قازاق- قىتاي كاسىپكەرلەرىنىڭ فورۋمىندا قازاقستان تەمىرجولدارىنىڭ ماڭىزى تۋرالى ايتىلدى

نۇر- سۇلتان. قازاقپارات - جياڭسۋ وڭىرىندەگى ليانيۋنگان قالاسىندا قازاق- قىتاي كاسىپكەرلەرىنىڭ فورۋمى ءوتتى. باسقوسۋعا قاتىسۋشىلار وڭىرلىك لوگيستيكادا بوگەتتەردى الىپ تاستاۋ جانە تەمىرجول مەن تەڭىز تاسىمالىنىڭ اۋقىمىن كەڭەيتۋ ماسەلەلەرىن تالقىلادى.

جەرگىلىكتى ايلاقتا قازاقستان مەن قىتايدىڭ بىرلەسكەن لوگيستيكالىق ورتالىعى ورنالاسقان. جياڭسۋ - دامۋ كورسەتكىشى بويىنشا قىتايدا ەكىنشى ورىندا تۇرعان ءوڭىر. وتكەن جىلى بۇل ايماقتىڭ جالپى ىشكى ءونىمى ءبىر جارىم تريلليون دوللاردان اسىپ ءتۇستى. مۇندا لوگيستيكا، حيميا، مۇناي حيمياسى، فارماتسيەۆتيكا جانە اۋىل شارۋاشىلىعى سالالارى جاقسى دامىعان.

فورۋممەن قاتار «ليانيۋنگان - قازاقستان مەن قىتاي اراسىنداعى دوستىق پەن ىنتىماقتاستىق قاقپاسى» اتتى فوتوكورمە ءوتتى.

ليۋ ايمين، لوگيستيكالىق كومپانيا باس ديرەكتورىنىڭ ورىنباسارى:

- قازاقستاندىق كولىك- لوگيستيكالىق كومپانيا وكىلىنىڭ بايانداماسى بىزگە قىزىق بولدى. ويتكەنى ءبىز ليانيۋنگان قالاسىنان ترانزيتتىك تاسىمالمەن اينالىسامىز. تەمىرجول بارلىق جۇگىمىزدى وتكىزە المايدى. سوندىقتان قازاقستاننىڭ تەمىرجولدارىمەن ىنتىماقتاستىق اۋقىمىن كەڭەيتىپ، ورتالىق ازيا مەن ەۋروپا ەلدەرىنە ترانزيت مۇمكىندىكتەرىن ارتتىرۋعا ءۇمىتتىمىز.

جۋن سياوتسين، ەلەكتروندى كوممەرتسيا كومپانياسىنىڭ پرەزيدەنتى:

- حالىقارالىق تاسىمالمەن اينالىساتىنداردىڭ كوبى كەدەندىك راسىمدەردەن وتەدى. ءبىز سيفرلىق اقپاراتتىق پلاتفورما قۇردىق. ول قازاقستاندىق كاسىپكەرلەرگە جەرگىلىكتى زاڭدىلىققا قاتىستى ماسەلەلەردى شەشۋگە كومەكتەسىپ، ولاردى جەدەل ءارى وڭاي ارنامەن قامتيدى.

www.24.kz