تۇركىستاندا ءۇي قىمباتتاپ بارادى

نۇر-سۇلتان.قازاقپارات - تۇركىستاندا تۇرعىن ءۇي قۇرىلىسى قارقىندى جۇرگەنىمەن باسپانا باعاسى شارىقتاپ بارادى.

قۇرىلىسقا جاۋاپتى كومپانيا وكىلدەرى بۇنى ماتەريالداردىڭ قىمباتتاۋىمەن بايلانىستىرسا، باسپاناعا مۇقتاج ازاماتتار الىپساتارلاردىڭ ارەكەتى دەيدى. تۇركىستان قالاسىنىڭ تۇرعىنى وركەن مىرزابەك جاقىندا عانا 1 بولمەلى باسپاناعا قول جەتكىزدى. جاس وتباسى قازىر تاپقان- تايانعانىنىڭ ءبارىن ۇيگە قۇيىپ جاتىر. الايدا تۇرعىن ءۇي باعاسىنىڭ مۇنشالىقتى تەز ءوسۋى وركەندى دە الاڭداتىپ وتىر. سەبەبى ول پاتەرىن كەڭەيتسەم دەيدى، ال باعا شارىقتاپ بارادى. ول بۇعان مەملەكەتتىك باعدارلامامەن بەرىلگەن ۇيلەردى ارزانعا ساتىپ الىپ، قىمباتقا وتكىزەتىن ورتاداعى الىپساتارلاردى كىنالايدى.

وركەن مىرزابەك، قالا تۇرعىنى:

- بۇل ءۇيدىڭ العاشقى ەگەسى قاراشا ايىندا كونكۋرسقا قاتىسىپ، 1 بولمەلى ءۇيدى 6 ميلليونعا العان بولاتىن. سوسىن ەكىنشى ادامعا 9 ميلليونعا ساتقان ەكەن. ەكىنشى ەگەسى ماعان 13 ميلليونعا ساتتى. اينالدىرعان 6 ايدىڭ ىشىندە بۇل ۇيلەردىڭ باعاسى 2-3 ەسەگە ءوسىپ كەتكەن. جاقىندا مەن ءوزىم شاڭىراق كوتەردىم. ەندى ماعان 3 بولمەلى ءۇي الۋ كەرەك. 3 بولمەلى ءۇيدىڭ باعاسى 20-25 ميلليون تەڭگە. ونداي سوممانى تابۋ جاس وتباسى ءۇشىن مۇمكىن ەمەس جاعداي.

وتكەن جىلمەن سالىستىرعاندا وڭىردە قۇرىلىس ماتەريالدارىنىڭ قۇنى 2 ەسەگە وسكەن. اسىرەسە ارماتۋرا مەن تسەمەنتتىڭ باعاسى شارىقتاپ تۇر. سالدارىنان قۇرىلىس كومپانيالارى تۇرعىن ءۇي باعاسىن قىمباتتاتۋعا ءماجبۇرمىز دەيدى. ماسەلەن، مىنا جەكە كومپانيا پاتەردىڭ 1 شارشى مەترىن 280-320 مىڭ تەڭگەدەن ساۋدالاپ جاتىر.

ساپار اۋلاسوۆ، قۇرىلىس كومپانياسى ديرەكتورىنىڭ ورىنباسارى:

- 320 بولۋ سەبەبى ونىڭ شىعىنىنا بايلانىستى. ارماتۋرا، تەرەزەلەر بار، سەمەنت بار، جۇمىس كۇشى بار. وسىنىڭ ءبارىن ەسەپتەپ شىعارعاندا وسىنداي باعاعا تۋرا كەپ تۇر. قۇرىلىس ماتەريالىنىڭ قىمباتتاۋىنان بىزدەر باعانى وسىلاي قويدىق. مىسالى، ارماتۋرانى قۇرىلىس باستاعاندا ءبىز 220 الساق، قازىر 420 تەڭگەگە قىمباتتاپ كەتتى. سول سەبەپتەن باعانى وسىلاي قويۋعا تۋرا كەلدى. ال نارىقتى باقىلاپ، باعانى نەگىزسىز كوتەرگەندەرمەن كۇرەسەتىن جاۋاپتى ورگان وكىلدەرىنىڭ قازىر قولى بوس ەمەس.

ولار بازار جاعالاپ، قۇرىلىس ماتەريالدارىنىڭ نەلىكتەن قىمباتتاپ كەتكەنىن زەرتتەۋمەن الەك. ال اشىق نارىقتاعى باسپانا باعاسىنىڭ قالاي قۇبىلعانىنان بەيحابار بولىپ شىقتى.

ەرلان جايسابايەۆ، باسەكەلەستىكتى قورعاۋ جانە دامىتۋ اگەنتتىگى تۇركىستان وبلىسى بويىنشا دەپارتامەنتى تالداۋ ءبولىمىنىڭ باس مامانى:

- قازىر مەملەكەتتىك باعدارلامامەن باعا وزگەرىسسىز 180 مىڭ تەڭگەدەن 1 شارشى مەترىنە بەرىلىپ جاتىر.

- ال جەكە كومپانيالار شە؟

- جەكەمەنشىك كومپانيالاردا بايقالمادى باعا ءوسىمى.

- 320 مىڭ ءسىز ءۇشىن ءوسىم سانالمايدى يا؟

- 320 مىڭدى مەن بىلمەدىم، ءسىز قاي نە بويىنشا ايتىپ تۇرعانىڭىزدى؟ ول قازىر ساتىلىمدا ما؟

- ءيا، ساتىلىپ جاتىر. 3-4 ساناتتار بويىنشا بىزدە جۇمىس جۇرگىزىلمەدى.

- سىزدەر ساراپتاما جاساعان جوقسىزدار؟

- جاساعان جوقپىز. ال ەكونوميست- ساراپشىلار باسپانا باعاسىنىڭ قىمباتتاۋىن قالادا جاڭا جۇمىس ورىندارى كوپتەپ اشىلۋىمەن جانە مەملەكەتتىك قىزمەتكەرلەر سانىنىڭ كوبەيۋىمەن بايلانىستىرادى. وعان رۋحاني شاھارعا ايىنا كەلەتىن ءجۇز مىڭداعان تۋريستەر مەن ستۋدەنتتەردىڭ دە اسەرى بار. سوندىقتان قازىرگى كۇنى تۇركىستاندا پاتەر ەكسكليۋزيۆتى تاۋار رەتىندە ۇسىنىلىپ وتىرعانىن ايتادى.

ءسابيت بايماعامبەتوۆ، ەكونوميست- ساراپشى:

- تۇركىستانداعى قازىرگى باعا شىمكەنتتەن جوعارى، الماتى مەن نۇر- سۇلتانمەن شامالاس. بۇنىڭ باستى سەبەبى پاتەر سانى از بولۋى جانە كەلگەن ستۋدەنتتەر مەن قىزمەت ىستەۋگە كەلگەن مەملەكەتتىك قىزمەتكەرلەر بولسىن، پاتەرگە دەگەن سۇرانىس كوپ. سۇرانىس كوپ بولعاننان كەيىن تاۋاردىڭ باعاسى سول سەبەپتى جوعارى بولادى. ۋاقىت وتە كەلە تۇسەدى دەپ ويلايمىن.

مەملەكەتتىك باعدارلامامەن سالىنعان ۇيلەر ولار دا ءوز اسەرىن تيگىزەدى. ساراپشىلاردىڭ ايتۋىنشا، تۇرعىن ءۇي قۇنىن تومەندەتۋ ءۇشىن كوپ قاباتتى ۇيلەردى تەزدەتىپ پايدالانۋعا بەرىپ، ستۋدەنتتەر جاتاقحاناسىن كوپتەپ سالۋ كەرەك. ايتا كەتەيىك، قازىر تۇركىستان وبلىسىندا 40 مىڭ ادام باسپانا كەزەگىندە تۇر. بيىل جىل سوڭىنا دەيىن 5200 پاتەر پايدالانۋعا بەرىلەدى دەپ جوسپارلانۋدا.

جاندوس جۇمابەك، ەربولات ءابىش، سامات ناعاشبەك ۇلى

www.24.kz