تالدىقورعان تۇرعىنىنان اسا ءىرى كولەمدە سينتەتيكالىق ەسىرتكى تاركىلەندى

تالدىقورعان. قازاقپارات - تالدىقورعاندا اسا ءىرى كولەمدە سينتەتيكالىق ەسىرتكى الىپ جۇرگەن كۇدىكتى ۇستالدى، دەپ حابارلايدى قازاقپارات الماتى وبلىسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

«22- قىركۇيەكتە الماتى وبلىسىنىڭ پ د ەسىرتكى قىلمىسىنا قارسى كۇرەس باسقارماسى مەن الماتى وبلىسىنىڭ ۇ ق ك دەپارتامەنتى قىزمەتكەرلەرى بىرلەسكەن ارنايى وپەراتسياسى بارىسىندا تالدىقورعان قالاسىنىڭ ورتالىعىندا قىلمىستىق ءىس جۇرگىزۋ كودەكسىنىڭ 255-بابىنا سايكەس جۇرگىزىلگەن جەكە ءتىنتۋ كەزىندە 20 جاستاعى جەرگىلىكتى تۇرعىننىڭ سومكەسىنەن سالماعى 150 گرام سينتەتيكالىق ەسىرتكى زاتى بار پوليەتيلەن پاكەت الىندى»، دەلىنگەن حابارلامادا.

ۇنتاقتى 14- قازاندا سوت ساراپتاماسى ەسىرتكى دەپ تانىدى.

اتالعان فاكت قىلمىستىق كودەكستىڭ 296-بابى 4-بولىگىمەن «اسا ءىرى مولشەردە ەسىرتكى زاتتارىن زاڭسىز ساقتاۋ» بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. قازىر تەرگەۋ امالدارى جۇرگىزىلىپ جاتىر. ۆەدومستۆونىڭ مالىمدەۋىنشە، تەرگەۋ مۇددەسى ءۇشىن تولىق اقپارات جاريا ەتىلمەيدى.