرگيالىق كونگرەسى اياسىندا ۇيىمداستىرىلعان بريفينگتە.
ونىڭ تۇسىندىرۋىنشە، ويتكەنى، قازاقستاننىڭ تەڭىزگە شىعار جولى جوق. ال جۇك تاسىمالىندا پورتتاردا ەلىمىزدىڭ لوگيستيكالىق عيماراتتارىنىڭ بولۋى وتە ماڭىزدى.
«بىزگە رەسەي ارقىلى كومىر تاسۋعا ارنالعان بۇگىن بار دا، ەرتەڭ جوق كۆوتا كەرەك ەمەس. سۇرانىستاعى قانداي كولەمدەگى كومىردى جەتكىزە الاتىندىعىمىزعا قاتىستى نىق سەنىمدىلىك قاجەت. كومىرىمىزدى تەك ەۋروپاعا عانا جەتكىزگىمىز كەلمەيدى. ۋكراينادان دا سۇرانىس جوعارى. قىتاي ارقىلى ازياعا دا شىعارعىمىز كەلەدى»، - دەدى نيكولاي رادوستوۆەتس.
اۆتور: مارلان جيەمباي