ساباقتى ناشار وقىعان اتاقتى ادامدار

نۇر-سۇلتان. قازاقپارات – بالالاردىڭ مەكتەپتەگى ۇزدىك باعاسى اتا - انالاردىڭ ماقتانىشى ەكەنىن ەشكىم جوققا شىعارمايدى.

ولاردىڭ بولاشاعىنان مەكتەپ ۇجىمى دا ۇلكەن ءۇمىت كۇتەدى. الايدا، كەيدە ساباقتى ناشار وقىعاندار، ۇلگەرىمى تومەن وقۋشىلار ومىردە ۇلكەن جەتىستىكتەر مەن تابىسقا جەتكەن جاعدايلار كەزدەسەدى. ماسساگەت پورتالى مەكتەپ كەزىندە ناشار وقىپ، ۇلگەرىمى تومەن بولعان اتاقتى ادامداردىڭ ءتىزىمىن ۇسىنادى.

ۋينستون چەرچيلل

ۋينستون چەرچيلل - بريتانياىق مەملەكەت جانە قوعام قايراتكەرى. وتباسىنىڭ تۇڭعىشى، مەكتەپتە ساباق وقۋعا ونشا قىزىعۋشىلىق تانىتپاعان. مۇعالىمدەرى بالانىڭ دارىندى ەكەنىن دە جوققا شىعارمايدى. سەبەبى، ولار بالالاردىڭ ءتۇسىنۋى قيىن شىعارمالارىن چەرچيللدىڭ ءجيى وقىپ جۇرگەنىن كورەتىن. چەرچيلل مەكتەپتە بەلسەندى وقۋشى بولماعان. سوعان قاراماستان، ادەبيەت بويىنشا نوبەل سىيلىعىن چەرچيلل الدى.

سەرگەي كوروليەۆ

وتكەن عاسىردىڭ 60-جىلدارى ا ق ش پەن كەڭەس وداعى اراسىندا عارىشتى يگەرۋگە باسەكە ءجۇردى. سول كەزدە كەڭەس زىمىراندارى ايتۋلى عالىم سەرگەي كورولەۆتىڭ باسشىلىعىمەن ۇشىرىلدى. ءبىراق ول مەكتەپتە قاراپايىم ۇشتىك باعامەن وقىعان ەكەن. كەيىننەن ول كەڭەس عالىمى، زىمىران جانە عارىشتىق جۇيەلەردىڭ كونسترۋكتورى، كسرو باس كونسترۋكتورلارى كەڭەسىنىڭ ءتوراعاسى، ك س ر و عىلىم اكادەمياسىنىڭ اكادەميگى اتاندى.

يسااك نيۋتون

اعىلشىن فيزيگى، ماتەماتيگى، مەحانيگى ءھام استرونومى، كلاسسيكالىق فيزيكانىڭ نەگىزىن قالاۋشىلاردىڭ ءبىرى يسااك نيۋتون ءوز سىنىبىنداعى ەڭ بۇزىق بالا اتانعان. ءبىر كۇنى ول مەكتەپتە توبەلەسىپ، جەڭىلىپ قالعان. وسىدان كەيىن نيۋتون قارسىلاسىن تەك بىلەكتىڭ ەمەس ءبىلىمنىڭ كۇشىمەن جەڭۋگە شەشىم قابىلداعان. بۇل شەشىمى دۇرىس بولىپ، كوپ ۇزاماي ول ۇلگەرىمى ناشار وقۋشىدان سىنىپتاعى ۇزدىك وقۋشىعا اينالعان ەكەن.

ناپولەون بوناپارت

1804-1815 -جىلدارداعى فرانسيا يمپەراتورى، قازىرگى فرانسۋز مەملەكەتىنىڭ نەگىزىن قالاۋشى، قولباسشى جانە مەملەكەت قايراتكەرى - ناپولەون مەكتەپتە تەك ماتەماتيكانى جاقسى كورەتىن. باسقا ساباقتار وعان قيىنعا سوققان كورىنەدى.

ليۋدۆيگ ۆان بەتحوۆەن

ليۋدۆيگ ۆان بەتحوۆەن، كلاسسيكالىق مۋزىكانىڭ ءىرى قايراتكەرى جانە الەمدە مۋزىكاسى ەڭ كوپ ورىندالاتىن كومپوزيتورلاردىڭ ءبىرى. ول ساباق وقىماق تۇگىلى مەكتەپكە بارۋدى ۇناتپاعان ەكەن. مۋزىكانت ماتەماتيكا مەن باسقا دا ساباقتاردى مۇلدە وقىماعان. ءبىراق فورتەپيانو، سكريپكانى سيىقتى مۋزىكالىق اسپاپتاردا شەبەر ويناعان. جەتى جاسىندا ول ءوزىنىڭ العاشقى كونتسەرتىن بەردى.

الەكساندر پۋشكين

ورىس اقىنى، دراماتۋرگ، ادەبيەت تەورەتيگى مەن ادەبيەتتانۋشى، تاريحشى، پۋبليتسيست جانە جۋرناليست، ⅩⅨ عاسىردىڭ ەڭ ىقپالدى جازۋشىلارىنىڭ ءبىرى - الەكساندر پۋشكين ليتسەيدە وقىعان. اقىن ساباقتاردى ناشار وقىعان سەبەپتى مۇعالىمدەرى اتا-اناسى ءجيى شاعىمدانعان ەكەن.

انتون چەحوۆ

الەم ادەبيەتىنىڭ كلاسسيك جازۋشىلارىنىڭ ءبىرى، اكادەميك جانە دارىگەر، الەمدەگى ايگىلى دراماتۋرگتەردىڭ ءبىرى - انتون چەحوۆتىڭ شىعارمالارى ءقازىر مەكتەپتە وقىتىلادى. ءبىراق ايگىلى اڭگىمەلەردىڭ اۆتورى ءبىر سىنىپتا ەكى رەت قالعانىن ءبارى بىلە بەرمەيدى.

توماس ەديسون

اتاقتى ونەرتاپقىش توماس ەديسوندى مەكتەپ مۇعالىمدەرى اقىل- ەسى كەم دەپ ەسەپتەگەن. ول ءبىرىنشى سىنىپتا ءتورت اي وقىعان سوڭ، مۇعالىمدەر اناسىنا وسىنداي سوزدەر ايتقان. كەيىن اناسى بالانى مەكتەپتەن شىعارىپ، ءوزى وقىتقان. ۋاقىت وتە كەلە مەكتەپ قابىلداماعان ادام فونوگرافتى (بارلىق دىبىس جازۋ قۇرىلعىلارىنىڭ اتاسى) ويلاپ تاۋىپ، قىزدىرۋ شامىن، تەلەفون مەن تەلەگرافتى جەتىلدىردى.

ريچارد برەنسون

قۇرامىندا ءار ءتۇرلى سالاداعى 400-گە جۋىق كومپانيا بار Virgin Group كومپانياسىنىڭ نەگىزىن قالاۋشى ريچارد برەنسون بالا كەزىنەن ءوزىنىڭ تۇيىقتىعى جانە ۇياڭدىعىمەن ەرەكشەلەنگەن. مەكتەپ تاقتاسىنىڭ الدىندا ساباق ايتپاق تۇگىل، قاتتى قوبالجىپ، ءتىپتى كەكەشتەنەتىن بولعان. ءبىراق ساباق ۇلگەرىمىنىڭ ناشارلىعى ومىردە وعان مۋلتيميلليونەر اتانىپ، عارىشقا ءوز زىمىرانىمەن ۇشۋعا كەدەرگى كەلتىرمەدى.

اقپارات دەرەككوزى: massaget.kz