الماتىدا تورەگەلدى شارمانوۆتىڭ حالىقارالىق سىيلىعى تاپسىرىلدى
قازاقستاندا تورەگەلدى شارمانوۆتىڭ حالىقارالىق قورى قۇرىلدى، ونىڭ قىزمەتى دەنساۋلىققا قاتىستى جالپىعا بىردەي قۇقىق يدەياسىن دامىتۋعا باعىتتالعان. قور قىزمەتى اياسىندا شارمانوۆتىڭ حالىقارالىق سىيلىعىنىڭ لاۋرەاتتارىنا ماراپاتتار سالتاناتتى تۇردە تابىس ەتىلدى.
القالى ماراپاتقا العاشقى مەديتسينالىق- سانيتارلىق كومەكتى دامىتۋعا قوسقان ۇلەسى ءۇشىن دجونس حوپكينس ۋنيۆەرسيتەتىنىڭ شەتەلدىك عالىمدارى دەۆيد بيشاي مەن مايك شلايف، سونداي- اق قازاقستاندىق دارىگەرلەر، COVID-19 دياگنوستيكاسى مەن ەمدەۋ حاتتاماسىن ازىرلەۋشى ينفەكسيونيستەر - باقىت كوشەروۆا مەن امانگۇل دۇيسەنوۆا يە بولدى.
شارا بارىسىندا الماتى اكىمى باقىتجان ساعىنتايەۆ پروفەسسور تورەگەلدى شارمانوۆتى تۋعان كۇنىمەن قۇتتىقتاپ، ونىڭ وتاندىق دەنساۋلىق ساقتاۋ جۇيەسىنىڭ قالىپتاسۋى مەن دامۋىنا قوسقان زور ۇلەسىن اتاپ ءوتتى.
تورەگەلدى شارمانوۆتىڭ حالىقارالىق قورىنىڭ ميسسياسى - دەنساۋلىق ساقتاۋ جانە دۇرىس تاماقتانۋ سالاسىنداعى جاس جانە بولاشاعى زور عالىمداردىڭ جوبالارىن قولداۋ. بۇدان باسقا، قور ديەتولوگيامەن اينالىساتىن الەمدىك اكادەميالىق ورتالىقتاردا مامانداردىڭ تاعىلىمداماسىنا گرانتتار بەرۋ جوسپاردا بار.
تورەگەلدى شارمانوۆ - ەلىمىزدەگى مەديتسينانىڭ ءىرى ۇيىمداستىرۋشىلارىنىڭ ءبىرى، قازاقستان مەن ورتالىق ازيا رەسپۋبليكالارىنداعى نۋتريتسيولوگتار مەكتەبىنىڭ نەگىزىن قالاۋشى. ول 1978 -جىلى الماتىدا دۇنيەجۇزىلىك دەنساۋلىق ساقتاۋ ۇيىمى مەن يۋنيسەف قامقورلىعىمەن العاشقى مەديتسينالىق- سانيتارلىق كومەك جونىندەگى حالىقارالىق كونفەرەنسيانى وتكىزۋدىڭ باستاماشىسى رەتىندە الەمدىك جانە قازاقستاندىق دەنساۋلىق ساقتاۋعا زور ۇلەس قوستى.
كونفەرەنسيا قورىتىندىسى بويىنشا الەمدىك دەنساۋلىق ساقتاۋداعى نەگىزگى قۇجاتتاردىڭ ءبىرى - الماتى دەكلاراتسياسى قابىلداندى، وندا العاشقى مەديتسينالىق- سانيتارلىق كومەكتىڭ ۇلتتىق جۇيەسىن ۇيىمداستىرۋ تۇجىرىمداماسى العاش رەت باياندالدى.
اۆتور: الما مۇقانوۆا