ورتتەن شىققان قويۋ ءتۇتىن الماتىلىقتاردىڭ زارەسىن الدى

الماتى. قازاقپارات - الماتىدا تۇرعىن ءۇي اۋلاسىنداعى شارۋاشىلىق قۇرىلىستارى ورتەندى.

ءورت ورنىنان 25 ليترلىك ەكى گاز باللونى مەن 5 ليترلىك ەكى گاز باللونى شىعارىلدى، دەپ حابارلايدى قازاقپارات ءتىلشىسى.

قالالىق توتەنشە جاعدايلار دەپارتامەنتىنىڭ مالىمەتىنشە، ءورت سوندىرۋشىلەر 18-قازان كۇنى ساعات 14:47 كەزىندە المالى اۋدانىنداعى قوجامقۇلوۆ كوشەسى، 259-مەكەنجايىنداعى ءورتتى سوندىرۋگە شىقتى. وقيعا ورنىنا جەتكەندە جالپى اۋدانى 40 شارشى مەتر شارۋاشىلىق قۇرىلىستىڭ جانىپ جاتقانى انىقتالدى.

ءورتتىڭ جەكە تۇرعىن ۇيگەلەرگە تارالۋى قاۋىپى تۋىندادى. 25 ليترلىك گاز باللونداردىڭ بىرىنەن گاز شىققان سوڭ ونى ءورت سوندىرۋشىلەر قاۋىپسىز قاشىقتىققا شىعارىپ ۇلگەردى.

جامبىل كوشەسىنىڭ قاۋىپسىزدىگىن قامتاماسىز ەتۋ ءۇشىن پوليتسيا قىزمەتكەرلەرى كوشەنى قورشاۋعا الدى. قابىلدانعان شارالاردىڭ ناتيجەسىندە ءورت 8 مينۋتتا، ساعات 15:10-دا ءوشىرىلدى.

15:27-دە تولىعىمەن جويىلدى. ءورت ءسوندىرۋ جۇمىسىنا 10 تەحنيكا، جەكە قۇرامنان 35 ادام جۇمىلدىرىلدى. سوڭعى دەرەك بويىنشا قىزىل جالىن 100 شارشى مەتردى شارپىعان.