قازاقستاندا ۇزدىك اۋىل اكىمى انىقتالدى

None
None
نۇر- سۇلتان. قازاقپارات - بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ باسپا ءسوز حاتشىسى ەرحان تاتكەن ءوزىنىڭ Facebook پاراقشاسىندا ءمالىم ەتتى، دەپ حابارلايدى قازاقپارات.

«مەملەكەت باسشىسى قاسىم- جومارت توقايەۆ 2020 -جىلعى 1- قىركۇيەكتەگى قازاقستان حالقىنا جولداۋىندا اۋىل اكىمدەرىنىڭ تىكەلەي سايلاۋىن وتكىزۋدىڭ ماڭىزدىلىعىن اتاپ وتكەن بولاتىن. وسى ورايدا، «ۇزدىك اۋىل اكىمى» كونكۋرسىنىڭ ماڭىزى مەن وزەكتىلىگى ارتا ءتۇستى.

ويتكەنى كونكۋرستىڭ نەگىزگى ماقساتى - جۇمىستا جوعارى ناتيجەلەرگە قول جەتكىزگەن، اۋىلدىق ەلدى مەكەندەردىڭ دامۋىنا ەلەۋلى ۇلەس قوسقان، سونداي- اق حالىقپەن بەلسەندى اشىق جۇمىس جۇرگىزەتىن ۇزدىك اۋىل اكىمدەرىن انىقتاۋ جانە ىنتالاندىرۋ.

بيىل «رۋحاني جاڭعىرۋ» باعدارلاماسى اياسىندا مەملەكەتتىك قىزمەت ىستەرى اگەنتتىگى ەكىنشى مارتە ۇيىمداستىرعان كونكۋرس 15- قازاندا اياقتالدى. كونكۋرسقا قاتىسۋ ءۇشىن ەلىمىزدىڭ ون ءتورت وبلىسىنان جۇزدەن استام اۋىلدىق وكرۋگ اكىمدەرى ءوتىنىم بەرگەن. وبلىستاردىڭ اراسىندا تۇركىستان وبلىسىنان - 21 اكىم، باتىس قازاقستان وبلىسىنان - 15 اكىم جانە جامبىل وبلىسىنان - 14 اكىم كونكۋرسقا ءوتىنىم بەرىپ، بەلسەندىلىك تانىتتى.

الايدا، ۇزدىك اتانۋعا ات سالىسقان ۇمىتكەرلەر اراسىندا باتىس قازاقستان وبلىسى تاسقالا اۋدانى شەجىن اۋىلدىق وكرۋگىنىڭ اكىمى العاداي جامبىل وڭىرلىك جانە رەسپۋبليكالىق دەڭگەيلەردە ەڭ كوپ بالل جيناپ، كوزگە ءتۇستى. العاداي جامبىل وسى اۋداندا تۋىپ وسكەن، ماماندىعى - مۇعالىم. قىزمەتتىك جولىن تاسقالا اۋدانىندا باستاعان ول 2019 -جىلى مەملەكەتتىك قىزمەتكە ورنالاسقان. كونكۋرستىڭ رەسپۋبليكالىق كەزەڭىندە ول ەت جانە ءسۇت ونىمدەرىن قايتا وڭدەۋ جانە اۋىل شارۋاشىلىعى كووپەراتيۆتەرىن جۇزەگە اسىرۋ ارقىلى قوسىمشا جۇمىس ورىندارىن قۇرۋعا باعىتتالعان جوباسىن قورعادى.

بۇدان بولەك، ەكىنشى ورىندى جامبىل وبلىسى جامبىل اۋدانى پولاتقوسشى اۋىلدىق وكرۋگىنىڭ اكىمى ەرجان دانايەۆ جانە تۇركىستان وبلىسى تولەبي اۋدانى جوعارعى اقسۋ اۋىلدىق وكرۋگىنىڭ اكىمى ابديكادير سيكيمبايەۆ بولىسسە، ءۇشىنشى ورىندى پاۆلودار وبلىسى جەلەزين اۋدانى باشماچين اۋىلدىق وكرۋگىنىڭ اكىمى مەرۋەرت ماداگۋلوۆا مەن الماتى وبلىسى پانفيلوۆ اۋدانى ايدارلى اۋىلدىق وكرۋگىنىڭ اكىمى ايدار يسايەۆ ءوزارا ءبولىستى.

سونداي- اق، قاراعاندى وبلىسى اقتوعاي اۋدانى تاسارال اۋىلدىق وكرۋگىنىڭ اكىمى نۋرجان سەيتوۆ - «ۇزدىك شارۋاشىل اكىم»، اقمولا وبلىسى ستەپنوگورسك قالاسى اقسۋ كەنتىنىڭ اكىمى مارات سماعۇلوۆ - «اشىق اكىم»، قىزىلوردا وبلىسى جالاعاش اۋدانى اقسۋ اۋىلدىق وكرۋگىنىڭ اكىمى قانات نيەتقۇلوۆ - «ۇزدىك الەۋمەتتىك جوبا» نوميناتسيالارىنىڭ يەگەرلەرى اتاندى» - دەپ جازدى اگەنتتىكتىڭ باسپا ءسوز حاتشىسى ەرحان تاتكەن.

كونكۋرس جەڭىمپازى «ۇزدىك اۋىل اكىمى» ستاتۋەتكاسىمەن، سونداي- اق ءار ءتۇرلى نوميناتسيا يەگەرلەرى مەملەكەتتىك قىزمەت ىستەرى اگەنتتىگى ءتوراعاسىنىڭ قۇرمەت گراموتالارىمەن ماراپاتتالادى.

سوڭعى جاڭالىقتار