حابار-وشارسىز كەتكەن ەر ادام ۇرلىق جاساپ ۇستالدى
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، اعىمداعى جىلعى قازاننىڭ 17-دە كوكشەتاۋ قالالىق پوليتسيا باسقارماسىنىڭ كەزەكشى بولىمىنە 59 جاستاعى جەرگىلىكتى تۇرعىنى حابارلاسىپ، بەلگىسىز بىرەۋلەردىڭ اۋەزوۆ كوشەسىندەگى اۋلالاردىڭ بىرىندە شويىن ليۋكتى ۇرلاپ كەتكەنىن ايتتى. شىعىن سوماسى 20 مىڭ تەڭگەنى قۇرادى.
«جەدەل باسقارۋ ورتالىعىنىڭ بەينەباقىلاۋ كامەرالارى ارقىلى ۇرلىق جاسالعانى انىقتالدى. كامەرانىڭ كومەگىمەن پاترۋلدىك پوليتسيا باتالونى ەكيپاجىنىڭ قىزمەتكەرلەرى ەكى كۇدىكتىنى ىزدەستىرىپ ۇستادى»، - دەدى ۆەدومستۆودان.
انىقتالعانداي، كۇدىكتىلەردىڭ ءبىرى سەلينوگراد اۋدانىنىڭ 19 جاستاعى تۇرعىنى بولىپ شىقتى. ونىڭ وسى جىلدىڭ 16-قازانىنان باستاپ ءىز-ءتۇزسىز جوعالعانى انىقتالدى.
«قازىرگى ۋاقىتتا ۇرلىق جاساۋ بويىنشا قىلمىستىق كودەكستىڭ 188-بابى نەگىزىندە سوتقا دەيىنگى تەرگەۋ شارالارى قولعا الىندى. كۇدىكتىلەردىڭ وسىعان ۇقساس قىلمىس جاساۋعا قاتىستىلىعى تەكسەرىلۋدە»، - دەپ تولىقتىردى ۆەدومستۆودان.
اۆتور: اسلان وسپانوۆ