+7 (701) 759 90 19
USD 431.07 EUR 485.51
RUB 5.69 CNY 67.47
جاڭالىقتار

قازاقستاندىق سپورتشى بەلتەمىرگە تارتىلۋ بويىنشا گيننەستىڭ رەكوردتار كىتابىنا ەندى

19 قازان 21:14
:ءبولىسۋ
قازاقستاندىق سپورتشى بەلتەمىرگە تارتىلۋ بويىنشا گيننەستىڭ رەكوردتار كىتابىنا ەندى

نۇر-سۇلتان. قازاقپارات - شاحتينسك قالاسىنىڭ 19 جاسار تۋماسى رۋسلان فاتاحوۆ بەلتەمىرگە تارتىلۋ بويىنشا بەس جاڭا رەكورد ورناتىپ، گيننەستىڭ رەكوردتار كىتابىنا ەندى.

رۋسلان جاستايىنان سپورتتى جانىنا سەرىك ەتكەن. العاشىندا ول گرەك-ريم كۇرەسىن جاقسى كوردى، سودان كەيىن جەڭىل اتلەتيكامەن، فۋتبولمەن، باسكەتبولمەن، ۆولەيبولمەن اينالىستى. 16 جاسىندا ستريتليفتينگكە دەن قويا باستاعان.

«سپورت - بۇل مەنىڭ ومىرلىك ۇستانىمىم. مەن جەڭىسكە جەتكەندى، ءبىرىنشى بولۋدى جاقسى كورەمىن. ستريتليفتينگ - مەن ءۇشىن ۇلكەن سىناق. باسىندا دۇرىس تارتىلا المادىم، ءبىراق تىنىمسىز جاتتىعۋلار ناتيجە بەردى. بىلتىر دەنە سالماعىما 32+ كەلى قوسىپ تارتىلۋ بويىنشا رەكورد ورناتىپ، الەم چەمپيونى اتاندىم. چەمپيونات كيەۆتە ءوتتى»، - دەدى رۋسلان.

رۋسلان وتكەن جىلدىڭ قازان ايىندا گيننەستىڭ رەكوردتار كىتابىنا «قوسىمشا سالماقپەن تارتىلۋ» ساناتىنا ءوتىنىم بەردى. ول وسى ساناتتاعى بارلىق جەتى رەكوردتى جاڭارتۋعا شەشىم قابىلداعان. بيىل ساۋىردە سپورتشى ەكى جاتتىقتىرۋشىنىڭ كۋاگەرلىگىمەن جانە فوتوسۋرەت پەن بەينەلەردى پايدالانا وتىرىپ جاتتىعۋلاردى جاسادى. بەينەجازبانى جانە قاجەتتى قۇجاتتاردى جىبەرگەن رۋسلان التى ايعا جۋىق ۋاقىت بويى جاۋاپ كۇتتى.

جاقىندا ول بەس رەكورد جاڭارتقانى تۋرالى حابارلاما الدى. بۇل رەكورد - ءوز سالماعىنا 45+ كەلى قوسىپ مينۋتىنا 20 رەت تارتىلۋ، ءوز سالماعىنا 27+ كەلى قوسىپ مينۋتىنا 31 رەت تارتىلۋ، ءوز سالماعىنا 18+ كەلى قوسىپ مينۋتىنا 39 رەت تارتىلۋ، كەرى ۇستاپ ءوز سالماعىنا 27+ كەلى قوسىپ 29 رەت تارتىلۋ جانە ءوز سالماعىنا 18+ كەلى قوسىپ مينۋتىنا 35 رەت تارتىلۋ. تاعى ەكى سانات بويىنشا حابار جوق.

«مەن گيننەستىڭ رەكوردتار كىتابىنا ەنگەنىمە قۋانىشتىمىن. ەكى كاتەگوريا بويىنشا ماعان قوسىمشا قۇجاتتاردى جىبەرۋدى سۇرادى، ءالى جاۋاپ كەلگەن جوق. بۇل ساناتتار بويىنشا دا رەكورد جاڭارتامىن دەپ ۇمىتتەنەمىن. قازىر رەسەيدە شەت ءتىلىن مەڭگەرىپ جاتىرمىن. بولاشاقتا جەكە جاتتىعۋلار مەن ستريتليفتينگ سەكسياسىن اشىپ، ادامدارعا ءوز ءبىلىمىم مەن تاجىريبەمدى بولىسكىم كەلەدى»، - دەيدى سپورتشى.

سپورتشىنىڭ رەكوردتارى تۋرالى اقپارات گيننەستىڭ رەكوردتار كىتابىنىڭ رەسمي سايتىندا دا بار.


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ
ونلاين قىزمەتكەرلەر

مۇراعات