اسقار مامين «اۋىل - ەل بەسىگى» جوبالارىن ىسكە اسىرۋدى جانداندىرۋدى تاپسىردى

نۇر- سۇلتان. قازاقپارات - ق ر پرەمەر- ءمينيسترى اسقار مامين ءبىرقاتار ءوڭىردىڭ اكىمىنە «اۋىل - ەل بەسىگى» اياسىنداعى جوبالاردى ىسكە اسىرۋ جۇمىستارىن جانداندىرۋدى تاپسىردى، دەپ حابارلايدى قازاقپارات ءتىلشىسى.

«اۋىل - ەل بەسىگى» جوباسىنىڭ باستى ماقساتى - اۋىلدىق اۋماقتاردىڭ الەۋمەتتىك جانە ينجەنەرلىك ينفراقۇرىلىمىن جاڭعىرتۋ ارقىلى اۋىلداعى حالىقتىڭ تۇرمىس ساپاسىن جاقسارتۋ بولىپ تابىلادى. وسى باعدارلاما بويىنشا 3561 اۋىل ىرىكتەپ الىندى، ولاردا 6,9 ميلليون ادام تۇرىپ جاتىر، بۇل اۋىل حالقىنىڭ - 89 پايىزى»، - دەدى اسقار مامين بۇگىن ۇكىمەت وتىرىسىندا.

ۇكىمەت باسشىسىنىڭ اتاپ وتۋىنشە، 2019-2020 -جىلدارى تۇرعىن ءۇي- كوممۋنالدىق شارۋاشىلىق، كولىك، ءبىلىم بەرۋ، دەنساۋلىق ساقتاۋ، مادەنيەت جانە سپورت سالالارىندا «اۋىل - ەل بەسىگى» جوباسىنىڭ اياسىندا جانە دە جۇمىسپەن قامتۋدىڭ جول كارتاسى، «نۇرلى جول» جانە «نۇرلى جەر» باعدارلامالارىنىڭ اياسىندا، بارلىق قارجىلاندىرۋ كوزدەرىنەن 618 ميلليارد تەڭگەنى قۇرايتىن 12 مىڭ جوبا ىسكە اسىرىلدى.

«بيىلعى جىلى «اۋىل - ەل بەسىگى» جوباسىن ىسكە اسىرۋ اياسىندا جوبالاردى تاپسىرۋ مەن بولىنگەن بيۋدجەت قاراجاتىن يگەرۋ بويىنشا پاۆلودار، قوستاناي، جامبىل، شىعىس قازاقستان وبلىستارى جاقسى سەرپىن كورسەتىپ وتىر. جىل سوڭىنا دەيىن 2,5 اي عانا قالدى، بارلىق اكىمدىكتەر، اسىرەسە، الماتى، قىزىلوردا جانە اتىراۋ وبلىستارى جوبالاردى ىسكە اسىرۋ بويىنشا جۇمىستى جانداندىرۋ قاجەت»، - دەدى پرەمەر- مينيستر.