سولتۇستىك قازاقستاندا اققۋدى اتقان ادام سوتتالدى

پەتروپاۆل. قازاقپارات - سولتۇستىك قازاقستان وبلىسىندا قىزىل كىتاپقا ەنگەن اققۋ اتىپ العان ەر ادامعا قاتىستى سوت ۇكىمى شىقتى، دەپ حابارلايدى قازاقپارات ءتىلشىسى.

س ق و ايىرتاۋ اۋداندىق سوتىنىڭ مالىمەتىنشە، زاڭسىز اڭشىلىققا قاتىستى قىلمىستىق ءىس بۇگىن سوتتا قارالدى.

ش. ەسىمدى ەر ادام 18- قىركۇيەك كۇنى ورمانعا اڭ اۋلاۋعا شىققان.

جولدا قىزىل كىتاپقا ەنگەن سۇڭقىلداق اققۋدى كورىپ، اڭشىلىق ەتۋگە ءتيىستى قۇجاتتارى بولماسا دا اتىپ العان.

سوتتالۋشىنىڭ كىناسى كۋاگەرلەردىڭ ايعاقتارىمەن، جازباشا جانە زاتتاي دالەلدەندى.

«ش. - عا قاتىستى قىلمىستىق ءىس سوتقا جەدەلدەتىلگەن سوتقا دەيىنگى تەرگەۋمەن ءتۇستى. پروكۋرور سوتتالۋشىعا قاتىستى 3 جىلعا باس بوستاندىعىن شەكتەۋ جانە 7 جىلعا دەيىن اڭشىلىق ەتۋ قۇقىعىنان ايىرۋدى سۇرادى. قىلمىستىڭ بۇل تۇرىنە ايىپپۇل، قوعامدىق ورىندا جۇمىس، تۇزەتۋ جۇمىسى، 6 جىلعا دەيىن باس بوستاندىعىن شەكتەۋ نەمەسە ايىرۋ جازاسى قاراستىرىلعان»، - دەلىنگەن حابارلامادا.

سوتتالۋشىنىڭ كىناسىن مويىنداۋى ونىڭ جازاسىن جەڭىلدەتتى. سونداي-اق سوت ونىڭ بۇعان دەيىن سوتتالماعانىن ەسكەردى.

ناتيجەسىندە ايىرتاۋ اۋداندىق سوتى ەر ادامنىڭ 3 جىلعا باس بوستاندىعىن شەكتەپ، 7 جىلعا دەيىن اڭشىلىق ەتۋ قۇقىعىنان ايىرۋعا ۇكىم شىعاردى.

بۇدان باسقا سوتتالۋشى كەلتىرىلگەن شىعىننىڭ ورنىن تولتىردى، ال اڭشى مىلتىعى تاركىلەندى.