مايرا ءىلياسوۆا: كۇيەۋىمە ءوزىم ىزدەپ ءجۇرىپ جاس توقال الىپ بەردىم، ول ۇل تۋىپ بەردى

نۇر-سۇلتان.قازاقپارات - مايرا ءىلياسوۆا ءوزىن ونەرگە ارناعان جان. جاستايىنان انشىلىككە قۇمار بولىپ، ءان ايتىپ ءوستى. ءالى كۇنگە ساحنادا.

وتباسىنان ونەردى بيىك قويعان. ءتىپتى سول ءۇشىن جولداسىنا ەكىنشى ايەل الىپ بەرىپ، ءوزى بولەك كەتكەنىن ايتادى.

بۇل تۋرالى «مەنىڭ ءومىرىم» باعدارلاماسىندا ايتىلدى.

مايرا ءىلىياسوۆا ەرتە جاستان تۇرمىس قۇردى. جولداسى دا ونەر جولىندا. ورتاق ءبىر قىزى بار. توعجان ەسىمدى قىزى بۇگىندە تۇرمىس قۇرىپ، بالالى- شاعالى بولدى. ال مايرا ءىلياسوۆا كۇيەۋىنەن بولەك ءبىر وتاۋ بولىپ تۇرىپ جاتىر.

«مەن 1-كۋرس وقىپ جۇرگەندە جولداسىممەن تانىستىم. ەكەۋمىز ەرتە ۇيلەندىك. ول قىزىما، وتباسىما قارادى. مەن ۇنەمى گاسترولدىك ساپارمەن ءجۇردىم. ءبىر ايلاپ، قىرىق كۇندەپ كەتەتىن ەدىك. ءسويتىپ جۇرگەندە ماعان ەشقاشان تىيىم سالعان ەمەس. ۇيدە وتىر، تاماق ىستە دەگەن ەمەس. قىزىما ءوزى قارادى، ۇيگە ءوزى قارادى. مەن ونەرگە ءوزىمدى ارناعان اداممىن. ونەردى تاستاي المادىم. ۇيدە وتىرا المادىم. سولاي جۇرگەندە مەن بۇنىڭ دۇرىس ەمەس ەكەنىن ءبىلدىم. جولداسىم بالاجان ەدى. ۇل بالانى جاقسى كورەتىن. وعان ەكىنشى ايەل ال دەدىم. ۇل بالا تۋىپ بەرسىن دەدىم. مەن بولەك وتباسى بولىپ وتىرامىن دەدىم. مەن ءوزىم رۇقسات ەتتىم»، - دەيدى ءانشى.

ءانشى ءسىڭلىسىنىڭ قۇربىلارىن سۇراستىرىپ ءجۇرىپ، ءبىرىن جولداسىمەن تانىستىرعان ەكەن. قازىر ەكىنشى وتباسى بولىپ تۇرىپ جاتىر.

«اپكەمنىڭ قىزىنا ايتتىم. 30 دان اسقان قۇربىلارىڭ بولسا ايت دەدىم. ول ەكى قىزدى ايتتى. سونىڭ ءبىرىن تانىستىردى. جولداسىم مەن تاپقانىمدى بىلگەن جوق. مەن دە ايتپادىم. مايگۇل ەسىمدى قىزبەن تانىستى. «ونىڭ اتى دا ساعان ۇقسايدى، تۋعان كۇنى دە بىردەي، رۋى دا بىردەي ەكەن» دەپ مەنى جۇباتىپ جاتىر. كەيىن مەنىڭ تانىستىرعانىمدى بىلگەندە رەنجىدى. ءبىراق قازىر بىرگە. ۇلدى بولدى. ول 10 جاستان استى. بارىپ تۇرامىز. ولار بىزگە كەلەدى.

مايگۇل ماعان كەلىن سەكىلدى. قىزىما دا ءبارىن ءتۇسىندىرىپ ايتتىم. ول پسيحولوگيالىق جاراقات العان جوق. ماحاببات ماڭگى ەمەس. نە سەبەپتى ءولىپ- ءوشىپ ۇيلەنگەندەر كەيىن ءبارىن تاستاپ اجىراسا بەرەدى. سەبەبى ماحاببات جوعالادى. تۋىس ادامعا اينالىپ كەتەسىڭ. باسقا ەشنارسە قالمايدى. مەندە دە سونداي بولدى»، - دەيدى ءىلياسوۆا.

ءانشىنىڭ ءوزى ەكىنشى رەت تۇرمىس قۇرعان جوق. ءسوز سالعان ازاماتتار كەزىككەنىمەن، ول ءوزىن ونەرگە، نەمەرەلەرىنە ارنادى.

«مەنىڭ نەمەرە باعاتىن، ولارعا قارايتىن، شاكىرت تاربيەلەيتىن، ونەردە جۇرەتىن كەزىم كەلدى. مەن ءوزىمدى سوعان ارنادىم. ماحاببات بولعان جوق. تۇرمىس قۇرعىم كەلمەدى. جولداسىم توقال العاندا قىزىم 15 جاستا بولدى. ءبىز 20 جىل بىرگە تۇردىق. 7 جىل بۇرىن استاناعا كەلدىك. ال جولداسىم وتباسىمەن الماتىدا تۇرادى. قانداي جاعداي بولسا دا مەن كومەك قولىن سوزام. قۋانىشتا بىرگەمىز»، - دەدى ول.