رەسەيلىك دارىگەر: كوۆيدتەن كەيىنگى سيندرومنان ساقتانۋ جولى - فيزيكالىق بەلسەندىلىك

الماتى. قازاقپارات - الماتىدا كوۆيدتەن كەيىنگى سيندرومنىڭ قۇربانى بولۋدان ساقتانۋ جولدارى تالقىلاندى، دەپ حابارلايدى قازاقپارات ءتىلشىسى.

«مەنتالدى دەنساۋلىق جانە COVID-19» تاقىرىبىنداعى كونفەرەنتسيا اياسىندا «ۆ. م. بەحتەريەۆ اتىنداعى ۇلتتىق مەديتسينالىق پسيحياتريا جانە نيەۆرولوگيا زەرتتەۋ ورتالىعىنىڭ» ديرەكتورى نيكولاي نەزنانوۆ مەنتالدى دەنساۋلىقتى قالاي ساقتاۋ كەرەكتىگى تۋرالى ايتتى.

دارىگەردىڭ مالىمەتىنشە، ونىڭ ادىستەرى وتە قاراپايىم. ءبىراق ادامدار ولاردى ساقتاۋعا تىرىسپايدى. ساراپشى ەڭ الدىمەن، ءوز دەنساۋلىعى ءۇشىن جەكە جاۋاپكەرشىلىك الۋعا، ءوزىن- ءوزى باقىلاۋعا، تەك اسقىنۋلارمەن عانا ەمەس، سونىمەن قاتار الدىن الۋ ءۇشىن دارىگەرلەرگە ۋاقتىلى بارۋعا شاقىرادى.

«ءبىر عانا ۇسىنىس - ەڭبەك جانە دەمالىس رەجيمىن قالىپقا كەلتىرۋ. جاقسى فيزيكالىق بەلسەندىلىك - وسىنى ەستەن شىعارماۋ قاجەت. فيزيكالىق تۇرعىدان عانا ەمەس، پسيحولوگيالىق تۇرعىدان دا ول ءوزىنىڭ سترەسس جۇكتەمەسىنە دايىن بولۋى قاجەت. ءبىراق ءبىز سىزدەرمەن كەرىسىنشە، السىرەيمىز، قوزعالۋدى توقتاتامىز. ءتورت قابىرعادان شىعىپ، كولىككە وتىرىپ ۇيگە جەتەمىز، 50 مەتر جۇرەمىز، سونىمەن بولدى، بارلىق فيزيكالىق بەلسەندىلىگىمىز شەكتەۋلى. ەكىنشى فاكتور - دۇرىس تاماقتانۋ. بۇل - ۇزاق ءومىر ءسۇرۋدى قامتاماسىز ەتەتىن فاكتورلار»، - دەدى ن. نەزنانوۆ.

ول سونىمەن قاتار فيزيكالىق دەنساۋلىققا نازار اۋدارۋ كەرەكتىگىن اتاپ ءوتتى. ويتكەنى، كوپتەگەن پسيحولوگيالىق پروبلەمالار تاپ وسى بۇزىلۋلاردان باستاۋ الادى.

«كەز كەلگەن سوماتيكالىق اۋرۋ، ەگەر ول سول تۇستا وزەكتى سيپاتقا يە بولسا، تانىمدىق تاپشىلىققا اكەلەدى. مۇنداي بۇزىلۋلاردىڭ ىقتيمال سەبەبى نە ەكەنىن ناۋقاستارعا جەتكىزۋ ماڭىزدى»، - دەدى زەرتتەۋ ورتالىعىنىڭ ديرەكتورى.